जग मोहनी दुर्गा दाई
(बिदाई जसगीत )
मुखड़ा
बेटी बरोबर राखेंव तोला, साज सिंगार मा साजेंव तोला।
लागत हे करलाई ओ, लागत हे करलाई ओ,
कइसे करंव मैं दाई तोर बिदाई ओ,
कइसे करंव महामाई तोर बिदाई ओ॥
पद — १
पहुना बरोबर आथस तैहा, दया मया ल बढ़ाथस ओ,
नव दिन रतिहा खेले-कूदे, नवरूप लीला देखाथस ओ।
सात बहिनिया तोर संगवारी, हाँस-हाँस खुशी मनाथस ओ,
मोर दुवरिया फूल-फूलवरिया, जोत-जँवारा लहराथस ओ।
हे जग मोहनी दुर्गा दाई, ममता के मूरत हे महामाई,
बेटी बरोबर राखेंव तोला, साज सिंगार मा साजेंव तोला।
लागत हे करलाई ओ, लागत हे करलाई ओ,
कइसे करंव मैं दाई तोर बिदाई ओ,
कइसे करंव महामाई तोर बिदाई ओ॥
पद — २
नव दिन तोर सेवा करथँव, मन के मुराद सुनाथँव,
अँचरा मा फूल चढ़ाके दाई, चरण म माथा नवाथँव।
तोर दरसन ले दुख हर जाथे, सुख के दिया जराथस ओ,
मया-ममता के छाँव बिछाके, सबके पीरा भगाथस ओ।
जग के पालनहार भवानी, तोर महिमा अगम बखानी,
लागत हे करलाई ओ, लागत हे करलाई ओ,
कइसे करंव मैं दाई तोर बिदाई ओ,
कइसे करंव महामाई तोर बिदाई ओ॥
पद — ३
लाल चुनरिया ओढ़े दाई, लागस चंदा सुहावन ओ,
माथे मुकुटिया , हाथ म तिरशूल, दरसन तोर मनभावन ओ।
ढोल-नँगारा बाजत रिहिस, गली गली जस ह सुनावै ओ,
करे भगत मन तोर जयकारा, अँसुवन संग मुसकावै ओ।
तोर चरण म अरजी मोर, जल्दी आहू दाई मोर,
लागत हे करलाई ओ, लागत हे करलाई ओ,
कइसे करंव मैं दाई तोर बिदाई ओ,
कइसे करंव महामाई तोर बिदाई ओ॥
पद — ४
आगे बिदाई के बेरा दाई, सगरो चराचर रोवत हे,
तोर मया के सुरता करके, अँखिया के नीर झुरोवत हे।
जावत हावस अपन तैं डेरा ,मोर घर ल तैं भुलाबे झन ,
अवइया बरस म जल्दी आबे, भगत ल तैं तरसाबे झन।
मोर घर-अँगना सुख ले भरदे, सबके जीवन मंगल करदे।
लागत हे करलाई ओ, लागत हे करलाई ओ,
कइसे करंव मैं दाई तोर बिदाई ओ,
कइसे करंव महामाई तोर बिदाई ओ॥
तोषण चुरेन्द्र 'दिनकर'
धनगांव डौंडीलोहारा बालोद छत्तीसगढ़ 9575070689
कोई टिप्पणी नहीं:
एक टिप्पणी भेजें