शुक्रवार, 9 अक्टूबर 2026

नवदुर्गा दाई तोला बंदथौं


नवदुर्गा दाई तोला बंदथौं ओऽ

तोला बंदथौं वोऽऽ तोला सुमरथौं ओऽ
नवदुर्गा दाई तोला बंदथौं ओऽ
हे अंबे माई तोला बंदथौं वोऽऽ
नवदुर्गा दाई तोला बंदथौं ओऽ

पहि‍ली रूप शैलपुत्री दाई, पर्वत के दुलारी,
बइला ऊपर करे सवारी, लागय रूप निराली।
हाथ म त्रिशूल, माथे म चंदा, मुख म तेज अपार,
तोर चरण म माथ नवावंव, करँव तोर जयकार।
तोला बंदथौं वोऽऽ तोला सुमरथौं ओऽ
नवदुर्गा दाई तोला बंदथौं ओऽ

ब्रह्मचारिणी तप के मूरत, हाथ म माला-कमंडल,
तोर तप के ओ जोत ले दाई, जगमग होगे अंचल।
चंद्राघंटा बनके दाई, सिंह के ऊपर बिराजे ,
घंटा नाद सुनाके मइया, दुष्टन ल संघारे।
तोला बंदथौं वोऽऽ तोला सुमरथौं ओऽ
नवदुर्गा दाई तोला बंदथौं ओऽ

कूष्मांडा रूप धरके दाई, जग म ज्योति जलाये,
अंधियारा के बीच म मइया, सूरज जस चमकाये।
स्कंदमाता गोदी म धरके, कार्तिक ले खेलाये,
भक्तन ऊपर मया लुटाये, सबके दुख हर जाये।
तोला बंदथौं वोऽऽ तोला सुमरथौं ओऽ
नवदुर्गा दाई तोला बंदथौं ओऽ

कात्यायनी रूप ल धरके, सिंह सवारी भाये,
असुरन के अभिमान मिटाके, धरती ल सुख पहुँचाये।
कालरात्रि रूप म दाई, घोर अंधियारा भागै,
जपत-जपत तोर नाव ल मइया, मोरो मन हरसावै
तोला बंदथौं वोऽऽ तोला सुमरथौं ओऽ
नवदुर्गा दाई तोला बंदथौं ओऽ

महागौरी तैं गौर रूप म, चंदा जइसन चमके,
दया-मया के अमृत बरसा, भक्तन के मन हरसे।
बनके दाई सिद्धिदात्री तैं , सिद्धि-बुद्धि वर दे,
जस तोर गावै अंजू साहू,तोषन रचना गढथे।
तोला बंदथौं वोऽऽ तोला सुमरथौं ओऽ
नवदुर्गा दाई तोला बंदथौं ओऽ

तोषण चुरेन्द्र 'दिनकर'
धनगांव डौंडीलोहारा बालोद छत्तीसगढ़ 9575070689

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय