बुधवार, 26 जून 2024

जुड़वास


तोर गुन ला गावंव ओ ए ओ शीतला दाई
जुड़वास मनावंव ओ ए ओ शीतला दाई
----ए मोर शीतला दाई हो मैया जय हो महामाई
तोर गुन ला गावंव....


पावन महिना अषाढ़ ओ दाई, देव भगत जुरियाये
अंगना दुवारी गोबर लिपाये,चक चंदन चौक पुराये
नर नारी मन तोला परघावत, देव गुड़ी के तीर आये
शीतल रूप तोर शीतला दाई, जय जय कार मनाये
---रहिबे सबके सहाई हो दाई, बिनती हावय महामाई
तै आस पुराये मोर, ए ओ शीतला दाई
तोर गुन ला गावंव....

तोर दुवारी अंगना सुग्घर, तोरन पताका सजाये
चना दार तिली हरदी शक्कर, माता ओ तोला चढ़ाये
हाथ जोड बिनती तोर करथे, चरन मा माथ नवाये
सरधा भगति के थाल सजाके, माता तोला मनाये
----तोसन हाथ लमाये ओ दाई, महिमा जस तोर गाई
तै बिगड़ी बनाये मोर, ए ओ शीतला दाई
तोर गुन ला गावंव....


©®
तोषण चुरेन्द्र 'दिनकर' 
धनगाँव डौंडी लोहारा बालोद छत्तीसगढ़ ४९१७७१
६२६७५३८०३६//९५७५०७०६८९

शनिवार, 22 जून 2024

मोर रंगरसिया




मोर रंगरसिया मोर मनबसिया
कइसे रिसाये बिन बोली बतिया
बंइहा मा आजा रे पिरोहिल दिल मा समाजा रे......

हाय रे मोर दौना रूप सलौना
कइसे खवाये मया मतौना
बंइहा मा आजा रे पिरोहिल दिल मा समाजा रे......

पागा के कलगी ह तोर दिवाना,
मन मा मोर गहरी मतावय
तिरछी नजरिया ह तोर दिवानी,
दिल मा रे छुरी चलावय
मोर मनमोहना मोर दिल जोहना
मँय तोर खुशबू तँय फूल मोंगरा
बंइहा मा आजा रे पिरोहिल दिल मा समाजा रे.......१

बनके कन्हैया मँय तोर ओ राधा,
बन बन बंसरी बजावँव
महूं हावँव तोर प्रेम दीवानी,
आजा तुहिला बलावँव
मन मोर मयूरी चंदा चकोरी 
हे मृगनयनी सूरतिया गोरी
बंइहा मा आजा रे पिरोहिल दिल मा समाजा रे.......२

©®
तोषण चुरेन्द्र 'दिनकर' 
धनगाँव डौंडी लोहारा बालोद छत्तीसगढ़ ४९१७७१
६२६७५३८०३६//९५७५०७०६८९

मंगलवार, 18 जून 2024

चुड़ी पायल


लान देबे रे पिया लान देबे
चुड़ी पायल२ मोर बर गहना
तोर प्यार मा डुबे डुबे रहंव ना
सुबह साम तोला याद करंव ना
ये रे सोना २ मान मोर कहना
जाके लान देहू तोर चुड़ी कंगना
लान दे....

पइसा नइ मिले मोला
चेक मिले हावै गोरी बैंक जाहुं कहंव ना
नइ मानव नइ जानव
तोरे तो आसरा मा मैं कलपत रहंव ना
तोर प्यार मा डुबे डुबे रहंव ना
सुबह साम तोला याद करंव ना
ये रे सोना२ मान मोर कहना
जाके लान देहू तोर चुड़ी कंगना
लान दे....

झट आहूं लान देहू
ना तोला मोर डियर थोड़ा सबर रखो ना
सारा सबर फेंक देहंव
लाने के नी लाने चुड़ी पायल कहों ना
तोर प्यार मा डुबे डुबे रहंव ना
सुबह साम तोला याद करंव ना
ये रे सोना२ मानले मोर कहना
जाके लान देहू तोर चुड़ी कंगना
लान दे....
©®
तोषण चुरेन्द्र 'दिनकर' धनगांव डौंडी लोहारा
बालोद छत्तीसगढ़ 491771 6267538036//9575070689

शनिवार, 15 जून 2024

तोर चेहरा


तोर चेहरा ओ... तोर चेहरा ना...
तोर चेहरा ओ नजरे नजर मा झूलत रहिथे तोर चेहरा
----
तोर चेहरा गा... तोर चेहरा ना...
तोर चेहरा गा नजरे नजर मा झूलत रहिथे तोर चेहरा
------------------------@------------------
रतिहा पहाथौं तारा ल गिन गिन,
निंदिया हा बैरी हो जाथे
का जादू मंतर मार दे हावस,
तोर पाछू दिल आथे
----
ताल तलैया ह घन अमरैया ह,
हांसी ठिठोली उड़ावै
तोर मया के मैं होगेंव दीवानी,
मोर जिवरा छटपटावै
----
तोर चेहरा ओ... तोर चेहरा ना...
तोर चेहरा ओ नजरे नजर मा झूलत रहिथे तोर चेहरा
तोर चेहरा गा... तोर चेहरा ना...
तोर चेहरा गा नजरे नजर मा झूलत रहिथे तोर चेहरा
------------------------@------------------
देख ले नैना ले तहूं ह बइहा,।
भीतरी मा दिल के समाये
मोहनी सुरतिया तोर चंदा चकोरिया,
दिल मा तै बिजली गिराये
---
तोर बिना मैंह रहय सकंव नहीं, 
कहत हंव खाके मैं किरिया
तोर दिवाना हंव मोर दिवानी,
छोडंव नहीं तोला गोरिया
----
तोर चेहरा ओ... तोर चेहरा ना...
तोर चेहरा ओ नजरे नजर मा झूलत रहिथे तोर चेहरा
तोर चेहरा गा... तोर चेहरा ना...
तोर चेहरा गा नजरे नजर मा झूलत रहिथे तोर चेहरा
----------------------- @ ------------------
©®
तोषण चुरेेन्द्र दिनकर 
धनगांव डौंडी लोहारा बालोद छत्तीसगढ़ 6267538036//9575070689

शुक्रवार, 14 जून 2024

जुडवास


आलाप 
तोर अंगना मा रोवत आथे
किरपा ल पाके हांसत जाथे
ममता के छंइहा मा रखबे दाई
तोर चरन मोर जीव जुडाथे

मुखड़ा---

आगे महीना अषाढ़ ओ दाई...
पावन परब जुड़वास के
घन अंधियारी बीतगे ओ दाई...
पुन्नी के चंदा पुनवास के 

अंतरा--
१
तरिया के पारे लीम के छंइहा, गदहा मा आसन लगाये
शीतल रूप तोर शीतला मइय्या, ममता के अचरा ओढ़ाये
गर्मी के जाती बरसा के आती, गांव जुड़वास मनाये
ढोल नंगारा झांझ मंजीरा, तोर अंगना मा सुनाये
--- दया मया बरसादे ओ दाई...
करथंव जोरा चौमास के
आगे महीना अषाढ़ ओ दाई...
पावन परब जुड़वास के

२
चारधाम के तैं सिरजइय्या, सेउक सेवा बजावय
कारी कोयलिया पड़की परेवना, सेवा जस तोर गावय
सात बहिनिया तोर जहुंरिया, संगे मा शोभा बढ़ावय
तीर मा बिराजे ठाकुर देवता,जग ला पोसे पालय
---बाधा बिघन ला टारे ओ दाई...
सगरो भगत के हांस के
आगे महीना अषाढ़ ओ दाई...
पावन परब जुड़वास के

३
कोठी डोली ल सबके भरे तै, ममता के हाथ लमाये
छोट बड़े अउ दीन दुखारी, जेन शरन तोर आये
धन - धन होगे जिनगी ह मइय्या, तोसन दरसन पाये
नर अउ नारी भगत परानी, भाग अपन सँहराये
---चंदन बंदन फूल दसमत हे....
तीरथ बरथ उपवास के
आगे महीना अषाढ़ ओ दाई...
पावन परब जुड़वास के

©®
तोषण चुरेेन्द्र दिनकर 
धनगांव डौंडी लोहारा बालोद छत्तीसगढ़ 9575070689 //6267538036

रविवार, 9 जून 2024

मोर पेप्सी कोला


मोर पेप्सी कोला,,, दिखे के बम के गोला
आना घूमाहूं रानी ओ,,,आना रायपुर तोला


गुपचुप ठेला मा,,, गुपचुप खवाहूं ओ
मल्टी सिनेमा मा,,,फिलिम तोल देखाहूं ओ
-----
मोर कुल्फी चोको,,,थोरिक येती देखो
आना घूमाहूं रानी ओ,,,आना रायपुर तोला


बुढ़वा तालाब के,,, सैर मैं कराहूं ओ
बइठ चौपाटी मा,,,फोटू खिंचवाहूं ओ
------
मोर मुनगा काड़ी,,,नोहे एक लबारी
आना घूमाहूं रानी ओ,,,आना रायपुर तोला


लगे हावे बानी,,,तै मोर तीर आना ओ
तोर दुनों गाबो,,,मया पीरा के गाना ओ
------
काहत हावंव तोला,,,बना राजा मोला
आना घूमाहूं रानी ओ,,,आना रायपुर तोला

©®
तोषण चुरेेन्द्र दिनकर 
धनगांव डौंडी लोहारा बालोद छत्तीसगढ़ 6267538036//9575070689

डीजेवाला

ए डीजेवाला रे ए डीजेवाला रे
गाना बजादे टुरा पान वाला रे
समधीन मोर आये हे बड़ मटमटाये हे
धुन ला लगादे टुरा नागिन वाला रे


खावत हे समधीन मोर बंगला के पान ला
भांटो के बहिनी मोर ले डारिस परान ला
डीजे वाला रे

जींस टाप पहिरे हे धरे हे मोबाइल
छोकरा छोकरा टुरा देख मारे स्टाइल
डीजे वाला रे

 लाली लाली होंठ दिखे पाउडर लगे गाल मा
रूप रंग मा कांही नंइहे आगी लगे चाल मा
डीजे वाला रे

©®
तोषण चुरेेन्द्र दिनकर 
धनगांव डौंडी लोहारा बालोद छत्तीसगढ़ 6267538036

शनिवार, 8 जून 2024

दिल के धड़कन मा


मोर दिल के धड़कन मा तोर चेहरा ल छुपाये हावंव
मोर तन सांसा मा तोर याद ल मैंह बसाये हावंव
---मोला छोड़ के झन तैह जाबे मोर प्यार ला झन तै भुलाबे
तोर प्यार मा मैंह फंदाय हावंव
मोर दिल के....

*१*
का-
जबले तै आये मोर जिनगी मा मोर जिनगी गुलजार होगे
का जादू तै मारे मंतर कइसे तोरले प्यार होगे
की-
भूख प्यास मोला लागे नहीं दिल मा नइहे करार रे
संगी साथी कछु नइ भावय कइसन हे तोर प्यार रे
का-
---मोला पगला झन बनाबे ये दीवाना झन बनाबे
तोर संग मैं सपना सजाय हावंव
मोर दिल के...

*२*
की-
किरिया खावत हंव दगा नइ देवंव करत हावंव इकरार मैं
धरके आबे बैंड बराती झन देख दिन इतवार तै
का-
प्रेम नगर मा मया के कुरिया मिलके दुनों बसाबो 
हो जाये चाहे बइरी जमाना गीत मया के गाबो
की-
---संगी मिलके जिनगी बिताहूं सुख दुःख मा साथ निभाहूं
-बस अतकी आरो लमाय हावंव
मोर दिल के...

©®
तोषण चुरेेन्द्र दिनकर धनगांव डौंडी लोहारा 
बालोद छत्तीसगढ़ 6267538036

मंगलवार, 4 जून 2024

तोर सुरता

आथे गोरी... तोर सुरता ओ
नैना ले आंसू... बरसे ना
नजरे नजर...झूले चेहरा तोर
देखे बर दिल...ये तड़पे ना
-कइसे भुलाये तै कहां रे लुकाये तै
तोर बिना दिल ये तरसे ना...

मृगनयनी मोला सपना देखाके
मृगतृष्णा ल बढ़ाये तै
मोर जिनगी के पुन्नी के चंदा
कते अमावस म लुकाये तै
-दिल ल जलाये तै दरद बढ़ाये तै
तोर बिना दिल ये तरसे ना...

ताना मारे जुड़ पुरवइया 
सर सर अचरा डोलावै रे
तोर सुरता मा रतिहा दीवाना 
बैरी निंदिया नइ आवै रे
-मोला कछु भाय नइ सुध तोर जाय नइ
तोर बिना दिल...ये तड़पे ना

आजा लहुटके प्रेम दीवानी 
मन भंवरा ह बलाये रे
प्रेम नगरिया तोर बिन सुन्ना
गीत मया के कोन गाये रे
-बांधले तैह गोरी मोर पीरीत के डोरी
तोर बिना दिल...ये तड़पे ना


तोषण चुरेेन्द्र दिनकर 
धनगांव डौंडी लोहारा बालोद छत्तीसगढ़ 6267538036

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय