चैत कुंवार के महिना ओ दाई ओ हो.. हो हो... हो हो......
बोलथे पडकी मैना ओ दाई मेला भरावय मइया
सोन के थारी मा करौं आरती लागत हौं तोर पंइया
चिरइ चिरगुन पडकी परेवना तोरेच गुन ला गावय
चंदा सूरूज हा संझा बिहनिया आके मांथ नवावय
तोर दुवारी फूल फूलवारी महरे महर ममहावय
कारी कोयलिया तान ले अपन मीठ बोली ला सुनावय
सात सुर सरगम तोला सुहावय ओ हो.. हो हो... हो हो......
मोहनी सुरतिया बड मन भावय चोला जुडावय मइया
सोन के थारी मा करौं आरती लागत हौं तोर पंइया....1
छम छम छम छम पांव के पैरी दाई बजावत तै आबे
लाल लंगुरवा भैरो बाबा संग सातो बहिनिया ल लाबे
मांदर के ताल मा अंगना तोर दाई लइका बरोबर खेलाबे
छोटे छोटे तोर लइका अन मइया दया मया बगराबे
मंदिर देवाला मा ध्वजा लहरावय ओ हो.. हो हो... हो हो.......
झांझ मंजीरा नंगारा सुनावय फूल बरसावय मइया
सोन के थारी मा करौं आरती लागत हौं तोर पंइया.....2
तोर दरस बर नैना तरसगे देख ले तीर मा तै आके
आरो ला लेले अपन लइका के दाई ओ छाती लगाके
देख थे रस्ता सगरो जगत हा दाई तोर अंगना सजाके
करय गोहारी तोर दुवारी हाथ ला दुनों लमाके
तोषन चुरगंइया तोर महिमा ल गावय ओ हो.. हो हो... हो हो....
जय हो तोर जयकारा लगावय भाग जगावय मइया
सोन के थारी मा करौं आरती लागत हौं तोर पंइया.....3
तोषण चुरेन्द्र दिनकर धनगांव डौंडी लोहारा बालोद छ.ग.
6267538036/9575070689