गुरुवार, 26 अक्टूबर 2023

मिले हे मौका

मिले हे मउका भजन करले
मिले हे मउका भजन करले,
तरजाही जिनगानी गा भइया,जतन करले

माटी के काया माटी मा मिल जाय
पाके मानुस तन चोला गा भइया,तैह राम नइ तो गाय
ये मोर भइया तै कथा सुनइया लबारी नोहे ना
तरजाही जिनगानी गा भैय्या जतन करले ना

हीरा कस काया तैं कोईला झन बना
चारदिनिया जिनगानी ओ दीदी,तैंह राम गुन गा
ये मोर भइया तै कथा सुनइया लबारी नोहे ना
तरजाही जिनगानी गा भैय्या जतन करले ना

धन डोगानी तोर संग नंइ तो जाय
सतसंग ल तै छोडके मया म हे भुलाय
ये मोर भइया तै कथा सुनइया लबारी नोहे ना
तरजाही जिनगानी गा भैय्या जतन करले ना

राजा अउ रंक भिखारी धनवान
सबला चीन्हे पहिचाने ओ दीदी हे राम भगवान 
ये मोर भइया तै कथा सुनइया लबारी नोहे ना
तरजाही जिनगानी गा भैय्या जतन करले ना

तोषण चुरेन्द्र दिनकर
 धनगांव डौंडीलोहारा
 बालोद छत्तीसगढ़

बुधवार, 25 अक्टूबर 2023

राजा जी

दुरिहा हम तोहसे अब न रहिबो राजा जी
अंगना मा डोली कब ले अइहो राजा जी

सहे न जाइ राजा घड़ी इंतजार के
रखिले हमरा छंइया बईंहा मा पोटार के
चढ़ल जवानी  हमरा बड़ा गुदगुदावय
सारी सारी रतिहा तोर सपना सतावय
मिलके मन बतिया हम बतईबो राजा जी 
अंगना मा डोली कब ले अइहो राजा जी

कोयलिया मारे ताना जियरा जरावय
हमरो करेजा राजा बड़ा छटपटावय
सहल न जाई छईंया तोहसे जुदाई
कब तू ओढ़ईबे राजा प्यार के  रजाई
सरगवा सैर कब करई हो राजा जी
अंगना मा डोली कब ले अइहो राजा जी

गोरिया देहिंया मा आजा हरदी रचादे
मांग सेंन्दुरिया बलमा हमरा सजादे
दिल के रानी राजा हमरा बनादे
प्यार वाला घरवा तू दिल बसादे
दुख पीरा जिनगी संगे सहिबो राजा जी
अंगना मा डोली कब ले अइहो राजा जी

गीतकार 
तोषण चुरेन्द्र दिनकर
धनगांव डौंडीलोहारा 
बालोद छत्तीसगढ़

मैं कहीं...

मैं कहीं...

तेरी ज़ुल्फों की छांव में खो न जाऊं मैं कहीं।
दिल धड़कन तू सांस है जी न पाऊं मैं कहीं।

आंखें तेरी झील समंदर प्यार छुपा गहरा इनमें,
डुबकर तेरे इश्क़ में फना हो जाऊं मैं कहीं ।

बलखाती तू इस तरह जैसे हो पुरवा पवन,
सात सुरों की रागिनी बन न जाऊं मैं कहीं ।

मौजे उठती आरजू की एक तेरा दीदार हो,
रूसवा तुझे यूं देखते न हो जाऊं मैं कहीं।

हैं हजारों बंदिशें शहर-ए-मोहब्बत ऐ 'तोषण',
रहेगा मुझको गम सदा मिल न पाऊं मैं कहीं।

रचना
तोषण चुरेन्द्र दिनकर 
धनगांव डौंडीलोहारा बालोद छत्तीसगढ़ ९५७५०७०६८९

मंगलवार, 24 अक्टूबर 2023

दशहरा

जय जय होवय राम लखन के,रावन मार गिराये
देवता धामी नर अउ नारी,जय जय कार लगाये

दाई ददा के बात ल माने,राम ह बन मा जाये
संग मा हावय सीता मैय्या,भाई लखन हे सहाये 
पंचवबटी मा कुटिया बनाके,जिनगी ला रहे बिताये 
राम लखन हे मिरगा के पाछू,सीता ला रावन चोराये
बन बन खोजे राम लखन हा,हाँक गोहार लगाये
जय जय होवय राम लखन के,रावन मार गिराये

राम दरस के आस मा शबरी,रददा मा नैना बिछाये
आनी बानी फूल फूलवरिया,घर अंगना ला सजाये
दरसन पाये राम के शबरी,नवधा भक्ति ल पाये
राम शरन मा मुकति मिलगे,अचल अमर पद पाये
रूख राई संग डोंगरी पहाड़ी,सबला आरो लमाये
जय जय होवय राम लखन के ,रावन मार गिराये

राम सुग्रीव के होगे मितानी,बाली के प्रान उबारे
दिन चौमासा बीतन लागे,सियाखोज करे तियारे
नल नील अंगद बेंदरा भलवा,मनमन करे बिचारे
माता के पता लगाये खातिर,हनुमत पवन दुलारे
जयकारा संग बजरंग बाला,पार समुद्दर जाये
जय जय होवय राम लखन के ,रावन मार गिराये

पहुंचे लंका हनुमत लाला,सीता के पता लगाये
राम के मुंदरी देके लाला,चुड़ामनी लहुटाये
आरो ल पाके राम लखन ह,रामके सेतु बनाये
बेंदरा भलवा बानर सेना,लंका मा डेरा जमाये।
शांति दूत बर अंगद ला,राम हा लगे पठाये
जय जय होवय राम लखन के,रावन मार गिराये

माते लड़ाई राम रावन के,दानव उरकन लागे
कुंभकरन अउ मेघनाथ ह,भुंइया मा पटियागे
महिना कुंवारे नवदिन रतिहा,दुर्गा ल राम मनाये
दसमी तिथि भगवन रामा,रावन मार गिराये
बरसे फूल आगास ले भरभर,तोसन जस गोहराये
जय जय होवय राम लखन के,रावन मार गिराये

रचनाकार 
तोषण चुरेन्द्र दिनकर 
धनगांव डौंडीलोहारा बालोद छत्तीसगढ़ 
9575070689 // 6267538036

सोमवार, 23 अक्टूबर 2023

चलो दीया जलाबोन ओ बहिनी

चलव दीया जलाबोन ओ बहिनी,भाग जाही कारी अंधियार
रिगबिग-रिगबिग दीया जलत हे, झिलमिल-झिलमिल अंगना करत हे 
आगे-आगे देवारी तिहार ओ दीदी छागे हे खुसी अपार

लीपेन पोतेन अंगना दुवरिया,लछमी दाई के अगोरा मा
धनतेरस के तेरा दीया ला,राखे हावन चंगोरा मा
नरक चउदसी यमराजा के,देखे अंजोरी मन हरसत हे
आगे-आगे देवारी तिहार ओ दीदी छागे हे खुसी अपार
चलो दीया जलाबोन ओ बहिनी,भाग जाही कारी अंधियार

कारी अमावस के लछमी पूजा,माई मया बरसावय
किसन कन्हैया छीनी अंगूल ले,गोवरधन हे उठावय
भाई बहिनी के मया जोरत हे,भाईदूज के जोरा करत हे
आगे-आगे देवारी तिहार ओ दीदी छागे हे खुसी अपार
चलो दीया जलाबोन ओ बहिनी,भाग जाही कारी अंधियार

सुमता के दीया जलावव गा संगी,भेदी के दहरा ला पाटव
मया के डोरी हा झन टूटय जी,सुख दुख के रोटी ला बांटव
टिकली छूरछूरी ह टोर करत हे,तोसन चुरगंइय्या शोर करत हे
आगे-आगे देवारी तिहार ओ दीदी छागे हे खुसी अपार
चलो दीया जलाबोन  ओ बहिनी,भाग जाही कारी अंधियार

गीतकार 
तोषण चुरेन्द्र दिनकर  9575070689
ग्राम धनगांव डौंडीलोहारा बालोद छत्तीसगढ़ 

सोमवार, 16 अक्टूबर 2023

मोला गोदी मा खेलाले

मोला गोदी मा खेलाले ओ दाई,मोला लइका बनाले ना
ममता के अछरा ओढ़ार के,छाती ले अपन पोटार के
मोला रसता रेंगादे ओ दाई,मोला लइका बनाले ना
मइय्या ओ...मइय्या ओ...मइय्या ओ...मइय्या ओ... 

बालक मैं बलकंइय्या ओ दाई,तहीं हावस महतारी
भाव भजन ला कुछु नइ जानंव,आएंव तोर दुवारी
बघवा मा बइठे हे महामाई,जोत बरन रूप दमके
चंदा सुरूज दुनों नैना ओ दाई,नवदिन रतिहा चमके
मोरो बिगड़ी बनादे ओ दाई मोला लइका बनाले ना......
मइय्या ओ...मइय्या ओ...मइय्या ओ...मइय्या ओ... 


चारो मुड़ा चारो कोती ओ दाई,कन-कन तैहा बिराजे
बगुलामुखी बमलाई मइय्या,डोंगरी पहाड़ी साजे
कइसे चढ़हूँ उड़नखटोला,मैं बालक अज्ञानी
रोवत आथे हाँसत जाथे,तोर शरन मा परानी
मोरो भाग जगादे ओ दाई मोला लइका बनाले ना....
मइय्या ओ...मइय्या ओ...मइय्या ओ...मइय्या ओ... 

नवरूप तोर नवदुर्गा मइय्या,शक्ति के हस अवतारी
काली चंडी हे आदि भवानी,भजे शंभू त्रिपुरारी 
जोहर ललना तोसन दिनकर,घेरी बेरी माथ नँवाये
बालक बरूवा हाथ जोंड़के,तोर जस ला गोहराये
मोला संग लगाले ओ दाई मोला लइका बनाले ना 
मइय्या ओ...मइय्या ओ...मइय्या ओ...मइय्या ओ... 

गीतकार 
तोषण चुरेन्द्र दिनकर 
धनगांव डौंडीलोहारा बालोद छत्तीसगढ़
कापीराईट्स सर्वाधिकार सुरक्षित है ।

शनिवार, 14 अक्टूबर 2023

झुपत आबे मोर गाँव मा


दाई ओ... माई ओ...झुपत आबे मोर गांव मा
सातो बहिनिया लाबे , संग मा लंगुरवा लाबे
जोहत रईहँव लीम छाँव मा२

नैना बिछाये हावौं जोत जलाके
आबे मोर अंगना दाई तैहा सोरियाके 
खीर सोंहारीक दाई राँधे हँव कलेवा
भक्ति पूजा नइतो जानों नइ जानों सेवा
आके तै जेंवन पाले,
अंगना मा गोड़ मढ़ाले
जोहत रईहँव लीम छाँव मा२

लाली ओ सिंगार दाई तोर बर लाएँव
टिकली फूंदरी लुगरा चुरी मैंहा बिसाएँव
जोत जंवारा मइय्या तोर सिरजाएँव
नव करसा मा दाई तोला बइठाएँव
दया मया बरसादे ,  
शक्ति तै भाग जगादे
जोहत रईहँव लीम छाँव मा२

चइत कुँवार के महिना रिगबिग लागे
सगरो भगत के भाग हा जागे
चुर गंईया ललना माथ नँवाये
जनम-जनम के दुख बिसराये
तोषन तोर जस ला गाये ,
धन–धन जिनगी गोहराये
जोहत रईहँव लीम छाँव मा२

गीतकार 
तोषण चुरेन्द्र दिनकर 
धनगांव डौंडी लोहारा बालोद छत्तीसगढ़
9575070689/6267538036
कापीराईट्स सर्वाधिकार सुरक्षित है ।

रविवार, 8 अक्टूबर 2023

कल कल करत आवय भुवना

ई पत्रिका बर मोरो डाहर ले एकठन रचना सादर पठोवत हँव

शीर्षक - कल कल करत आवय भुवना

कल कल करत आवय भुवना
मोर काली माई कल कल करत आवय भुवना 
रनचंडी दाई लक लक करत हावय अंगना

देवता दानव करय लड़ाई,धरती थरथर लागे
दीन दुखिया के रक्षा खातिर,नवदुर्गा रूप आगे
पलछिन पलछिन दानव उपजे,देवता गदबिद भागे
मुड़ी ल कांटे लहू ल पिये,कालरूप काली आगे
काली के नइ होवय रूकना
मोर काली माई कल कल करत आवय भुवना 
रनचंडी दाई लक लक करत हावय अंगना

कालरातरी रूप म दाई,दिखय बिरबिट कारी
रकतबीज ल मार गिराये,भव भय भंजनहारी
रटपिट रटपिट काली दउड़े,देवता करे बिचारी
रनचंडी ल शांत करे बर,शरन पड़े त्रिपुरारी
दाई पड़गे अब तो गुनना
मोर काली माई कल कल करत आवय भुवना 
रनचंडी दाई लक लक करत हावय अंगना

पइंया लागँव माथ नवावंव,दाई चरन पकड़ के
नइहे दाई जग म कोनों,अउ तोरेच ले बड़के
तोर चरित हे अगम अपारा,पार कोनों नइ पावय 
जोहर ललना तोसन दिनकर,महिमा जस गोहरावय
बिनती ल सबके तँयह सुनना
मोर काली माई कल कल करत आवय भुवना 
रनचंडी दाई लक लक करत हावय अंगना

गीतकार 
तोषण चुरेन्द्र दिनकर 
धनगांव डौंडीलोहारा 
बालोद छत्तीसगढ़

रविवार, 1 अक्टूबर 2023

बमलेश्वरी दाई ओ

बमलेश्वरी दाई ओ..........मैय्या, सऊंहे बिराजे तै पहाड़ मा
चैत कुमार मा मेला भराये, सगरो भगत मन तोर तीर आये
डोंगरगढ़हींन तोर दुवार मा


तोर दसरन पाये के खातिर,भगत ह दौड़त आथे
कोन्हों चढथे उड़नखटोला,आके माथ नँवाथे
भरदे शक्ति मन में भक्ति,सरधा के फूल चढ़ाके
सिंदुर बरन तोर रूप ओ दाई,सबके मन ला भाथे
रोवत आये हाँसत जाये,मनके मनौती सबके पुराये
डोंगरगढ़हींन तोर दुवार मा 
बमलेश्वरी दाई ओ............

बगुलामुखी बमलेश्वरी दाई,बिमलेश्वरी कहाये
संझा बिहनिया करँव आरती,ढोल नँगारा सुहाये
जोत जँवारा रिगबिग जोती,जगमग नवदिन राती
गुन ला गावँव सेवा बजावँव,तोर डेहरी आती जाती
तोर महिमा ला बरनी न जाये,पार ओ दाई कोनों नइ पाये
डोंगरगढ़हींन तोर दुवार मा 
बमलेश्वरी दाई ओ..........

धन धन होगे जिनगी मोरे,तोर दरस ला  पाके
दया मया बरसाबे मैय्या,अरजी करँव सोरियाके
भैरो हनुमत तोर रखवारे,डेहरी म चुुटकी बजाये
जोहर ललना तोसन मिलके,जस ला तोर सुनाये
बालक बरुवा हे गोहराये,तोर शरन तीर ध्यान लगाये
डोंगरगढ़हींन तोर दुवार मा 
बमलेश्वरी दाई ओ..........

तोषण चुरेन्द्र दिनकर धनगांव 
डौंडीलोहारा बालोद छत्तीसगढ़
9575070689 // 6267538036

तै कहां लुकाये ओ

तैह कहां लुकाये ओऽ, पुन्नी के चंदा 
जग अंधियारी मोर बनाये ना
तै कइसे भुलाये ओऽ, मोर मन के मितवा
मारे लबारी मोला सताये ना

संगी जहुंरिया मारे, ताना बइरी होगे जमाना
सुध बुध मोला राहय नहीं, का करों तही बताना
मोला नींद नइ आवय ओऽ,मोर मन के भौंरा
जग अंधियारी मोर बनाये ना....

नदिया नरवा डोंगरी पहाड़ी,देख मोला इतरावय
चिरई चिरगुन कारी कोयलिया,बोले नइ बतरावय
तै आस जगाये ओऽ,मोर दिल के जोगनी 
मारे लबारी मोला सताये ना

मया के बंधना टोरे काबर,मया के मड़वा सजाके
करे अंजोर तै पर अंगना,मोर घर आगी लगाके
मोला कोईला बनाये ओऽ,तै चमकते हीरा
जग अंधियारी मोर बनाये ना
तै कइसे भुलाये ओऽ, मोर मन के मितवा
मारे लबारी मोला सताये ना

गीतकार 
तोषण चुरेन्द्र दिनकर धनगांव 
डौंडी लोहारा बालोद छत्तीसगढ़
9575070689 // 6267538036

आजा आजा भवानी

आजा आजा भवानी आजा,मोर अंगना मा तै आजा
छोटे छोटे तोर लइका ओ दाई,भाग तै सबके जगा जा
आजा आजा....

सरधा के मैं फूल चढ़ाएंव,भगति के दीया बाती
नवकरसा नवरूप हे राजे,जगमग नवदिन राती
दरस दिखादे हे माहामाई,बिगड़ी सबके बना जा
आजा आजा....

लाली लाली तोर साज सिंगारे,चंदा बरन रूप दमके
बघवा सवारी सेऊक लंगुरवा,सूरूज बरोबर चमके
शैलपुत्री  हे काली माई,नैना तरस गे आजा
आजा आजा....

पापी ल मारे धर्मी उबारे,महूं पड़े हँव शरन मा
आशीष तैंह देबे ओ दाई,जिनगी बीते भजन मा
अरजी तोसन के सुन समलाई,दया मया बरसा जा
आजा आजा....

गीतकार 
तोषण चुरेन्द्र दिनकर धनगांव 
डौंडी लोहारा बालोद छत्तीसगढ़ 
मोबाइल 9575070689

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय