मंगलवार, 12 अप्रैल 2022

गौमाता कल्हर कल्हर के रोवत हे

गौमाता कल्हर कल्हर के रोवत हे

देखना तोर बनाय कन्हैया
कलजुग मा का होवत हे
धरती दाई गऊ रूप धरके 
कल्हर कल्हर रोवत हे

द्वापर मा दूध दही ला खाये
बन बन घुमके धेनु चराये
तोर मया के बिधुन मा गइय्या
दिन रात हे रम्भाये
अब तो कोनों पुछइय्या नंइहे
मनके मन सब संवत हे
धरती दाई गऊ रूप धरके 
कल्हर कल्हर रोवत हे


पबरित करेबर गोबर नंइहे
पूजा बर दूध अउ घींव हो
खोजे मा गौमूत्र नंइ मिले
कइसे जीयय जग जीव हो
गौपालन संस्कार ला देखौ
जन जन हा सब खोवत हे
धरती दाई गऊ रूप धरके 
कल्हर कल्हर रोवत हे

गाय ह सब कुछ दान करथे
कुछु नंइ मांगय जतन बर
पैरा भूसा ल खाके रहिथे
जीनगे ल जीथे हमर बर
अब तो जागन हम संगवारी
अतरी शोर पुरोवत हे
धरती दाई गऊ रूप धरके 
कल्हर कल्हर रोवत हे

कत्लखाना म जाय बर रोकौ
बात ल तुमन मानव 
गौ के तन म देवता धामी
तीरथ धाम गा जानव
कल्पवृक्ष हे गौमाता हर
सबके आस पुरोवत हे
धरती दाई गऊ रूप धरके 
कल्हर कल्हर रोवत हे

सेवा करन गौमाता के
रक्षा करन सब मिलके
करले सेवा खाले मेवा
तन हा रही तोर खिलके
हमर मनके अतरी कहना
दया मया ला जुड़ोवत हे
धरती दाई गऊ रूप धरके 
कल्हर कल्हर रोवत हे

तोषण चुरेंद्र दिनकर
धनगांव डौंडीलोहारा
बालोद छत्तीसगढ





बुधवार, 6 अप्रैल 2022

दाई तोर दरसन के आसर

दाई तोर दरसन के आसर 
दरस देबे माता पारत हँव मँय हा गोहार
भाव भगति ल कुछु नँइ जानव
कइसे के करँव पूजा पाठ
दरस देबे माता पारत हँव मँय हा गोहार

टिकली फूंदरी खिनवा चूरी
कहाँ ले मँय हा बिसावँव
श्रद्धा भगति के फूल हो दाई
तोर चरन मा चढ़ावँव
कइसे के करँव हो सिंगार
दरस देबे माता पारत हँव मँय हा गोहार


डोंगरी ऊपर बइठे वो दाई 
आसन सरग बरोबर
मँय बलकँइय्या कइसे आहूँ
दुख पीरा हे दूब्बर
जिनगी के करदे बेड़ा पार
दरस देबे माता पारत हँव मँय हा गोहार

तोर दसर बर आये भगत मन
मन के आस पूराथे
रोवत आथे तोर डेहरी मा दाई
हाँसत गावत सब जाथे
मया पीरीत के बरसा करबे
करँव सदा उपकार
दरस देबे माता पारत हँव मँय हा गोहार
©®
रचना
तोषण चुरेंद्र दिनकर
धनगांव डौंडीलोहारा
बालोद छत्तीसगढ़

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय