मंगलवार, 29 जुलाई 2025

नयना ले का जादू डारे


*आज डाक्टर साहब ल सुन के लावणी छन्द मा कोशिश* 

*नयना ले का जादू डारे*

नयना ले का जादू डारे,काबर दिल मा मया करे।
घायल होगे तन हा मोरे, धुकुर धुुकुर मन जिया करे।।

तड़पँव तोर अगोरा करके, थोरिक आरो मोरो ले।
करथँव पीरीत मया गउकिन, छूटय बोली तोरो ले।।
काबर तैं नइ समझस बैरी,रुकबुक मोरो हिया करे।
घायल होगे तन हा मोरो, धुकुर धुुकुर मन जिया करे।।

आथे सुरता बड़ रोवाथे, काबर अतिक सताथस तैं।
बन भँवरा मैं किंजरत रहिथौं,चंपा कस मुसकाथस तैं।।
जब अध रतिहा तब मैं जागँव ,छुन छुनुक पायलिया करे।
घायल होगे तन हा मोरे, धुकुर-धुुकुर मन जिया करे।।

आजा अब तैं मोर दुवारी,बगिया मोर महक जाही।
रात रही देवारी संगी,दिनमान संग होरी आही।।
छोड़ अधूरा जिनगी मोरे,काबर तैं पर पिया धरे।
घायल होगे तन हा मोरे, धुकुर धुुकुर मन जिया करे।।


तोषण चुरेन्द्र "दिनकर" 
धनगाँव डौंडी लोहारा 
बालोद छत्तीसगढ़

सोमवार, 28 जुलाई 2025

हवय हरेली गढ़ तिहार


*हवय हरेली गढ़ तिहार*

हवय हरेली गढ़ तिहार।
पानी बादर करय मार।
हरियर डारा खेत खार।
नदिया नरवा बहे धार।

सावन महिना झोर-झोर।
करय पवन हे जोर-शोर।
नोनी  के  फूगड़ी  खेल।
बाबू    गेड़ी   रेल   पेल।

नाँगर बइला खेत खार।
आगी   पानी हूम  डार।
खनखन घाँघर साज बाज।
हमर   छत्तीस गढी   राज।

झुलवा  सुन्ना   लीम  डार।
नवकैना गिन  दिखय चार।
बिसरय   संगी  हे  लुकाय।
खोजत खोजत दिन पहाय।

पेड़  लगाले  मिलय छाँव।
हरियर दिखही हमर गाँव।
हारे  झिन  गा  थके पाँव।
सरग  बरोबर सबो  ठाँव।


तोषण चुरेन्द्र "दिनकर" 
धनगाँव डौंडी लोहारा

गुरुवार, 24 जुलाई 2025

जग हरेली


*जग हरेली गीतिका छंद मा कोशिश*

आज हावय जग हरेली,मात गेहे खार गा।
खोंच दशमुर के चले हे,द्वार लिमवा डार गा।।
साज गेड़ी आज लइका,घूम झूमे गाँव मा।
रूख राई झूमरे मन,थोर पीपर छाँव मा।।

दौड़ बइला देख के मन,वाह वाही गात हे।
घेंच घाँटी मेछरावै, जोर के इतरात हे।।
फूगड़ी के खेल खेले,खोर नोनी हाँस के।
जाँच होथे साँच मा अब,हे परीछा साँस के।।

मान बाढ़ै शान बाढ़ै, मोर धरती मात हे।
जोन कोती देख तैंहर,डोंगरी घन छात हे।
अब लगाले एक ठन गा,रूख दाई नाँव के।
कोन तरसे अब इहाँ, हाथ ममता छाँव के।।


तोषण चुरेन्द्र "दिनकर" 
धनगाँव डौंडी लोहारा

सोमवार, 21 जुलाई 2025

मोर मया के डोरी


मोर मया के डोरी ओ गोरी,
बांधे रहिबे अचरा के छोर मा
झूलत रहिथे गा राजा,
चेहरा आंखी आंखी के कोर मा

हिरनी जइसे रेंगना हे तोरे, 
कोयली जइसे बोली ओ
चंदा जस तोर चेहरा लागे,
हांसी तोर ठिठोली ओ
मन मोर गोता खाये, 
मया के हिलोर मा...

रेंगव तोर मैं छंइहा बनके,
ये वो गोरी तोर साथ मैं
छोड़ कभू झन जाबे ओ गोरी,
हाथ ले मोर हाथ तैं
तन हा फंदाये हावै,
पतंग जैसे डोर मा...

दिल ह तोर दिवाना बही हो,
मोर का कसूर हे
मया के हावय बरसे बदरा,
नाचत मन मंँजूर हे
तोर मया केे झूलवा मा,
झूलँव अंगना खोर मा...

तोषण चुरेन्द्र 'दिनकर'

आवन हम हलबी हलबा


खांध मा नांगर हाथ तुतारी होऽऽऽ बइला हमर संगवारी हे
आवन जी हम सब हलबी हलबा दंतासिरी महतारी हे
दंतासिरी जय हो दंतासिरी 
हलबा शक्ति जय हो हलबा शक्ति 

परलकोट के पावन भुंइया मा,पुरखा हमर सकलाइन हे
शक्ति दिवस ल मनाबोंन कहिके,छब्बीस दिसंबर बताइन हे
--सुमत के डोरी बंधागे गा संगी होऽऽऽ एक्के ठन अंगना दुवारी हे
आवन जी हम सब हलबी हलबा, दंतासिरी महतारी हे
दंतासिरी जय हो दंतासिरी 
हलबा शक्ति जय हो हलबा शक्ति

दंतासिरी के शरन मा आके, जय जयकार मनावत हँन
दीया जलाके नवकरसा मा,नवा अँजोर बगरावत हँन
--किसम किसम के फूल फूले हे होऽऽऽ महके महर फूलवारी हे
आवन जी हम सब हलबी हलबा, दंतासिरी महतारी हे
दंतासिरी जय हो दंतासिरी 
हलबा शक्ति जय हो हलबा शक्ति 

हम आदिवासी मूल निवासी, हलबा हमर पहिचान हे
जल जंगल अउ जमीन के खातिर,एक तीर एक कमान हे
--गैंदसिंह नायक पुरखा हमर हे होऽऽऽ जानत जगत ये सारी हे
आवन जी हम सब हलबी हलबा, दंतासिरी महतारी हे
दंतासिरी जय हो दंतासिरी 
हलबा शक्ति जय हो हलबा शक्ति 

तोषण चुरेन्द्र 'दिनकर' 
धनगाँव डौंडी लोहारा बालोद छत्तीसगढ़

शनिवार, 5 जुलाई 2025

बघवा म होके सवार

*बघवा म होके सवार*

बघवा म होके सवार ओ
जग जननी मैया आ जबे हमरो दुवार 
जग जननी मैया आ जबे हमरो दुवार 
___आरती सजाएंव धूप कपूर के ,केकती केंवरा फूल दसमूर के
गजमोतियन के हे हार ओ 
जग जननी मैया आ जबे हमरो दुवार

जगमग जगमग नौ दिन रतिहा, चैत कुंवार के बेरा
सरग बरोबर लगत हे दाई,डीही डोंगर तोर डेरा
देव मनुज तोर आरती गावै,शरन मा माथ नंवाके
रोवत जे आवै हांसत वो जावै,आसीस के गठरी पाके
___ढोल नंगारा दन दन बाजे, साथ लगुरवा छमछम नाचे
चारो कोती गुंजे जयकार हो
जग जननी मैया आ जबे हमरो दुवार

जोत जंवारा रिगबिग रिगबिग, सजे हवय फूलवारी
आसन लगायेंन पाठ पिढ़ुलिया, दरसन दे महतारी
तोर देवाला तोर मंदिर मा, लाल ध्वजा लहराये
संझा बिहनिया चंदा सूरूज ह,घेरी बेरी सेवा बजाये
___चले पुरवइया तोर दुवरिया,झूमै नाचय सात बहिनिया 
करके हो सोलहो सिंगार ओ
जग जननी मैया आ जबे हमरो दुवार

आस पुरादे भाग जगादे, हवय तोर ले ओ नाता
राख ले हम ला ममता के अछरा, दाई मोर शीतला माता
अरजी करत हे जोहर तोसन, हाथ अपन हे पसारे
सबके बनौती बनादे ओ दाई, बइठे हंव तोर दुवारे
___धन धन होगे मोर जिनगी ह, सुनले दाई मोर बिनती ल
पारत हावौं महू ह गोहार ओ
जग जननी मैया आ जबे हमरो दुवार 

तोषण चुरेन्द्र 'दिनकर'
धनगाँव डौंडी लोहारा बालोद छत्तीसगढ़ 9575070689 // 6267538036 

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय