रविवार, 28 सितंबर 2025

ददरिया


*ददरिया*

पीपर के रूख ले गिरेला पीकरी
तोर चेहरा ल लुकाये हावंव गा करेजा भीतरी गा मोर मयारू मोहना , मोर मयारू मोहना गा
मोर कारी करौंदा मोर मन के मिलौना जोहत रहिहौं तोला ना रे दोस।

सावन के साँवा भादो के कांशी ओ
मोर मन ल लुभावै रानी तोर मुच मुच हांसी ओ , मोर मयारू मोहनी , मोर मयारू मोहनी गा
मोर कारी करौंदा मोर मन के मिलौना जोहत रहिहौं तोला ना रे दोस।

आमा के रूख म बोल थे मैना गा
चार दिन के अवइय्या जँवारा लगाये महिना गा मोर मयारू मोहना , मोर मयारू मोहना गा
मोर कारी करौंदा मोर मन के मिलौना जोहत रहिहौं तोला ना रे दोस।

संझा के बेरिया ओईले ला बरदी
जादा चिंता झन करबे मयारू रंगाबो हरदी ओ , मोर मयारू मोहनी , मोर मयारू मोहनी ओ
मोर कारी करौंदा मोर मन के मिलौना जोहत रहिहौं तोला ना रे दोस।

नवा रे लुगरा किनारी गंथना
जुग जुग झन टूटे रे संगी मया के बंधना गा , 
मोर मयारू मोहना , मोर मयारू मोहना गा
मोर कारी करौंदा मोर मन के मिलौना जोहत रहिहौं तोला ना रे दोस।

मया के अंगना मया के कुरिया
छूट जाये ये जमाना ओ बही झन होबे दुरिहा ओ , मोर मयारू मोहनी , मोर मयारू मोहनी गा
मोर कारी करौंदा मोर मन के मिलौना जोहत रहिहौं तोला ना रे दोस।


रचनाकार 
तोषण चुरेन्द्र "दिनकर" 
धनगाँव डौंडी लोहारा 
बालोद छत्तीसगढ़

शनिवार, 27 सितंबर 2025

जल्दी तँय आबे ओ


जग मोहनी नव दुर्गा दाई, झन तैं भुलाऽबे ओ
अबके जवइया हे महामाई, जल्दी तैं आबे ओ

तोर देवाला तोर मंदिर मा,बाजत रिहिस झांझ ताल ओ
जावत ओ तोला देख के दाई, कइसे होगे हावय हाल ओ 
एक्कीस बहिनिया रोवत हावय,भैरव लंगुरवा लाल ओ
ब्रम्हा रोवत हे बिसनु रोवत हे, रोवत संउहे महाकाल ओ
आरो ल सुन के अपन भगत के,हाथ लमाबे ओ
अबके जवइया हे महामाई, जल्दी तैं आबे ओ

जोत जँवारा फूल फूलवरिया,सुन्ना होगे रखवार ओ
नवदिन रतिहा सेवा बजाइन,अतरी काबर दिन बार ओ
ममता बढ़ाये ओलीम बिठाये,दिये हस मया दुलार ओ
अइसन काबर हम ला छोड़त हस, काबर दिये बिसार ओ
रोवत हँव दाई तोर सरन मा, अउ सोरियाबे ओ
अबके जवइया हे महामाई, जल्दी तैं आबे ओ

ढरर ढरर ढर आंखी ह बरसे, दाई जाए के बेरा मा
झन रितयाबे बघवा मा आबे, दाई इही मोर डेरा मा
झन पथरावय मोर आंखी हा, रस्ता देखे के फेरा मा
साज सिंगारी खीर सोंहारी, राखे रहूँ मँय पठेरा मा
जोहर ललना तोसन कहत हे,भाग जगाबे ओ
अबके जवइया हे महामाई जल्दी तैं आबे ओ।

रचनाकार 
तोषण चुरेन्द्र "दिनकर" 
धनगाँव डौंडी लोहारा बालोद छत्तीसगढ़ 9575070689

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय