रविवार, 29 सितंबर 2024

सुमर सुमर के

सुमर सुमर के हो मैया तोला मनावंव ओ
आऽ जबे हमरो दुवार ए मैया मोर आऽ जबे हमरो दुवार

पहिली मैं सुमरंव मैया सरसती माता ओ
दूजे मा गन पति बुद्धि के दाता हो
तीजे मैं सुमरंव मैया माता पिता ल ओ
चौथे मा शंखर बिसनु ब्रम्हा मुनि ज्ञाता हो
दंडाशरन ए हो मैया माथ नवावंव हो
आऽ जबे हमरो दुवार ए मैया मोर आऽ जबे हमरो दुवार

लीप पोते चौंकी चंदन पीड़हा मढ़ाऐंव ओ
चंदा सूरुज के ओ दाई दीयना जलाऐंव ओ
आ के बिराजो हो मैया नैना बिछाऐंव ओ
लीमवा के रुखवा ओ दाई झूलना बनाऐंव ओ
बनके लंगुरवा हो दाई चंवर डोलावंव ओ
आऽ जबे हमरो दुवार ए मैया मोर आऽ जबे हमरो दुवार

जोत जंवारा हो दाई जगमग सब जग ओ
कोंवर तोर मोंगरा गजरा कोंवर फूल पग पग ओ
दरसन तै दे दे माता आस पुराऐंव ओ
अड़हा तोर लइका तोषन सेवा जस गाऐंव ओ
नवरूप नवदुर्गा मैया तोला गोहरावंव ओ
आऽ जबे हमरो दुवार ए मैया मोर आऽ जबे हमरो दुवार

©®
तोषण चुरेन्द्र दिनकर 
धनगांव डौंडी लोहारा 
बालोद छत्तीसगढ़ ४९१७७१

शनिवार, 28 सितंबर 2024

दया मया बरसादे ओ दाई




दया मया बरसादे ओ शीतला आए हवंव तोर दुवार ओ 
कलपत हंव तोर डेहरी मा दाई पाए बर ममता दुलार ओ 
मझ्या ओ.... शीतला ... मइया ओ....

लहर लहर तोर जोत जंवारा जगमग हे संसार ओ 
सात बहिनिया सुवा नाचे लंगुरे हा करे जयकार ओ 
ढोल नंगारा झांझ मंजीरा सरगम ताल झनकार ओ 
मोंगरा के गजरा केकती केंवरा फूल दसमत के हार ओ 

किसम किसम तोर फूल फूलवारी लगे हे हरसिंगार ओ
कलपत हंव तोर डेहरी मा दाई पाए बर ममता दुलार ओ 
मइया ... शीतला ओ... मझ्या ओ......

तरिया के तीर मा तैहा बिराजे गदहा के करे सवारी 
तोर तीर आएंव आस लगाए भरदे गोदी ला महतारी 
बिन लइका मोर अंगना सुन्ना सुन्ना हावै फुलवारी 
अब तै सुनादे कान ला मोरे लइका के किलकारी 

जिनगी लागे नरक बरोबर दुनिया ह लगे पहाड़ ओ
कलपत हंव तोर डेहरी मा दाई पाए बर ममता दुलार ओ 
मझ्या ओ... शीतला ओ... मझ्या ओ.....

धन धन हो जही मोर जिनगी हा तोरे आशीष पातेंव ओ 
टिकली फूंदरी माला अउ मूंदरी साज सिंगार चढातेंव ओ 
नाक के नथनी कान के झुमका पांव मा पैरी पहिरातेंव ओ 
अरन बरन तोर लाली संवागा लाली रंग माहुर लगातेंव ओ 

शरन पड़े हे दास तोषन ह सुन लेबे तैह गोहार ओ
कलपत हंव तोर डेहरी मा दाई पाए बर ममता दुलार ओ 
मझ्या ओ... शीतला ओ.... मझ्या ओ.....

तोषण कुमार चुरेन्द्र दिनकर धनगांव डौंडी लोहारा बालोद छ. ग.
9575070689,,6267538036

मंगलवार, 3 सितंबर 2024

बेंदरा बना डारे मोला ओ बाई

बेंदरा बना डारे मोला ओ बाई...

बेंदरा बना डारे मोला ओ बाई
एती ओती तै नचाथस
मार डरिस तोर रंग रंग के फैशन
इंस्टा मा धूम मचाथस
मोला झोलटू बना डारे ओ
मोला टेटकू बना डारे ना


सूत उठ के धरे मोबाइल 
रील बनाथस तै भारी
परे रथे सबो घर के बूता हा 
कइसन लागे हे बीमारी
बोरोर बोरोर एती लइका रोवत हे 
चूंदी मुड़ी छरियाये
पढ़े ला जाथे बस्ता ल धरे 
बिना बासी भात खाये
होवत हावे मोर जग मा हंसाई 
फेर बात कहां पतियाथस
मार डरिस तोर रंग रंग के फैशन
इंस्टा मा धूम मचाथस
मोला जकला बना डारे ओ
मोला भकला बना डारे ना


कमा धमा के मैं घर में जब आथों
मिले लोटा भर न पानी
कइसन करम मोर तै लिखे बिधाता
जिनगी होगे हलाकानी
डिड़वा रतेंव मैंहा बने रतेंव गा
कइसन सुवारी ल पागेंव
काम बूता मा मैं दंदरत रहिथों
घानी कस बइला फंदागेंव
मोला होवत हे भारी करलाई
लार खाली चुचवाथस
मार डरिस तोर रंग रंग के फैशन
इंस्टा मा धूम मचाथस
मोला बइहा बना डारे ओ
मोला भूतहा बना डारे ना

©®
तोषण चुरेन्द्र 'दिनकर' 
धनगाँव डौंडी लोहारा 
बालोद छत्तीसगढ़

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय