दया मया बरसादे ओ शीतला आए हवंव तोर दुवार ओ
कलपत हंव तोर डेहरी मा दाई पाए बर ममता दुलार ओ
मझ्या ओ.... शीतला ... मइया ओ....
लहर लहर तोर जोत जंवारा जगमग हे संसार ओ
सात बहिनिया सुवा नाचे लंगुरे हा करे जयकार ओ
ढोल नंगारा झांझ मंजीरा सरगम ताल झनकार ओ
मोंगरा के गजरा केकती केंवरा फूल दसमत के हार ओ
किसम किसम तोर फूल फूलवारी लगे हे हरसिंगार ओ
कलपत हंव तोर डेहरी मा दाई पाए बर ममता दुलार ओ
मइया ... शीतला ओ... मझ्या ओ......
तरिया के तीर मा तैहा बिराजे गदहा के करे सवारी
तोर तीर आएंव आस लगाए भरदे गोदी ला महतारी
बिन लइका मोर अंगना सुन्ना सुन्ना हावै फुलवारी
अब तै सुनादे कान ला मोरे लइका के किलकारी
जिनगी लागे नरक बरोबर दुनिया ह लगे पहाड़ ओ
कलपत हंव तोर डेहरी मा दाई पाए बर ममता दुलार ओ
मझ्या ओ... शीतला ओ... मझ्या ओ.....
धन धन हो जही मोर जिनगी हा तोरे आशीष पातेंव ओ
टिकली फूंदरी माला अउ मूंदरी साज सिंगार चढातेंव ओ
नाक के नथनी कान के झुमका पांव मा पैरी पहिरातेंव ओ
अरन बरन तोर लाली संवागा लाली रंग माहुर लगातेंव ओ
शरन पड़े हे दास तोषन ह सुन लेबे तैह गोहार ओ
कलपत हंव तोर डेहरी मा दाई पाए बर ममता दुलार ओ
मझ्या ओ... शीतला ओ.... मझ्या ओ.....
तोषण कुमार चुरेन्द्र दिनकर धनगांव डौंडी लोहारा बालोद छ. ग.
9575070689,,6267538036

कोई टिप्पणी नहीं:
एक टिप्पणी भेजें