शुक्रवार, 31 अक्टूबर 2025

नजरिया के बान


ले डारे मोरो तँय परान गोरी
मारे नजरिया के बान तँय
काहत हावँव सिरतो ईमान गोरी
बन जाना जाना मोर जान तँय

--मारे नजरिया के बान तँय हो...ओ...
बन जाना जाना मोर जान तँय
-------संगीत------
ले डारे मोरो......
काहत हावँव......

१
मन ला मोही डारे रानी , तोर हँसाई ओ
मिरगीन कस लागे पगली , तोर रेंगाई ओ
-----------संगीत----------
चंपा चमेली मोंगरा , तोला देख लजावय
चंदा कस लागे चेहरा , बिजली गिरावय
---धरती मोर आसमान तँय हो...ओ...
संझा अँव मँय मोर बिहान तँय
-------संगीत------
ले डारे मोरो......
काहत हावँव......

२
का जादू डारे तँयहा , दीवाना बनाये
भँवरा बन घूमरँव किंजरँव , समझ नइ आये
----------संगीत---------
भूख प्यास लागत नहीं,  दिल नइहे चैना
चेहरा झूलत रहिथे, तोर दुनों नैना
---मँय गीता मोर पुरान तँय हो...ओ...
बन कोयली कस तान तँय
-------संगीत------
ले डारे मोरो......
काहत हावँव......

©®
तोषण चुरेन्द्र 'दिनकर' 
धनगांव डौंडीलोहारा 
बालोद छत्तीसगढ़ 
9575070689

बुधवार, 29 अक्टूबर 2025

जेठौनी


छन्न पकैया छंद म समसामयिक काव्य रचना सादर प्रेषित 

*1 - धान लुवाई*

छन्न पकैया छन्न पकैया , 
जब धान लदफदागे।
अब कइसे के करन लुवाई , 
पँवरी हाथ जुड़ागे।।

छन्न पकैया छन्न पकैया , 
झोर गिरत हे पानी।
फूटय चुहरी मातै गहरी , 
होगे मरे बिहानी।।

छन्न पकैया छन्न पकैया , 
दू दिन के हे बरसा।
लीला कइसन करथस भगवन , 
दे के झन तै तरसा।।

छन्न पकैया छन्न पकैया , 
खुलजा थोर अगासा।
हे प्रभु हमरो मानौ अरजी , 
अतरी हावय आसा।। 

छन्न पकैया छन्न पकैया , 
तब लुवँय धान सबझन।
कोट कोट ले कोठी भरही , 
हर घर होवय धन-धन।।

 
*2 - जेठोनी तिहार*

छन्न पकैया छन्न पकैया, 
तुलसी बिहा मढ़ाबो।
गड़वा बाजा मड़वा साजा, 
मायन नाच नचाबो।।

छन्न पकैया छन्न पकैया, 
बिसनु बराती लाही।
भाँवर परही मन हरसाही, 
अंजोर नवा बगराही।।

छन्न पकैया छन्न पकैया, 
सालिक तुलसी मानय।
खुशियार रसा दे चुचवावय, 
पीरीत मया जानय।।

छन्न पकैया छन्न पकैया, 
मीटिस हे अँधियारा।
नाम अमर बिंदा के संगी, 
जालंधर शिव प्यारा।।

छन्न पकैया छन्न पकैया, 
उठै बिसनु अब जागे।
जेठोनी के दीया बारव, 
रमा घलो हे आगे।
 
*3 - बस अइसने....🙏*

छन्न पकैया छन्न पकैया, 
जस फूटय छानी हँव।
सुनथौं पढथौं गुनथौं लिखथौं , 
चाहा कम पानी हँव।।

छन्न पकैया छन्न पकैया, 
मुँह मा आथे कहिथँव।
सुख दुख के हे ताना बाना, 
बनके 'दिनकर' सहिथँव।।

छन्न पकैया छन्न पकैया, 
गावँव गीत मया के।
सदा बँधाये डोरी संगी, 
तोरो मोर दया के।।

©®
तोषण चुरेन्द्र 'दिनकर' 
धनगांव डौंडीलोहारा

देवारी होगे उजियारी


*देवारी होगे उजियारी*

देवारी होगे उजियारी।
खुशी हमागे गदगद भारी।
धनतेरस धनवन्तर लानै।
नरक चतुर्दश यम के मानै।
दाई लछमी धन बरसाये।
ज्ञान बुद्धि सब धरके आये।
गोवर्धन के पूजा करके।
भाई बहिनी दूज जबरके।
दीया देवारी के जगमग ।
रिकबिग-चिकबिग लागै सब जग।
राउत दोहा हाना पारै।
पीरीत मया दिन-दिन चारै
सुमता दीया तैह जलाले।
सबला तैं मिल गला लगाले।
होवै सब मा भाई चारा।
सुग्घर लगही आरा पारा।
सबके जिनगी बीतै सुग्घर।
तन मन बढ़िहा राहै उज्जर।
तोषन दिनकर काहत हावौं
नाचत गावत खुशी मनावौ।


तोषण चुरेन्द्र 'दिनकर' 
धनगांव डौंडीलोहारा 
बालोद छत्तीसगढ़ 
9575070689

दुनिया


दुनिया (-कुण्डलियाँ)

दुनिया पाछू छूटगे, खुद ला देथन जोर।
बने - बने के होड़ मा, गिनहा होथन थोर।
गिनहा होथन थोर, लहुट पाछू नइ देखन।
छूटय लुरु बुटु हाथ, कोन ला कोन सरेखन।
टेर-टेर के खाँच, मिले नइ तो अब गुनिया।
अपन मगन के शोर, लगे हे पूरा दुनिया।

©®
तोषण चुरेन्द्र 'दिनकर' 
धनगांव डौंडीलोहारा
बालोद छत्तीसगढ़

मंगलवार, 21 अक्टूबर 2025

माते हे देवारी

माते हे देवारी

माते हे देवारी दीया संग मा।
छाय हावय सतरंगी रंग मा।
किरपा रहय लछमी गनेस के, 
नाचय खुशी घलो उमंग मा।

अन्न महतारी के भंडार भरय।
जम्मों किसनहा जोरा करय।
देख - देखके अंजोर दीया के,
चंदा सूरूज घलो लाज मरय।

चारो कोती गा बगरय उजियारी।
रहय झन कोनों करा अंधियारी।
सुमता की गठरी बंधे रहय संगी,
तुँहर हमर एसो के सुग्घर देवारी।

परियावरन ल संगी सब बचावव।
फट-फटाका कमती ले चलावव।
साँसा मिले हावय जी वरदान मा,
प्रकृति रक्छा बर चेत लगावव।

©®
तोषण चुरेन्द्र दिनकर 
धनगांव डौंडीलोहारा 
बालोद छत्तीसगढ़ 
१३/११/२०२३

दिल मोर फांस डारे


गोरी मोला हांस के , मया के डोरी मा बांध डारे ओ
मन ला मिलाय के , दीवाना बनाय के , दिल मोर फांस डारे ओ.….

तोर कोती दौंड़े दिल मोर , होके दिल दिवाना 
दिल मा करार नइहे , बैरी हे जमाना 
मया मा सनाय जइसे , पुन्नी चंदा राती 
तोर मोर जोड़ी लागे , जइसे दीया बाती 
दिल के करार तैं , सावन मैं बहार तैं , मधुबन मा रास डारे ओ.....

बहे पुरवैय्या सर सर , कोयली गीत गाये
बरसे मया के बदरा , आऽगी लगाये
तोर पीरीत के सागर , दिल मा हिलोर ले
सुन ले ये दिल के धड़कन , तोर नाँव शोर हे
गुले गुलजार तैं , दिल के खुमार तैं , मोहनी के पाश डारे ओ......

©®
तोषण चुरेन्द्र 'दिनकर' 
धनगांव डौंडीलोहारा 
बालोद छत्तीसगढ़ 
9575070689

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय