मान सरोवर साहित्य अकादमी राजस्थान -छत्तीसगढ़ी भाषा शाखा
*दैनिक प्रतियोगिता बर सादर प्रेषित*
*विषय :-सत के रद्दा मा रेंगे ल सिखाय*
*विधा :-पंथी गीत*
*दिनांक :- १६/१२/२०२३ शनिवार*
*शीर्षक :- मोर गुरु बाबा*
मोर गुरु बाबा होऽ घासी दास बाबा होऽ
सत के रद्दा मा हम ला रेंगे ल सिखाय
१
महगू अमरवतीन के लइका कहाय होऽ
गिरौदपुरी धाम बाबा जनम धर आय होऽ
बालापन ले हो बाबा ध्यान ल लगाय होऽ
सादा रंग सतनाम अलख जगाय होऽ
मोर गुरु बाबा होऽ घासी दास बाबा होऽ
सत के रद्दा मा हम ला रेंगे ल सिखाय
२
रेंगव सत रद्दा मा जग ल सिखाये तैऽ
सत अउ अहिंसा के पाठ ल पढ़ाये तैऽ
जग जीव आनी जानी माया के बजार होऽ
सतनाम सार हावय सतनाम अधार होऽ
मोर गुरु बाबा होऽ घासी दास बाबा होऽ
सत के रद्दा मा हम ला रेंगे ल सिखाय
३
ऊंच-नीच जात-पात तैह नइ माने होऽ
महिमा महान तोरे दुनिया ह जाने होऽ
मरहा बइला ल बाबा तैह सिरजाये होऽ
चुरगँइया तोसन गीत तोर गाये होऽ
मोर गुरु बाबा होऽ घासी दास बाबा होऽ
सत के रद्दा मा हम ला रेंगे ल सिखाय
©®
गीतकार
तोषण चुरेेन्द्र दिनकर
धनगांव डौंडीलोहारा
बालोद छत्तीसगढ़