शुक्रवार, 29 मार्च 2024

रिगबिग चमके तोर दुवार

रिगबिग चमके तोर दुवार ,माता ओ तोर दरबार
नौ दुर्गा बन के आ जाबे ओ बघवा मा चढ़के आ जाबे ओ
१
झूमत नाचत हावय पड़की परेवना ओ
सुवा अउ करमा गावय ये रानी मैना ओ
जग मग नव दीया बरगे दाई तोर भुवना 
अंगना तोर लिपे बाहरे हरियर सुवना 
मया के बरसे हे फुहार,माता ओ तोर दरबार 
नौ दुर्गा बन के आ जाबे ओ बघवा मा चढ़के आ जाबे ओ
२
दसमत के माला लावै कारी कोयलिया ओ
आरती सजाये माता गौरी गौरैय्या ओ
बइठे हे लाला लगुंरवा चँवर डोलावै
जोहर ललना तोसन सेवा बजावै
सजे हावै सोलाहो सिंगार ,माता ओ तोर दरबार 
नौ दुर्गा बन के आ जाबे ओ बघवा मा चढ़के आ जाबे ओ
३
चंदा सूरूज तोर दुनों साजै फूलवरिया 
छमछम बजावत आबे दाई तोर पैजनिया
चैत के महिना दाई मंझनी के मंझनी
खा लेबे बासी दाई बंगाला चटनी 
लागौं मैं पंइय्या बारम्बार,माता ओ तोर दरबार 
नौ दुर्गा बन के आ जाबे ओ बघवा मा चढ़के आ जाबे ओ

तोषण चुरेन्द्र दिनकर 
धनगांव डौंडीलोहारा 
बालोद छत्तीसगढ़ ६२६७५३८०३६

मंगलवार, 26 मार्च 2024

आबे ओ दाई मोर

आबे ओ दाई मोर 
जँवारा बोये हावँव गांव मा 
देखत रहिहँव लीम छांव मा

देखत रहिहँव लीम छांव मा
आबे ओ दाई मोर....

चइत के महिना दाई करसा सजाएँव ओ
नवदिन रतिहा दाई तोला मनाएँव ओ
सरधा के दीया बाती मैंहा जलाएँव ओ
आ जाबे दुर्गा मइय्या नैना बिछाएँव ओ
हे अम्बे ओ जगदम्बे ओ 
जँवारा बोये हावँव गाँव मा 
देखत रहिहँव लीम छाँव मा


फूल मोंगरा के मइय्या गजरा बनाहूँ ओ
टिकली फूँदरी लाली चुरी तोला चढ़ाहूँ ओ
लाली सवाँगा दुरगा  तोर बर लाहूँ ओ
पाँव पैजनिया माता माहूर लगाहूँ ओ
काली ओ शीतला ओ
जँवारा बोये हावँव गाँव मा 
देखत रहिहँव लीम छाँव मा

चंदा सूरूज मइय्या  खड़े अगोरा मा
बइठे भगत माता तोरे निहोरा मा
जग ला खेलाबे दाई मया के कोरा मा 
बइठे हँव जोरा करके दाई चँगोरा मा
मइय्या हो अम्बे हो
जँवारा बोये हावँव गाँव मा 
देखत रहिहँव लीम छाँव मा

तोषण चुरेन्द्र दिनकर 
धनगांव डौंडीलोहारा बालोद छत्तीसगढ़

मोर चंपाकली

नायक
मोर चंपाकली....आबे मोर गली...
तोला खवाहूं गोरी ओ.....
मीठ मीठ के गुड़ के डली

नायिका
जारे जारे टुरा जा....मोला झिन तै सता....
नइतो खावंव मैं टुरा रे....
मीठ मीठ गुड़ के डली

नायक
तोर बर लाने हावंव चांपा के चुनरी
पहिर लेना रानी मोर मया के मुंदरी
नायिका
मार खाबे टुरा तैहा पाछू झन आना
मोर आघू पाछू तैहा झन मटमटाना
नायक
मोर गांजाकली.....आबे मोर गली...
तोला खवाहूं गोरी ओ....
मीठ मीठ गुड़ के डली 

नायिका
दुरुग के टिकली बिलासपुर के बाली
रायपुर के लुगरा पहिरथों लाली लाली
नायक
कवर्धा के कलगी अउ बालोद के बहुटा
दुलहिन बनाहूं तोला काहत हावंव ठऊंका
नायिका
मैं हंव कमसीन कली...झिन समझ मूंगफली...
नइतो खावंव मैं टुरा रे....
मीठ मीठ गुड़ के डली

नायक 
बस्तर के बंगला पान तोला खवाहूं
तोर गुलाबी गाल गोरी होठ ल रंगाहूं 
नायिका
मन ला मोही डारे राजा तोर मीठ बोली
मंदरस कस लागे मोला तोर मया गोली
नायक 
मोर मोंगरा कली...आवास सबले भली...
तोला खवाहूं गोरी ओ...
मीठ मीठ गुड़ के डली
नायिका 
मोला खवादे राजा रे....
मीठ मीठ गुड़ के डली

गीतकार 
तोषण चुरेन्द्र दिनकर धनगांव डौंडीलोहारा बालोद छत्तीसगढ़ 
६२६७५३८०३६

रविवार, 24 मार्च 2024

तोला कइसे सिरजावंव

*एक अंधे की कल्पना को उकेरती छत्तीसगढ़ी माता सेवा भजन*

तोला कइसे सिरजावंव 
ओ दाई 
नइ जानंव रूप बरन ला
आंखी के अंधरा हौं दाई
नइ जानंव रूप बरन ला

नइ जानंव रूप बरन ला होऽऽऽ
नइ जानंव रूप बरन ला
आंखी के अंधरा हौं दाई
नइ जानंव रूप बरन ला


कहवन हे तोर अनमन जनमन कहवा लिए अवतारी
कहवंन हे  तोर भाई बहिनी कहवंन ददा महातारी
नइ जानंव रूप बरन ला होऽऽऽ
नइ जानंव रूप बरन ला
तोला कहां सोरियावंव ओ दाई
नइ जानंव रूप बरन ला हो
आंखी के अंधरा हौं दाई
नइ जानंव रूप बरन ला


कइसन हे तोर माथ मकुटिया कइसन करे सिंगारे
कइसन हे तोर साज संवागा कइसन गर के हारे
नइ जानंव रूप बरन ला होऽऽऽ
नइ जानंव रूप बरन ला
कइसे मन मा बसावंव ओ मइय्या 
नइ जानंव रूप बरन ला हो
आंखी के अंधरा हौं दाई
नइ जानंव रूप बरन ला


काहेन के तोर तिरशुल भाला काहेन खडग कटारी
कइसन  हे तोर नवरूप दाई काहेन करे सवारी
नइ जानंव रूप बरन ला होऽऽऽ
नइ जानंव रूप बरन ला 
तोर ठीहा कहां पावंव ओ मइय्या 
नइ जानंव रूप बरन ला हो
आंखी के अंधरा हौं दाई
नइ जानंव रूप बरन ला


तोला सिरजावंव माटी के दुर्गा दया मया बरसाबे
मैं अंधरा तोर लइका ओ दाई नइय्या पार लगाबे
नइ जानंव रूप बरन ला होऽऽऽ
नइ जानंव रूप बरन ला 
तोसन सोरियावंव ओ दाई
नइ जानंव रूप बरन ला
आंखी के अंधरा हौं दाई
नइ जानंव रूप बरन ला

©®
गीतकार 
तोषण चुरेन्द्र दिनकर 
धनगांव डौंडीलोहारा 
बालोद छत्तीसगढ़

गुरुवार, 14 मार्च 2024

कोन रंग रंगँव

कोन रंग रंगँव रे संगी तोला कोन रंग 
अरे हाँ हाँ संगी तोला कोन रंग रंगँव रे 

लाली रंग ला तो परसा ह धरे 
सरसों पींयर इतराये।
रंग गुलाबी ह मुस मुसकाये 
हरियर पाना लुकाये
कोन रंग रंगँव रे संगी तोला कोन रंग 
अरे हाँ हाँ संगी तोला कोन रंग रंगँव रे

नीला ह उड़त हे नीलगगन मा 
नारंगी रंग मट मटाये २
भाग सँहराये जामुन अपन ह
भाँटा रंग गदर मताये २
कोन रंग रंगँव रे संगी तोला कोन रंग 
अरे हाँ हाँ संगी तोला कोन रंग रंगँव रे

धरे हावँव मँय रंग मया के
सबो ला एमा रँगाहूँ ना २
रंग तिहार के पावन परब हे
गीत मया के गाहूँ ना २
कोन रंग रंगँव रे संगी तोला कोन रंग 
अरे हाँ हाँ संगी तोला कोन रंग रंगँव रे 

©®तोषण चुरेन्द्र दिनकर 
धनगांव डौंडीलोहारा बालोद छत्तीसगढ़

बुधवार, 6 मार्च 2024

रतिहा सपना मा काबर

मुखड़ा----
का-
रतिहा सपना मा काबर तै आथस गोरी
सोये निंदिया ले काबर जगाथस तैहा
की-
मोर सपना मा काबर तै आथस टुरा
मोर निंदिया ल काबर चुराथस तैहा 

अंतरा १----
का-
जागों सारी रतिहा तोर सुरता मा
झूले तोर चेहरा नजरे नजर मा
की-
तोर कोती बइहा मोरो मन जाथे
दिल बैरी माने नहीं मोला कलपाथे
का-
धकले करथे मोर चोला सताथस गोरी
सोये निंदिया ले काबर जगाथस तैहा
की-
मोर सपना मा काबर तै आथस टुरा
मोर निंदिया ल काबर चुराथस तैहा 

अंतरा २----
का-
सुकवा पहाती मिले बर आहूं
संगी जहुंरिया झन कोनों लाबे
की-
बन कोयली मैं कुहकी लगाहूं
आंखी ल खोलबे मोला तैह पाबे
का-
अइसे जीवरा ल काबर जलाथस रानी
मोर निंदिया ल काबर चुराथस तैहा 
की-
मोर सपना मा काबर तै आथस टुरा
मोर निंदिया ल काबर चुराथस तैहा 

अंतरा ३-----
का-
एसो के अकति म हरदी लगाके
लेके बरतिया तोर घर आहूं
की-
ले जबे मोला डोली म बइठाके
जनम जनम ले साथ निभाहूं
का-
मोर मया के सपना सजाथस गोरी
सोये निंदिया ले काबर जगाथस तैहा
की-
मोर खोपा के गजरा महकाथस टुरा
मोर निंदिया ल काबर चुराथस तैहा 


गीतकार 
तोषण चुरेंद्र दिनकर 
धनगांव डौंडीलोहारा बालोद छत्तीसगढ़ ६/३/२४



रविवार, 3 मार्च 2024

कब आबे मोर अंगना

राघु रैय्या मैं तोला सुमरत रहिथौं
कब आबे मोर अंगना देखत रहिथौं

तर सथे आंखी कल पथे चोला
दे दे दरस अब राम ते मोला
नदिया नरवा अउ डोंगरी ल पूछता रहिथौं
कब आबे मोर अंगना देखत रहिथौं

ये जीवरा के काहे ठिकाना
आज हावे त कल उड़ जाना
बनके चकवा अमरित बर घुमत रहिथौं
कब आबे रामा देखत रहिथौं

खा लेबे बोईर पी लेबे पानी
दे देबे मोला नवधा के बानी
तोर नाव के महिमा जपत रहिथौं
कब आबे मोर अंगना देखत रहिथौं

तोषण चुरेंद्र दिनकर 
धनगांव डौंडीलोहारा बालोद छत्तीसगढ़
+++++++++++++++++++++++++++++
+++++++++++++++++++++++++++++
भोले बाबा मैं तोला सुमरत रहिथौं
कब आबे मोर अंगना देखत रहिथौं

तर सथे आंखी कल पथे चोला
दे दे दरस अब भोला ते मोला
नंदी भृंगी अउ उमा ल पूछत रहिथौं
कब आबे मोर अंगना देखत रहिथौं

ये जीवरा के काहे ठिकाना
आज हावे त कल उड़ जाना
बनके चकवा अमरित बर घुमत रहिथौं
कब आबे बाबा देखत रहिथौं

खा लेबे बोईर पी लेबे पानी
दे देबे मोला नवधा के बानी
तोर नाव के महिमा जपत रहिथौं
कब आबे मोर अंगना देखत रहिथौं

तोषण चुरेंद्र दिनकर 
धनगांव डौंडीलोहारा बालोद छत्तीसगढ़

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय