कोन रंग रंगँव रे संगी तोला कोन रंग
अरे हाँ हाँ संगी तोला कोन रंग रंगँव रे
लाली रंग ला तो परसा ह धरे
सरसों पींयर इतराये।
रंग गुलाबी ह मुस मुसकाये
हरियर पाना लुकाये
कोन रंग रंगँव रे संगी तोला कोन रंग
अरे हाँ हाँ संगी तोला कोन रंग रंगँव रे
नीला ह उड़त हे नीलगगन मा
नारंगी रंग मट मटाये २
भाग सँहराये जामुन अपन ह
भाँटा रंग गदर मताये २
कोन रंग रंगँव रे संगी तोला कोन रंग
अरे हाँ हाँ संगी तोला कोन रंग रंगँव रे
धरे हावँव मँय रंग मया के
सबो ला एमा रँगाहूँ ना २
रंग तिहार के पावन परब हे
गीत मया के गाहूँ ना २
कोन रंग रंगँव रे संगी तोला कोन रंग
अरे हाँ हाँ संगी तोला कोन रंग रंगँव रे
©®तोषण चुरेन्द्र दिनकर
धनगांव डौंडीलोहारा बालोद छत्तीसगढ़
कोई टिप्पणी नहीं:
एक टिप्पणी भेजें