बुधवार, 21 फ़रवरी 2024

धनगांव के डीही डोंगर मा


कोरस:-
शीतला ओ दाई शीतला तोर जय हो
शीतला ओ दाई शीतला तोर जय हो

मुखड़ा:-
धनगांव के डीही डोंगर मा बिराजे ओ शीतला दाई
तोर जय हो जय शीतला दाई तोर जय हो जय महामाई

अंतरा १
झरझरा पाट मा बइठे बिकटराव दया मया बगरावय
सिढ़िहा चढ़के भगत परानी देव दरस बर जावय
चरन पखारय झरझरा बँधिया पवन ह चँवर डोलावय
अंगना मा घुमरय बघुवा भलुवा लँगुरे हा सेवा बजावय
ठाकुर देव तोर डेहरी रखइय्या संग मा हे काली माई
तोर जय हो जय शीतला दाई तोर जय हो जय महामाई

अंतरा २
जोगीराव तोर भाई बिराजे बीच जंगल के छोरे
चरन धोवत तोर झरझरा निकले नदिया झरिया कोरे कोरे
सियार सम्हाले दैतराव हा किंजरय गांव गली खोरे
आस पुरइय्या शीतला दाई ओ बिगड़ी बनादे तै मोरे
सतवंतीन अउ सात बहिनिया सुमरय जरही दाई
तोर जय हो जय शीतला दाई तोर जय हो जय महामाई

अंतरा ३
चइत कुँवार के नवदिन राती अँगना मा मेला भरावय
तोर दुवारी तोर फुलवारी जोत जँवारा लहरावय
रोवत आवय हाँसत जावय तन मन हर हरषावय
हाथ ला जोंड़े तोसन बरुवा सेवा जस ला सुनावय
सगरो चराचर नाँचन लागे जय जय हे गोहराई
तोर जय हो जय शीतला दाई तोर जय हो जय महामाई
---------------------------
रचनाकार
तोषण चुरेेन्द्र दिनकर 
धनगांव डौंडीलोहारा 
बालोद छत्तीसगढ़

सोमवार, 5 फ़रवरी 2024

करमा के ताल


करमा के ताल...

करमा के ताल ताल नदिया नरवा कछार
करमा नचाहूं गोरी ओ मांदर बजाहूं गोरी
,,,,,,,,,,,,,,,,,,,,,,,,
जुड़ पुरवैय्या अचरा डोलावै 
मिरगीन रेंगना मन ला मोहावै
पागा के कलगी तुही ल खुलै
तोर हंसाई मन मन झूलै
बस्तर के बांस पान दिल ला बेधे नैना बान
करमा नंचाहूं गोरी ओ मांदर बजाहूं गोरी
,,,,,,,,,,,,,,,,,,,,,,,
डोंगरी पहाड़ी झूमरे तरइय्या
करमा नंचादे मांदर बजइय्या
करब के डारा हरियर पाना
मन ला मताये करब के गाना
खूले तोला मजूंर पांख रतिहा अंजोरी पाख
करमा नंचाहूं गोरी ओ मांदर बजाहूं गोरी
,,,,,,,,,,,,,,,,,,,,,,,
फूल फूलवारी लगे जग सारी
कुहकत कोयली अमुवा के डारी
जुग जुग बंधे रहै मया के बंधना
किरिया हे तोला छूटे झन संग ना
साजा मोर सरई पान दिल मा तोर बसे परान
करमा नंचाहूं गोरी ओ मांदर बजाहूं गोरी

तोषण चुरेेन्द्र दिनकर 
धनगांव डौंडीलोहारा
बालोद छत्तीसगढ़ 
9575070689 // 6267538036

शनिवार, 3 फ़रवरी 2024

राधा गोरी राधा गोरी

राधा गोरी राधा गोरी खेले बर आबे होरी 
बिरीजबन मा ओ
रंगहूं रंगाहूं मैं तोरेच संन मा ओ

रंग देहूं रधिया तोला फागून तिहार ना
तोर मया मोर बर हे जीव के  आधार ना
माते हावे बिंदरा बन माते संसार ना
एतो ओती चारो कोती मया के फूहार ना 
झिन कर सीना जोरी करके दिल चोरी 
बिरीजबन मा ओ
रंगहूं रंगाहूं मैं तोरेच संन मा ओ

रंग सतरंगी राधा उड़त हे गुलाल ओ
लाली रंग पिंवरा मा रंग देहूं तोर गाल ओ
बोली तोर कोयली कस मिरगीन हे चाल ओ
तोर मुसकाई राधा करे जीव जंजाल ओ
बांधिले तै मया डोरी झन होवे छोड़ा छोड़ी
बिरीजबन मा ओ
रंगहूं रंगाहूं मैं तोरेच संन मा ओ

हमर पीरीत के रंग मा सबजग रंगाबो
माते हाबे फगवा राधा गाबो अउ गवाबो
ढोल नंगारा मांदर झांझ मिल बजाबो
हिरदे मा सबके रधिया पीरीत ला जगाबो
दिल मिले कोरी कोरी नाचे गाये छोरा छोरी
बिरीजबन मा ओ
रंगहूं रंगाहूं मैं तोरेच संन मा ओ

तोषण चुरेेन्द्र दिनकर 
धनगांव डौंडीलोहारा
 बालोद छत्तीसगढ़ 
9575070689 //6267538036

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय