करमा के ताल...
करमा के ताल ताल नदिया नरवा कछार
करमा नचाहूं गोरी ओ मांदर बजाहूं गोरी
,,,,,,,,,,,,,,,,,,,,,,,,
जुड़ पुरवैय्या अचरा डोलावै
मिरगीन रेंगना मन ला मोहावै
पागा के कलगी तुही ल खुलै
तोर हंसाई मन मन झूलै
बस्तर के बांस पान दिल ला बेधे नैना बान
करमा नंचाहूं गोरी ओ मांदर बजाहूं गोरी
,,,,,,,,,,,,,,,,,,,,,,,
डोंगरी पहाड़ी झूमरे तरइय्या
करमा नंचादे मांदर बजइय्या
करब के डारा हरियर पाना
मन ला मताये करब के गाना
खूले तोला मजूंर पांख रतिहा अंजोरी पाख
करमा नंचाहूं गोरी ओ मांदर बजाहूं गोरी
,,,,,,,,,,,,,,,,,,,,,,,
फूल फूलवारी लगे जग सारी
कुहकत कोयली अमुवा के डारी
जुग जुग बंधे रहै मया के बंधना
किरिया हे तोला छूटे झन संग ना
साजा मोर सरई पान दिल मा तोर बसे परान
करमा नंचाहूं गोरी ओ मांदर बजाहूं गोरी
तोषण चुरेेन्द्र दिनकर
धनगांव डौंडीलोहारा
बालोद छत्तीसगढ़
9575070689 // 6267538036
कोई टिप्पणी नहीं:
एक टिप्पणी भेजें