महर महर ममहावै संगी
महर-महर ममहावै रे संगी
ओ हो हो हो हो हो
माटी हमर ये गांव के
माथ मा लागै चंदन जइसे, येखर धुर्रा पांव के
मोर धरती मैया मोर भारत भुंइया
तोर लागंव पंइया मोर सोन चिरैय्या
१
दाई ददा के कोरा जइसन, माटी हवै महान हो
लहर-लहर लहराथे जिहाँ, कोदो कुटकी गँहू धान हो
कुहुके कोयली अमुवा के डारी
ओ हो हो हो हो हो
चिरइ चिरगुन चाँव ले
मोर धरती मैया मोर भारत भुंइया
तोर लागंव पंइया मोर सोन चिरैय्या
२
खेलेंन कुदेंन हम येखर गोदी मा, आनी बानी के खेल हो
सुमत के डोरी बंधा के भइया, रखन सबो सन मेल हो
मन ल लुभावै मया पीरीत हा
ओ हो हो हो हो हो
तरिया नदिया रूख ठाँव के
मोर धरती मैया मोर भारत भुंइया
तोर लागंव पंइया मोर सोन चिरैय्या
३
गइया चराये गांव पहटिया, बंशी मा रास रचाय हे
झुमरै नाचै पुर पुरवैया, फूलकैना मुसकाय हे
ताल तलैया छलके रे संगी
ओ हो हो हो हो हो
अमरइया लीम छांव के
मोर धरती मैया मोर भारत भुंइया
तोर लागंव पंइया मोर सोन चिरैय्या
४
करले सिंगारी धरती दाई के, इही हमर जिनगानी हे
लइका बरोबर राखै सबला, गुरतुर गुरहा बानी हे
छुनुर-छुनुर मन बाजत हावै
ओ हो हो हो हो हो
दाई पैरी तोर पांव के
मोर धरती मैया मोर भारत भुंइया
तोर लागंव पंइया मोर सोन चिरैय्या
गीतकार
©®
तोषण चुरेन्द्र 'दिनकर' धनगांव डौंडीलोहारा
बालोद छत्तीसगढ़ ६२६७५३८०३६
९५७५०७०६८९