रविवार, 28 अगस्त 2022

गणेश वंदना

नमन सह सादर समीक्षार्थ

गणेश वंदना

गौरी के गणराज गजानन
पहिली तोला मनावत हँव
भरे सभा मा लाज ला रखदे
आजा तोला गोहरावत हँव

भादो महिना चउथ के दिन ले
होते गा पहिली पूजा
बुद्धि देवइय्या तँयहा गजानन
तोर ले कोन हे दूजा
संग मा तोरे रिद्धि सिद्धि हे
घेरी बेरी माथ नवावत हँव.....१

हार फूल अउ मोदक धरके
भगतन सब तोर आथे
तोर दया के आशीष पाके
मन के मनौती मनाथे
हाथ जोड़ दूनों  बिनती करत हँन
जय जयकार लगावत हँव.....२

माता तोरे पारबती हे
पिता हे तोर महादेवा
कदली फल के भोग लगत हे
संग हे लड्डू  मेवा
धन धन होगे जिनगी हमरो
भाग अपन संहरावत हँव......३


तोषण चुरेेन्द्र दिनकर
धनगांव डौंडी लोहारा

बुधवार, 17 अगस्त 2022

आठे के महिमा

लोक आस्था के 'आठे'
   पूरा देश अउ दुनिया म मनाए जाने वाला कोनो परब-तिहार जब लोक के डेहरी म पहुंचथे, त वो अपन एक अलगेच अउ मौलिक रूप धर लेथे. हमर छत्तीसगढ़ म एक अइसने परब देखे बर मिलथे, जेला हम सब 'आठे' या 'आठे कन्हैया' के नांव ले जानथन.
   योगेश्वर भगवान श्रीकृष्ण के जन्मोत्सव के परब ल पूरा दुनिया म भादो महीना के अंधियारी पाख म आठे (अष्टमी) तिथि म मनाए जाथे. ए अष्टमी तिथि के सेती ही एला आठे कहिथे. एकर संबंध म एक मान्यता इहू हवय- भगवान कृष्ण ह अपन महतारी देवकी के गरभ ले जनम लेवइया आठवाँ संतान रिहिसे, तेकर सेती एला आठे कहे जाथे.  
   हमन जब लइका राहन गाँव म राहत रेहेन, त ए आठे के दिन बिहनिया ले बारी अउ बियारा मन म जाके सेमी पान टोर के लावन अउ वोला कुचर के हरियर रसा ल निकालन. गाँव के भांठा ले भेंगरा पान घलो लानन, वोमा जादा रस निकलय. महतारी बहिनी मन के पांव म रचाए के माहुर ले लाली रंग बनावन अउ बमरी के दतवन ल कुचर के लिखे/पेंटिंग करे खातिर कुची बनावन. कभू-कभू स्कूल-कापी म लिखे खातिर पहिली जेन कांच के दवात म स्याही राहय वोकरो उपयोग पेंटिंग खातिर कर लेवन.
   इहाँ ए बात जानना जरूरी हे, पहिली भगवान कृष्ण के मूर्ति या फोटो आदि आज अतका सहज उपलब्ध नइ रिहिसे. खास करके गाँव-गंवई म तो बिल्कुल नहीं. तेकर सेती उंकर पूजा खातिर अपन घर के पूजा ठउर म भिथिया म भित्ति चित्र बनाए जावय. हमर मन के बिहनिया ले रंग कुचरई के बुता ह उही भित्ति चित्र के रेखांकन खातिर राहय. 
   पूजा घर के कोठ म दू-तीन फीट के ऊंच म डमरू असन आकार वाले आठ ठन लइका के पुतरा बनाए जाय. लोगन एला अपन- अपन कल्पना के अनुसार बना लेवंय. कोनो सिरिफ आठ झन लइका भर के छापा, त कोनो बड़का असन डोंगा म आठ लइका मनला खड़े कर देवंय. कतकों झन ऊपर म आठ लइका के छापा अउ तरी म नंदिया घलो बना लेवंय, जेमा डोंगा, सांप, मछरी सब के छापा उकेर देवय. तहाँ ले इही सब ल भगवान के अवतरण के प्रतीक मान के एकरे पूजा कर लेवंय.
    हमर इहाँ के परंपरा म कृष्ण जन्म ले जुड़े एक अउ परंपरा देखे ले मिलथे. जब ककरो घर लइका के जनम होथे, त वोला धान ले भरे सूपा म बइठारे के नेंग करे जाथे. बाद म वो सूपा भर धान ल जचकी कराने वाली दाई ल दे दिए जाथे. ए परंपरा ल भगवान कृष्ण संग जोड़े जाथे. सियान मन के कहना हे- भगवान जब जनमिस त जेल म रिहिसे. वोकर सियान वासुदेव जी तब वोला कंस के हाथ लगे ले बचाए खातिर वो जगा रखाए सूपा (साहित्य के अध्ययन ले टोकरी के जानकारी मिलथे) म बइठार के नंद बाबा के इहाँ अमराए रिहिसे. एकरे सेती हमर इहाँ नवा अवतरे लइका ल धान ले भरे सूपा म बइठारे के नेंग करे जाथे.
-सुशील भोले
संजय नगर, रायपुर
मो/व्हा. 9826992811

मंगलवार, 16 अगस्त 2022

कर्म

बीएस शर्मा भिलाई

 कर्म

 कर्म करे उत्साह से,
              .फल पाए तत्काल/
फल की चिन्ता  जो करे,
                 फँस जाए  जंजाल//

सर्व कर्म फल त्याग को,
            कहते है सन्यास/
सर्व कामना छोड़ दे,
               तभी बुझेगी प्यास//

कर्म हमारे नेक हो,
             नेक मिले परिणाम/
बुरे कर्म सोचे नही,
            .   सत्य निष्ठ अविराम//

सत्य बराबर तप नही,
          कहते संत फकीर/
झूठ  कभी बोले नही,
           तुलसी  भणत कबीर//

मीठी वाणी बोलिए,
           छोड़ कपट जंजाल/
रघुवर के गुण गाइए,
         फँसे नही भव जाल//

योगी साधू  मौन  रहि,
          मन से जपते राम/
मानवता की राह मे,
           सेवा आठो याम//

सोमवार, 15 अगस्त 2022

अमरीत महोत्सव

अजादी के अमरीत उत्सव
भारत देश मनात हे
साल पचहत्तर पूरा होगे
झंडा तिरंग लहरात हे
-------------------
लाल बाल अउ पाल भगत सिंह
बनके तँयहा ललकार भर
भीड़ जा आघू बघवा बनके
नाहर कस हूंकार कर
शेर के पीला कोलिहा नोहव
काबर गा डर्रात हे
साल पचहत्तर पूरा होगे
झंडा तिरंग लहरात हे
------------------
हिमालय चोटी म डटे हे
सेना वीर जवान मन
हरियर खेती डोली सम्हाले
मोर गंवइहा किसान मन
मिले किसान जवान संगी
विज्ञान घलो इतरात हे
साल पचहत्तर पूरा होगे
झंडा तिरंग लहरात हे
-------------------
छत्तीसगढ़ महतारी हमरो
भारत माँ के दुलारी हे
दया के सुरती मया के मुरती
अपन जिनगी ले प्यारी हे
ए भुंइया मा जनम धरके
भाग अपन सँहरात हे
साल पचहत्तर पूरा होगे
झंडा तिरंग लहरात हे
------------------
कतको बीर बलिदानी होगे
लहू ले सींचिस भुंइया ल
आँचआवन नइ दिस बैरी के
रोक के रखदीस बंइहा ल
आइस हजारों आघू बैरी
मिलके धूर्रा चटात हे
साल पचहत्तर पूरा होगे
झंडा तिरंग लहरात हे
------------------
त्याग साहस नस मा भरलौ
शांति संदेश बगराना हे
सुख समरिद्धि रहे भुंइया मा
विश्व गुरु कहलाना हे
तोषण दिनकर के लेखनी 
अतरी मया बगरात हे
साल पचहत्तर पूरा होगे
झंडा तिरंग लहरात हे
-------------------
©®
तोषण चुरेन्द्र दिनकर
धनगांव डौंडी लोहारा

गुरु महिमा

*गुरु पूर्णिमा*

जीवन में जेकर ले सीखें ला मिलथे,वहीं गुरु महान हे,
हर पग अच्छा बुरा मा साथ देथे,वो गुरु ला कोटी कोटी प्रणाम हे.!

प्रथम गुरु हे मां पिता जो दुनिया में लाइस हे,
हर परिस्थिति में साथ दिस,तोर सफलता बर भगवान ला गोहार लगाईस हे.!

दुसर गुरु हे शिक्षकगण जो पढ़ई मा आगे बढाईस हे,
सत्य असत्य गलत सही के रास्ता बताईस हे.!

संगी-संगवारी घलो गुरु हरे,जो संगत बने बनाईस हे,
दुःख पीरा के समय में भाई बनके साथ निभाईस हे.!

*परमानंद सिवना परमा*
*मडियाकट्टा डौन्डी लोहारा*

गुरु पूर्णिमा

आप सभी गुरूदेवों के चरण कमल में वंदन पुष्प समर्पित

गुरू पूर्णिमा विशेष

नित्य करें हम साधना,रखें हृदय के पास।
ज्ञान रुपी आशीष से,जीवन हो मधुमास।।१।।


गुरुवर की पूजा करें,गुरु ही देते ज्ञान।
जिनके ही आशीष से,मिले अचल सम्मान।।२।।


गुरू नाम ही साधना,साधक बनकर साध।
जिनके सुमिरण से सदा,कटे कोटि अपराध।।३।।

बनकर रहते सारथी,गढ़ते नित नव राह।
जो भी मन की बात हो,पूरी करते चाह।।४।।

गुरु महिमा नित गाइये,मिले समय सुब शाम।
गुरुवर के ही ज्ञान से,मिले राम घनश्याम।।५।।


ज्ञान सदा जो बाँटते,कभी नहीं ले मोल।
सबसे ऊँचा है जग में, गुरुवर की जय बोल।।६।।

परम्परा गुरु शिष्य की,सदियों से है जान।
जहाँ मिले हमको सदा,करें मान सम्मान।।७।।


कृपा सदा करना प्रभू,धरूँ चरण में शीश।
नित सबका कल्याण हो,गुरुवर दो आशीष।।८।।

तोषण दिनकर चाहता,कहीं न हो गुरु द्वेष।
हरा भरा खुशहाल हो,प्यारा भारत देश।।९।।


तोषण चुरेन्द्र दिनकर
धनगांव डौंडी लोहारा
बालोद छत्तीसगढ़

खेती किसानी

खेती किसानी

नांगर बइला पागा खुमरी संग
हावय हमरो मितानी
होवत बिहनिया सूरूज जोत संग 
करथंन खेती किसानी

धरती दाई के सेवा बजाथंव
चरण मा मांथ नवावंव
रुख राई मोर डोंगरी पहाड़ी
बनके मँय इतरावंव
कलकल छलकत गंगा जइसन 
धार हे अरपा के पानी
होवत बिहनिया सूरूज जोत संग 
करथंन खेती किसानी

हरियर हरियर खेती अउ डोली 
लहर लहर लहरावय
पड़की परेवना कोयली मिट्ठू 
करमा ददरिया गावय
धरती दाई के कोरा मा सगरो 
खुश होथे जिनगानी
होवत बिहनिया सूरूज जोत संग 
करथंन खेती किसानी


भुंइया के भगवान हरन गा 
धनहा ले सोना उगाथंन
रहिथन सुख दुख मा संग सबो के
सुमता के दीया जलाथंन
मया पीरीत के बंधना गजब हे
दुनिया मा नइहे सानी
होवत बिहनिया सूरूज जोत संग 
करथंन खेती किसानी


आवव भइय्या आवव दीदी 
आवव हितवा मितान
रक्षा करबो धरती दाई के
बनके जवान किसान
छत्तीसगढ़ के महिमा अजब हे
सुग्घर हावय निशानी
होवत बिहनिया सूरूज जोत संग 
करथंव खेती किसानी

तोषण चुरेन्द्र दिनकर
धनगांव डौंडी लोहारा
बालोद छत्तीसगढ़

माटी के महिमा

माटी के महिमा

माटी के संसार हे,महिमा एखर अपार हे।
माटी के हे खेती-डोली,माटी के घर-बार हे।
-----------------
माटी के ओढ़ना
माटी बिछौना
माटी के जिनगी
माटी खिलौना
माटी मा जीना 
माटी मा मरना,माटी मा जीव के आधार हे।
माटी के हे खेती-डोली,माटी के घर-बार हे।
--------------
माटी हे हीरा
माटी हे मोती
बगरे महिमा
जइसे जोती
माटी मया हे
माटी पीरा हे,माटी मा नवरस धार हे।
माटी के हे खेती-डोली,माटी के घर-बार हे।
--------------
माटी मा होरी
माटी हे चंदन 
माटी देवारी
माटी ला बंदन
माटी हे दीया
माटी हे चुकिया,किसम किसम के तिहार हे।
माटी के हे खेती-डोली,माटी के घर-बार हे।
---------------
माटी के देवता
माटी के धामी
माटी मा जन्में
प्रभू अंतर्यामी
माटी के दानव
माटी के बघवा,माटी के दुर्गा सवार हे।
माटी के हे खेती-डोली,माटी के घर-बार हे।

तोषण चुरेन्द्र दिनकर
सरपंच धनगांव
डौंडी लोहारा बालोद 
छत्तीसगढ़

ऊवत बेरा

सार छंद मा प्रयास

ऊवत बेरा कुकरा बासे,करे किसानी जोरा।
बइला नाँगर खुमरी ओढ़े,दाई दीदी मोरा।

धान नवा धरके गा भइया,धरले चरिहा टुकना।
करा तता के सुर हे लामत,थोरिक नइहे रुकना।
सावन मान हरेली संगी,हरियर भुँइया कोरा ।
बइला नाँगर खुमरी ओढ़े,दाई दीदी मोरा।

भादो काँशी फूल सलौना,खेत घलो हरियावै।
गाँव गली अउ चारो कोती,गणपति सेवा पावै।
आवय दाई बहिनी सुग्घर,मानय तीजा पोरा।
बइला नाँगर खुमरी ओढ़े,दाई दीदी मोरा।

पीतर पाख लगे हे बढ़िहा,तोरइ मन बिजराथे।
मार लपेटा बरबट्टी के,गुरतुर साग मिठाथे।
आये हे नवरात परब तब,करले लेवव जोरा।
बइला नाँगर खुमरी ओढ़े,दाई दीदी मोरा।

रावन मारे राम लखन तब, हे दीया देवारी।
गोवर्धन के करले पूजा,हे किसन संगवारी।
धरती के तै करले सेवा,सुग्घर धान कटोरा।
बइला नाँगर खुमरी ओढ़े,दाई दीदी मोरा।


तोषण चुरेन्द्र दिनकर
धनगांव बालोद छ.ग.

तिरंगा


आन बान शान देखो,मेरी पहचान देखो,
अंग-अंग खिले उठे,जिसकी मुस्कान में।

जिनसे सुबह शाम,सदा है उन्हें  सलाम,
मकहे है उपवन,बसी दिलो जान में।

सदा मेरे साथ रहे,मन अरदास करे,
आंच कभी आये नहीं,जान तेरी आन में।

नहीं छूटे साथ कभी,एक रहे मिल सभी,
प्रण करें मिल साथी,प्यार के जहान में।


तोषण चुरेन्द्र दिनकर

खेत जाबो न

आगा आगा आगा मोर गंवईहा किसान
मोर माटी के मितान 
चलो खेत जाबो न 
चलो खेत जाबो न......


हममन एखर लइका अन
ये भुंइया महतारी हमर हे
जियत मरत ले हावय रिश्ता
मया पीरीत पाटी अमर हे
आगा आगा आगा मोर गंवईहा किसान
मोर माटी के मितान 
चलो खेत जाबो न 
चलो खेत जाबो न......


करबो सोलह सिंगार संगी
धान कटोरा लहराही
सुआ करमा पंथी ददरिया
कोयली गीत सुनाही
आगा आगा आगा मोर गंवईहा किसान
मोर माटी के मितान 
चलो खेत जाबो न 
चलो खेत जाबो न......


धन-धन हे ये मोर जिनगी
कोरा मा एखर आयेंव
होवत संझा बिहनिया संगी
चरन मा माथ नवायेंव
आगा आगा आगा मोर गंवईहा किसान
मोर माटी के मितान 
चलो खेत जाबो न 
चलो खेत जाबो न......


तोषण चुरेन्द्र दिनकर
धनगांव बालोद छ.ग.

स्वतंत्रता दिवस


समीक्षार्थ

अरूणोदय के केसरिया आभा 
सुग्घर मन ला भावय।
उज्जर  बादर  देख के मन हा 
गीत मया के गावय।
डोंगरी पहाड़ी के हरियर रूखवा
लहर लहर लहरावय।
अइसन मोर सुहावन भुंइया
सुग्घर आजादी मनावय।


साहस शक्ति रग मा भरथे 
केसरिया के गुण हे।
विश्व शांति के देथे  संदेशा
सफेद रंग बड़ा पुन हे।
हरिहर देथे खुसहाली समरिद्धि
मन के आगर दुन हे।
तीन रंग झंडा मोर भारत के
महिमा हा जेकर बिधुन हे।


मान बढ़ाबो आवव एखर
जन गण मन ला गाबो।
रक्षा खातिर अपन जिनगी ला
घेरी बेरी बली बली जाबो।
तिरंगा के तीर मा आवव संगी
हिरदे ले माथ नबाबो।
लेके तिरंगा अब हर घर भइय्या
मिलके सब लहराबो।

रहे अमर आजादी परब ह
जन जन नारा लगावव।
देश भगति के अपन हिरदय मा
नवा नित जोत जलावव।
अखंड एकता भाईचारा ले
तन मन ला उजरावव।
हंसी खुशी सब राहव संगी हो
सबला गले लगावव।।।

©®
तोषण चुरेन्द्र दिनकर
धनगांव डौंडी लोहारा

जून्ना खेल

"कहां नंदागे जुन्ना खेल "

गांव-गांव खोर गली मा
सुन्ना होगे मइदान गा।
कहां नंदागे जुन्ना खेल
अउ खेलइय्या नदान गा।।

अटकन बटकन दही चटाकन
खुडुवा कबड्ड़ी सब खेलन।
आए मजा बड़ ठेल ठेलई मा
पचड़ंगा मा डंडा ल पेलन।।
रेस टिरीप मा रेस करे
पल्ला हमू कुदान गा।
कहां नंदागे जुन्ना खेल
अउ खेलइय्या नदान गा।।१॥

चुरी लुकउल दाढ़ी चिमकउल
नंदी पहाड के गुनइय्या नइहे।
चायपत्ती चायपत्ती पोसन पाय
गुल्ली डंडा के पूछइय्या नइहे।।
शेर नोहे रे कोलिहा हरे
हमू पहिली चिल्लान गा।
कहां नंदागे जुन्ना खेल
अउ खेलइय्या नदान गा।।२॥

बिसरत हावै फुगडी फल्ली
तिरी पासा अउ गेडी चढ़ई।
खेल-खेल मा मान मनउवा
खेल खेल मा होवन लड़ई।।
खेल खेलई मा तन हा बढ़िहा
एखर महत्ता पहिचान गा।
कहां नंदागे जुन्ना खेल
अउ खेलइय्या नदान गा।।३॥

आज हमन खेलत हन
खेल देख बिदेशी खेल।
बाल बेंट के पाछू मा सब
भागत हावन रेलमपेल।।
मिलना जुलना काहीं नइहे
काबर समय गंवान गा।
कहां नंदागे जुन्ना खेल
अउ खेलइय्या नदान गा।।४॥

परन करौ जुरमिल संगी
पुरखौती ल बचाना हे।
छत्तीसगढ़ महतारी के
कोरा सुघ्घर सजाना हे।।
दिया आरती धुप सजाके
करबो सब गुनगान गा।
कहां नंदागे जुन्ना खेल
अउ खेलइय्या नदान गा।।५॥

कहां नंदागे जुन्ना खेल
अउ खेलइय्या नदान गा।।

- तोषण चुरेन्द्र दिनकर

अमृत महोत्सव

🌸 आजादी के अमरित महोत्सव 🌸

तीन रंग के तिरंगा,
टंगाहे हमर छानी,

आजादी के इही हरे,
एक ठन अमर निशानी,

आवव तुमन ल सुनावव,
आजादी के कहानी,

बड़े बड़े नेता जनता,
दे दिन अपन कुर्बानी,

नेहरू गांधी सुभाष भगत,
लिखिन जेन कहानी,

डंडा खाइन फाँसी झुलिन,
अमर हमर सेनानी,

कतको उड़गे तोप म,
कतको गिन कालापानी,

देश के आजादी खातिर,
भुलागे घर के सियानी,

दाई दीदी बेटी माई के,
सुखागे आँखि म पानी,

तीन रंग के तिरंगा बर,
चढ़ा दिन अपन जवानी,

कोई खोइस बेटा बेटी,
कोई चढाईस धन दुगानी,

कतको बनगे सुभाष बाबू के,
आजाद हिन्द फौजी सेनानी,

15 अगस्त 1947 के,
लिखइस अमर कहानी,

शान से तिरंगा देखव,
टंगाहे सबके छानी,

आप सभी को स्वतंत्रता दिवस की हार्दिक बधाई एवं शुभकामनाये।
**अजय कुमार चौहान**
     🖋️देवरी बंगला🖋️

शुक्रवार, 12 अगस्त 2022

देश बर जीबो

पागा कलगी-15 ./2/आचार्य तोषण चुरेन्द्र दिनकर

शीर्षक:-देश बर जीबो देश बर मरबो
●
आही बइरी संऊहत आघु ओकरसे हकनके लड़बो 
जनम धरेहन देश के खातिर देश बर जीबो देश बर मरबो
●
अईस एक दिन अंगरेजी शासन देश म अत्याचार करिन
बन बइरी के दास देश ह कल्हर कल्हर हाहाकार करिन
करय निशचय भारत के बेटा कब तक पांव ल परबो
जनम धरेहन देश के खातिर देश बर जीबो देश बर मरबो
●
सन सनतावन म मंगल ह क्रांति के बिगूल बजाइस हे
भगत सुकदेव राजगुरू सब जुरमिल के सकलाईस हे
अपन स्वाधीनता के मान खातिर कहे सुली हम चढबो
जनम धरेहन देश के खातिर देश बर जीबो देश बर मरबो
●
वीर शिवाजी तात्या लछमी अंगरेज के बुता बनाइस
दूर करे अंगरेजी शासन अपन जिनगी ल दाव लगाइस
तिलक गोखले प्रताप जइसन छाती ल हमू अकडबो
जनम धरेहन देश के खातिर देश बर जीबो देश बर मरबो
●
गांधी सुभाष आजाद बिस्मिल दांव खेले अपन प्राण के
भारत भुंइया के रकछा करेबर निकले छाती तान के
स्वतंत्रता के लहरात तिरंगा हांथ म अपन पकड़बो
जनम धरेहन देश के खातिर देश बर जीबो देश बर मरबो
●
अमर शहीद बलिदानी मनके सपना एक दिन रंग लाईस
आईस पारी सन सडतालीस में हमर देश अजादी पाईस
ये भारत के अमर पुत्र बर सुघ्घर जयकारा करबो
जनम धरेहन देश के खातिर देश बर जीबो देश बर मरबो
●
अजाद होके अजाद नंइहन हम अजाद ये भारत म
एक दूसर ल कांटय बोंगय जिनगी के सुख स्वारथ म
ऊंच नीच के खंचवा म सुंनता के माटी सबडबो
जनम धरेहन देश के खातिर देश बर जीबो देश बर मरबो
●भारत माता की जय●
●रचना●
●तोषण चुरेन्द्र दिनकर●
●धनगांव डौंडीलोहारा●
●बालोद छत्तीसगढ़●

हर घर तिरंगा


अरूणोदय के केसरिया आभा 
सुग्घर मन ला भावय।
उज्जर  बादर  देख के मन हा 
गीत मया के गावय।
डोंगरी पहाड़ी के हरियर रूखवा
लहर लहर लहरावय।
अइसन मोर सुहावन भुंइया 
सुग्घर आजादी मनावय।


साहस शक्ति रग मा भरथे 
केसरिया के गुण हे।
विश्व शांति के देथे  संदेशा
सफेद रंग बड़ा पुन हे।
हरिहर देथे खुसहाली समरिद्धि
मन के आगर दुन हे।
तीन रंग झंडा मोर भारत के
महिमा हा जेकर बिधुन हे।


मान बढ़ाबो आवव एखर
जन गण मन ला गाबो।
रक्षा खातिर अपन जिनगी ला
घेरी बेरी बली बली जाबो।
तिरंगा के तीर मा आवव संगी
हिरदे ले माथ नबाबो।
लेके तिरंगा अब हर घर भइय्या
मिलके सब लहराबो।

रहे अमर आजादी परब ह
जन जन नारा लगावव।
देश भगति के अपन हिरदय मा
नवा नित जोत जलावव।
अखंड एकता भाईचारा ले
तन मन ला उजरावव।
हंसी खुशी सब राहव संगी हो
सबला गले लगावव।।।

©®
तोषण चुरेन्द्र दिनकर
धनगांव डौंडी लोहारा

छत्तीसगढ़ के चिन्हारी

यहू ला जानव

*"छत्तीसगढ़ के गाँव मन मा प्रयोग मा आनेवाला मशीन  औजार अउ सामान के नाम, विवरण अउ उपयोगिता-

*कलारी*- लकड़ी के बने औजार जे धान कोड़ियाये,पैरा अलगाय के काम मा उपयोग आथे। चना, गहूँ,अरसी अउ अन्य फसल ला घलो मिन्जे के बेरा कलारी उपयोगी होथे। ये लम्बा बांस मा कठखोलवा चिरई के मूड़ी बरोबर कोकवानी होथे।

*दॅतारी*- एक ले अधिक दाँता वाले लकड़ी के पाटा। कोदो मा दॅतारी मारे जाथे। छोट/हरु दॅतारी मा धान मिंजत बेरा पैरा ला घलो अलगाये जाथे। एक ठन बाँस मा एक लकड़ी फिट रहिथे,जेमा 7,8 ठन दाँता रहिथे।  भारी ला बइला खेत मा बइला तिरथे, छोट हरु ला मनखे खुदे खिचथे।

*कोप्पर*- कोप्पर लकड़ी के बने रहिथे जे धान, कोदो ला कोपराय के काम आथे। किसान मन कोप्पर ला नेवरिया बइला बछवा ला रेंगें बर सिखाये, खेत/ भर्री ला बरोबर करे आदि काम मा लाथे। एखरे कम वजनी रूप बख्खर कहिलाथे।

*ईरता*- ईरता बाँवत अउ बियासी बेरा उपयोगी होथे। खेत जोतत बेरा नांगर मा लेटा चिपकथे तेला ईरता के उपयोग ले निकाले जाथे, ये छोट लोहा के फरसा बरोबर बइला खेदारे के लउठी के नीचे जोती जुड़े रहिथे।

*आरी/तुतारी*- बइला खेदे के लउठी मा गड़े छोट खीला आरी कहिलाथे, एखर उपयोग बइला भइसा ला कोचे बर करे जाथे।

*चामटी*- बइला खेदारे के लउठी मा बंधे चमड़ा के रस्सी जेमा बइला ला नइ रेंगें ता मारे जाथे।

*खूँटा*- कोठा अउ दुवार मा गाय बाँधे बर भुइयाँ मा गड़े लकड़ी।

*पहुरा*- गाय गरवा बाँधे के अइसन छोट लकड़ी जेखर मुड़ी मा गरवा के गला के रस्सी अउ पूछी मा खूँटा मा फँसाय के रस्सी रथे।

*कोटना*- गरवा मन के पानी पीये के आयताकार पथरा के पात्र।

*धोनाही*- मिट्टी के गोल छोट गगरी जेमा धोवन फेके जाथे। 

*गरदेवा/केनउरी*- गाय गरवा के गला मा परमानेंट बंधे डोरी।

*खड़खड़ी*-  गाय गरवा के गला मा बंधे लकड़ी के घण्टी 

*लांहगर/लादका*- हरहा गाय गरु जे गला मा बंधे भारी लकड़ी।

*बिंधना*- लकड़ी ला मनवांछित आकार देय, छेद करे बर, काटे पीटे बर बिंधना उपयोगी होथे। चौड़ा नोक वाले पटासी बिंधना अउ पतला नोक वाले सुल्लू बिंधना कहलाथे। कई प्रकार के धार वाले बिंधना होथे। 

*बसुला*-  ये लकड़ी ला छोले के काम बर उपयोगी होथे।

*लोहाटी तारा/ताला*- करिया लोहा के जुन्ना ताला जेखर चाबी स्क्रुनुमा रहय।

*सँकरी*- दरवाजा/कपाट मा ताला देय बर लामे लोहा जे साँकल

*टँगिया*- लकड़ी काटे के औजार।

*खुरपी*- बन कांदी निकाले के औजार।

*रापा*- माटी जोरे संकेले के औजार।

*कुदारी*- माटी कोड़े के औजार।

*गैंती*- माटी कोड़े के काम अवइया कुदारी के बड़े रूप।

*हँथौडी*- ये खीला ठोंके के काम आथे, कुछु चीज ला फोड़े फाड़े बर घलो उपयोगी होथे।

*घन*- हथौड़ी के बड़े रूप,जे लकड़ी चीरे, लोहा लक्खड़ काटे बर काम आथे।

*धूम्म्स/धम्मस*-माटी कुचरे या दबाये के लोहा के बड़का पाटा असन औजार।

*छिनी*-लकड़ी फाड़े जे बड़का खीला, ये छोट, मोठ कई प्रकार के होथे।

*रोखनी/रेंदा*- लकड़ी ला प्लेन करे के काम मा आथे।

*भाँवरी/भँवारी*- लकड़ी मा छेदा करे के काम आथे। यहू आकार प्रकार के कई किसम के होथे।

*गिरमिट*- लोहा के औजार जेला घुमा घुमाके लकड़ी ला छेदा करे जाथे।

*हँसिया*- धान,कांदी, बन, दूबी लुवे तोड़े के काम आथे। साग भाजी घलो सुधारे जाथे।

*पैसुल*- सब्जी काटे के काम आथें।

*सब्बल/साबर*- भुइयाँ ला गड्ढा करे के लोहा के औजार।

*आरा/आरी*- लकड़ी चीरे के औजार।

*टेंवना*- लोहा धार करे के पथरा

*ठीहा*- लोहार, बढ़ई के घर गड़े लोहा या लकड़ी के टुकड़ा जेमा रखके लोहा ला पीटे जाथे अउ लकड़ी का काटे छाँटे जाथे।

*निहई*- टेंडग़ाय लोहा ला सोझ करे या मनचाहे आकार देय बर उपयोगी औजार।

*सुम्बा*- सुल्लू जघा मा ठोंकाय खीला खूंटी ला बरोबर करे बर उपयोगी।

*गुनिया*- कोन ला बरोबर मिलाय बर, खिड़की चौखट बनाए बर उपयोगी

*पेन्चिस*- खीला तिरे के काम आथे।

*सुजियारी*- खीला के अनुसार छेद ला बड़े करे के काम आथे।

*कनाछी*- लोहा ला धार दे के काम बर उपयोगी

*धमेला*- घर निर्माण बर उपयोगी लोहा के पात्र

*कौंचा*- घर निर्णाण में गारा मिलाये के काम बर उपयोगी

*फंटी/पाटा*- गारा सीमेंट ला बरोबर करे के काम आथें

*गोली*- ईंट जोड़त बेरा सोझ मिलाये बर काम आथें

*नकवार*- नाक के बाल आदि निकाले के चिमटा

*नाहनी*- नख काटे के औजार

*छूरा*- दाढ़ी बनाये के औजार

*चिमटा/ चिमटी/लोचनी*- आगी बूगी, काँटा खूंटी निकाले के बड़े छोटे लोहा के औजार

*सरोता*- सुपारी काटे के, बड़े हा आमा काटे के काम आथे।

*धुकनी*- लोहार घर रहय जेमा लोहा ला गरम करे।

*चाक*- कुम्हार घर के घड़ा/माटी के समान बनाए के मशीन

*घानी*- तेल पेरे जे मशीन

*टेड़ा/रहट*- पानी पलोये के मशीन।

*मंगठा*-कपड़ा बुने के मशीन।

*चरखा*- सुत काते के मशीन।

*मूसर*- धान/ कोदो छरे के लकड़ी के औजार जेखर तरी मा लोहा लगे होथे।

*बहाना*- बाहना मा ही धान कोदो ल रख के मूसर मा छरे जाथे।

*खलबट्टा/ओखली*- कूटे पीसे के काम बर उपयोगी, लोहा के ओखल।

*डंगनी/ अकोसी*- ऊपर के चीज ला अमरे बर बने बॉस।

*खलिहा*- आमा टोरे के झोला बंधे डंगनी।

*ढेंकी*- ढेंकी धान कूटे के काम आथे, येमा दू तीन आदमी एके संघरा काम करथे। कुछ मन ढेंकी के आघू भाग मा गोड़ ले अघाड़ी ला दबावत जाथे ता कुछ मन पाछू के बाहना मा धान ला डारे निकाले के काम करथें। ये देशी धनकुट्टी घलो कहिलाथे।

*घर लिपनी*- गोबर पानी भराय करसी जेमा घर ला लीपे जाथे, घर लीपे बर प्रयोग मा लाये चेन्द्रा पोतनी कहिलाथे।

*बाहरी*- घर दुवार बाहरे के झाड़ू।

*खर्रा*- कोठा/ बियारा बाहरे के राहेर काड़ी के गुच्छा।

*झंउहा*- गोबर कचरा हेरे, माटी फेके के काम बर उपयोगी बाँस के पात्र।

*सील-लोढ़ा*- चटनी हरदी मिर्चा पीसे बर उपयोगी पथरा।

*जाँता*- गहूँ, चना, अउ अन्य आनाज ला पिसान बनाये के हथ मशीन। कोदो जाँता, पिसान जाँता , ये बड़े छोटे प्रकार के होथे।, जेखर नाम घलो बदल जथे। जइसे जँतली, जँतुलिया,कोदो दरनी।

*पाउ*- जाँता मा लगे लकड़ी जेला धरके गोल गोल घुमाय जाथे।

*टिपली*- मिट्टी तेल रखे के डब्बा

*निसेनी*- चढ़े उतरे के लकड़ी के बने सीढ़ी

*चाँड़ी*- तेल ढारे के उपयोग मा लवइया टिन के नली दार  पात्र

*कुप्पी*- साइकिल,मशीन मा तेल डाले बर ये उपयोगी हे।

*गाड़ा*- बइला गाड़ी, खेती किसानी बर उपयोगी। 

*जुवाड़ी*-नांगर में जुड़ा के बीच के भाग जे मेर डाँड़ी आके मिलथे।

*नाहना*- चमड़ा के डोरी जे जुवाड़ी मेर बंधाय रथे, नाहना जुड़ा अउ डाँड़ी ला बाँधे रखथें।

*पंचारी*- जुड़ा के आखिर भाग के लकड़ी जे मेर बइला फंदाय रथे।

*जोंता*-नांगर जुड़ा के पंचारी मा बंधे डोरी जे बइला ला जुड़ा मा बाँधे रखथें। गाड़ा मा सुमेला मा बंधे रहिथे,अउ बइला ल सके जघा स्थिर रखथें।

*खाँसर*- गाड़ा के छोटे रूप,गांव गौतरी,मेला मड़ई जाय बर उपयोग मा लाये जाथे।

*घांघड़ा*- कौड़ी पट्टी युक्त बड़े घण्टी।

*कसेर गाड़ी*- टट्टा/ चापड़ बंधे गाड़ा।

*कोल्लर/लोदर*- बाँस के  टट्टा जे खूँटा तक  उठे रथे।

*चापड़ा*- गाड़ा मा लगे गोलाकार टट्टा

*नांगर*- हल

*जुड़ा*,- नांगर या गाड़ा के वो लकड़ी जेमा बइला फंदाय रथे, जुड़ा गाड़ा मा हमेशा बंधे रथे, जबकि नांगर मा जुवाड़ी कर नाहना मा बांधेल लगथे।

*बेलन*- अरसी, कोदो मिन्जे बर प्रयोग होवइया लकड़ी के भार युक्त गाड़ी।

*पटनी*- गाड़ा के डाँड़ी मा ठोंकाय पाटा।

*धोखर*- गाड़ा के चक्का के पहली वाले लम्बा पटनी जेमा माई खूंटा रहिथे,अउ बइला ला चक्का कोती आवन नइ देवय।

*खूँटा*- डाँड़ी अउ पटनी ला छेद जे गड़ाये गय बॉस या लकड़ी।

*अघाड़ी*- गाड़ा चक्का के आघू के पटनी।

*पिछाड़ी*- गाड़ा चक्का के बाद के पटनी।

*आरा*- चक्का के मूड मा गुथाये लकड़ी।

*पाठा/पुट्ठा*- आरा मा लगे लकड़ी, पुट्ठा  जुड़के गोल बनथे।

*पट्टा*- पाठा के ऊपर लगे गोल लोहा।

*चीपा*- पाठा अउ पट्टी के बीच गेप ला भरे बर ठोंके गय बॉस के टुकड़ा।

*मुड़*- चक्का के बीच के गोल लकड़ी।

*गुर्दा*- मुड़ मा फिट लकड़ी जेमा असकुड़ लगे रहिथे।

*असकुड़*- दोनो चक्का ला जोड़े बर बने लोहा।

*पोटिया*- असकुड़ ऊपर के बड़े खोल वाले लकड़ी।

*बैसकी* पोटिया ऊपर मा लगे लकड़ी जेमा डाँड़ी माड़थे।

*खीला* - असकुड़ के आखिर मा लगे रॉड, जे चक्का ला छेंके रखथें।

*धुरखिली*- पोटिया पटनी के मुख्य खीला।

*बरही*- डाँड़ी अउ जुड़ा के बंधना।

*धूरा*- गाड़ा के आघू के भाग जेमा दोनो डाँड़ी अउ जुड़ा बंधाय रथे।

*सुमेला*- जुड़ा के छेद मा लगाइया लोहा जेमा बइला फन्दाथे।

*सांकड़/ काँसड़ा*- बइला के गला के डोरी जे नाथ अउ केनवरी ले जुड़े होथे, जेला गाड़ा हाँकइया बइला ला काबू मा करे बर धरे रहिथे।

*केनवरी*- बइला के गला मा बंधाय डोरी।

*नाथ*- वो डोर जेमा बइला नँथाय रथे।

*टेकनी*- गाड़ा के धूरा मा टेकाय जाने वाला लकड़ी। ये गाड़ा ला खड़े करे बर उपयोग मा लाये जाथे।

*ओंगना*- गाड़ा के गुर्दा मा अण्डी तेल/ चिट ला चिकनाहट बर डारे जाथे।

*कंडील*- माटी तेल ले जलइया, काँच के गोल  छेंका मा बरत बाती।

*चिमनी/ढिबरी/भभका*- सीसी मा माटी तेल भरके ढक्कन मा बाती लगाके जराय जाथे।

*गियास*- देवारी तिहार बर कुछु प्लेट ला सजाके दीया ला बार के ऊँच आगास मा टांगना।

*तेल कुप्पी*- साइकिल या मशीन मा तेल डारे के छोटे डब्बा।

*गोरसी*- आगी तापे या आगी का रात भर छेना मा सिपचा/दगा के रखे बर उपयोग मा आने वाला माटी के टोकरी।

*पउला/फूला*- अनाज धरे बर बने माटी के छोटे पात्र

*कोठी*- अनाज धरे के बड़े पात्र

*ओंगना*- कोठी मा धान निकाले बर बने छेदा।

*पर्रा*- बॉस के बड़का पर्री।

*पर्री*- भात पसाये या तोपे बर बॉस के बने तोपना।

*तर्री*- जर्मन के तोपना

*बिजना*- बाँस के बड़े टुकना।

*सुताइल/रोखनी*-  छिले के काम बर उपयोगी।

 *चन्नी/चलनी* -  पिसान छाने के, चाउर चाले के काम बर।

*कोदई धोना*- कोदई धोय के काम बर उपयोगी,ये टिन के होथे।

*झेंझरी*- कनकी,कोदई धोय बर बॉस के टुकनी।

*चरिहा*- बॉस के बड़े टुकनी, धान पान नापे भितराये के काम

*सूपा*- छँटाई, निमराई,धान ओसई के काम बर उपयोगी।

*पउवा*- धान चाँउर नापे के पाव भर डब्बा।

*पैली*- एक किलो के डब्बा।

*काठा*- लगभग चार पैली धरउ लकड़ी या टीना के पात्र।

*झिपारी*- बरसात के पहली कोठ/ पर्दा ला पानी ले बचाये बर छिंद राहेर काड़ी अउ खदर मिलाके बनाये जिनिस। झिपार ले बचे बर घलो झिपारी के उपयोग होथे।

*मइरका*-पेंदी मा माटी छभाय करिया रंग के गगरी, जेमा आनाज आदि धरे जाथे।

*गगरी*- करिया रंग के माटी के बर्तन।

*गघरा गुंडी*- पानी भरके रखे बर ये उपयोगी होथे।

*कलौंजी*- साग राँधे के मिट्टी के बर्तन।

*ठेका*- दार चुरोये के माटी के छोटे बर्तन।

*गिरी*- गगरा, गुंडी ला बने मड़ाय बर जड़ या कपड़ा ला गोल गुरमेट के बनाय जाथे,एखर के गगरा गुंडी उंडे नइ।

*गूँड़ड़ी*- पानी लाने,माटी फेके के समय मूड़ ऊपर उपयोग मा अवइया कपड़ा, जे गोल गुरमेटाय रथे।

*बंगुनिया*- पीतल के छोट बर्तन।

*बटलोईया*- स्टील के छोटे मुंह वाले गोल बर्तन।

*गंज*- पीतल या स्टील के बड़े मुँह के बर्तन।

*गंजी*- पानी भरे,खाना बनाये के जर्मन के बर्तन।

*बॉल्टी*- कुँवा ले पानी निकाले के लोहा बर्तन, आजकल स्टील बाल्टी घलो पानी भरे के काम मा आथे।

*माली/कटोरी/कोपरी*- काँच/ स्टील के बर्तन

कुटेला-कपड़ा धोय या कोनो सुखाय फसल ल कुचरे के काम अवइया लकड़ी के  गोल या चाकर पटिया

मुड़ेसा- कपड़ा ले बने मोठ छोट गोल चाकर गद्दा जेन मुड़ के तरी सोवत बेर उपयोग होय।

चुरोना  - जादा या मोठ कपड़ा ल  धोय बर निरमा म डुबोना।

टठिया-- खाय के थाली जेला थारी घलो कथन

मुड़सरिया-तकिया कोती, मुड़ कोती

गोड़सरिया- गोड़ कोती

ओढ़ना..ओढ़े के

दसना...बिछाए के, बिस्तर

कोपरा ..परात

बटुवा.... भात राँधे के बर्तन

हँउला....पानी भरे के गुंडी या गगरी

मलिया,थरकुलिया...प्लेट..

सइकमी/सइकमा- बासी खाय के बटकी

कुंड़ेरा....माटी के दूध चुरोय के बर्तन..

*सुपेती*....रजाई

*कईधोना*= चाउर धोय के

*होमाही*= हूम देके

*तखत*=बइठे के लकड़ी के बाजवट जेंन सोय के घलो काम आवय

*करची*-जर्मन के बर्तन जेन भात बनाए के काम आथे

*जांँता*-अनाज पीसे के चक्की

*ढकेल गाड़ी* -लइका मन के गाड़ी

*तख्ता*-जमीन में बिछाय वाला,जेमा पहिली दर्जी मन कपड़ा काटे

*कागज के टुकनी*-  टुकनी

 *मरपरई*- सिसली गोरसी,कम गहराई के

*कजरौटी* काजर धरे के

*सुराही*-पानी भरे के 

*ढेरा*-रस्सी बनाय के 

*भँदई*-चमड़े का सेंडिल नुमा चप्पल जेला अक्सर राउत मन पहिरे ।

*मोरा*- पाना या झिल्ली से बने हुए  बरसाती जेला मुड़ी मा टाँग के ओढ़े जाथे।

*खुमरी*- पाना, कमचील या झिल्ली से बने हुए बड़का टोपी कस  बरसाती 

*संदूक*- पेटी

*धूसा*- बड़का साल जेला कंबल बरोबर ओढ़े जाथे।

*खोल*- कथरी जे उपर जे कपड़ा/गद्दा रजाई में चढ़ाने वाला कवर।

*पार्खत*- तामा के बने नान्हे मलिया जेमा भगवान के मूर्ति ल नहवाय जाथे।

*नेवार*- पलंग मा गंथे नायलोन/कपड़ा

*मचोली/माची*- छोट खटिया

*भेलवा*- लकड़ी के *झूलना*

*खूँटी*- बाँस के लकड़ी जे कोठ मा गड़े रहे

*मोरा*- बरसात मा ओढ़े के पन्नी

*पौतरा*- प्लेट

*कोपरी*-  गड्ढा वाले प्लेट

*कठौता*- लकड़ी के बर्तन

*फूलबहिरी/काँसी बहिरी/छीनबहिरी/खरेटा बहिरी/खरहेरा बहिरी/ झारिनि*- झाड़ू

*मोड़ा*- बइठे के 

*ठप्पा*- चौंक चाँदन पुरे के छेदरहा डब्बा

*पिल्हर/ मुड़की*- भारन

*चौखट*- दरवाजा के आधार

*कुँदवा खुरा*- खटिया के कुंदाये खुरा

*पठेरा/खोलखा*-कोठ के भीतर बनाय आलमारी

*तुमड़ी* --खेत जाय तब पानी भर के ले जाय, ये तुमा के बने रहय, जब तुमा सूखा जाय तब वोला बनाय।

*खड़ाऊ*- लकड़ी के चप्पल

*अकतरिया* -खेत खार म कांटा खूंटी ले बांचें बर महतारी मन पहिरे सेंडिल नुमा चप्पल

अरगेसनी- घर मा कपड़ा टांगें अउ सुखोय बांस के लकड़ी के

*भंदई* - चमड़ा के बने सेंडिल जइसे चप्पल

*कांवर* - लगभग 4-5 फीट फिट लंबा बांस के दूनों छोर मा जोंति लगा के पानी लाये बर उपयोग करे जाथे

*सिंगार पेटी*- सिंगार के समान रखे के बॉक्स

*मर्रा*-मुड़ कोरे के ककवा/कंघी

*कुरो*=धान नापे के

*पटका*- टॉवेल

*अँगोछा*- पानी मा भींगो के पोछे जाय वाले फरिया/कपड़ा

*गोदरी /कथरी*- सूती लुगरा के मोटा बिछोना

*झाँपी*- बाँस के बड़े टुकना

【रँधनी खोली ले संबधित कतको अकन समान अउ हे जइसे,--*गोरसी (मरपरई),पीढ़ही/ पीढ़ा,माली(काँसा का छोटा प्लेट),फुलकसिया लोटा, फुलकसिया थारी,
बटकी,कोपरा,कोपरी,झारा,डुआ,डुई,पलटनी,सइतमा,थारी,लोटा,गिलास,भँवराही,बटकी,कसेली,दइहा,मइरसा,मथनी,घम्मर,सीका,गिरि,हँउला,मरकी,गगरा,गगरी,घैला,दोहनी,
दुहना,तउला,ठेकवा,लकड़ी,चिल्फा,झिटका,परइ,कनौजी,तोपना,सील,लोढ़ा,पर्रा,पर्री,टुकनी,फुँकनी,अथनहाँ,मरकी,सरकी,दरी,पिढ़वा,फुला,पठेरा,घनौची,एकमूँहा चूल्हा,दुमुँहा चुल्हा,अँगेठा,अँगरा,कोइला, खोइला,तउला, चाक-कनौजी के दूसरा किसम,चँदाही-सबो किसम के थारी,लेन्च-सबो किसम के बाल्टी-बाल्टा, गोड़ही लोटा-गोड़ा वाला लोटा,खूराही गिलास-खूरा वाला गिलास, गोड़ही बटकी-गोड़ा वाला बटकी, भँवराही बटकी-बिगन गूरा वाला,ढिबरी, चिमनी, चटिया-मटिया, कुड़ेरा, डेचकी, चन्नी,कोटना, फरिया, चेंदरा( कपड़ा), फोरन, सुखसी*】

जीतेन्द्र वर्मा"खैरझिटिया"
बाल्को, कोरबा(छग)

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय