शनिवार, 30 नवंबर 2024

जिनगी हरियर पाना(बांसगीत)


नरनारे नानारे नाना, नरनारे नानारे नाना 
--नरनारे नाना नारे नारे हो

जिनगी हे हरियर पाना,पाछू परे अइलाना
झन कर तै बिरथा गुमान हो
--छूट जइहैं रे परान, ले जाही तोला शमशान हो,,,

जीयत के संगी साथी,मरके तैं होबे माटी
करले तैं हरि गुन गान हो
--मुक्ति पइबे तहान,भाग मानी काया ल तैं जान हो,,,

चार दिन दाई ददा रोही,दू दिन सुवारी रोही
बाकीं के सब दिन समान हो
--देखत रइहैं जहान, माया के लगे हे दुकान हो,,,

माटी के ओढ़बे ओढ़ना, माटी के रही जठना
माटी के लगही सिरहान हो
--अतरी ला सच तैं जान,माटी के रइहैं तोर मकान हो,,,

आये बर आथे सब झिन,जाये बर जाथे एक दिन
संझा रतिहा अउ दिनमान हो
--देवंव कतिक परमान, म इनखे गरीब या धनवान हो,,,

जीयत भर मोरे मोरे, फेर कहां ले तोरे
खाही नाती नतरा नादान हो
--तोषन के बात ल मान,काहत हे सिरतो ईमान हो,,,,


रचनाकार 
तोषण चुरेन्द्र 'दिनकर' 
धनगाँव डौंडी लोहारा 
बालोद छत्तीसगढ़

मंगलवार, 26 नवंबर 2024

टुरी खोजइ


एक छोटे से प्रयास

नान्हें कहिनी

*टुरी खोजइ....*

"बड़े बिहनिया जाड़ बतास के दिन म कहां जावत हो जी? हाड़ा गोड़ा ठंडा परत हे इहा।" मंगलू किहिस।

            "टुरी खोजइ चलत हे कका।चल ना आज कहूं डाहर तही ह लेग।" समारू कहिस।
मंगलू कथे चल ना त लेगत हँव। अइसे कहिके समारू अउ मंगलू ह बुधारू ल धर के टुरी खोजे बर निकल गे। 
            एक ठन गांव मा पहुंचिन । त उंहा एक जगा दुकान कर सियान बइठे राहय तेला मंगलू ह पूछिस " कइसे बबा , इँहा बिहदरा टुरी मिलही का ? सियान कथे "हावय जी फेर कइसन ढंग के खोजत हव ते? " हमन किसनहा खेती कमइया खोजत हँन बबा।" समारू किहिस। 
            अतिक बात ल सुन के सियान कथे " फेर तो हमर गाँव म टुरी मिलना मुश्कुल  हे सगा। काबर के आज के स्थिति परिस्थिति ल देखथों ते टुरी मन पढ़ लिख के बइठे बइठे हे। अउ आजकल के टुरा मन खाली पीली होगे हे।उँखर पढइ लिखइ ह पिछड़ गेहे। क्षमा चाहत हँव सगा तुँहर लइक टुरी मिलना मोला नी ममहात हे।"
 
           सियान के बात ल सुन के समारू मंगलू ह बुधारू ल कथे " देखे रे बाबु! बने पढ़ लिख केहेंन रे। नइ मानेस ,खाली मोबाइल अउ घूमइ फिरइ। आज देखत हस निही। पढ़े लिखे के चक्कर मा टुरी घलक नइ मिलत हे। बने पढ़े लिखे रतेस त आज अइसन दिन देखे बर नइ मिलतिस । अब ले तिही देख बर बिहाव करे बर अउ टुरी खोजे बर सोचेंल ल लागत हे।"

बुधारू अपन मुँहु करे चुपेचुप मुस्कुरात राहय।


तोषण चुरेन्द्र 'दिनकर' 
धनगाँव डौंडी लोहारा 
बालोद छत्तीसगढ़

मया के आगी


ई पत्रिका अग्घन महिना बर 

मया के आगी....

आवत गजब दिन भइगे सुरता तोर आगे ओ
तोर मया के आगी मा जाड़ सबो भगागे ओ

गए रेहे ओढ़ा के काली मया सनाय साल ला
देखत देखत बिदा करेंव गोर गुलाबी गाल ला
गोरसी भीतरी चुरे अंगाकर चटनी लदफदागे ओ
तोर मया के आगी मा जाड़ सबो भगागे ओ....

आवत हावँव दू दिन कहिके महीना भर रबक गे
दार घोंटरहा नइ चुरे चिबरहा भात फदक गे
चाय बनाय के चक्कर म खरहा नून डरागे ओ
तोर मया के आगी मा जाड़ सबो भगागे ओ


सरदी गरमी जाड़ हा सबर दिन ओ आही जाही 
बंधना जीयत मरत के कभू तो नइ सिराही
तोर पीरीत के परसा फूल पागा म लहलहागे ओ
तोर मया के आगी मा जाड़ सबो भगागे ओ


तोषण चुरेन्द्र 'दिनकर' 
धनगाँव डौंडी लोहारा 
बालोद छत्तीसगढ़

सोमवार, 25 नवंबर 2024

जपत रथों तोर नाव



 मेह जपत रथों तोर नाव प्रभु ,मोर बिगड़ी बनादे आजा 

मेह लेवत रथों तोर नाव प्रभु ,मोर बिगड़ी बनादे आजा 

--- मोला पार लगा दे आजा , आके दरश तै मोला देखाजा 

मेह जपत रथों तोर नाव प्रभु -----


कल्पत हे जीवरा तोर दरश बर , नैना मा आके समाजा 

पानी बिना मशरी कस तड़पव , प्यास तै मोरो बुझाजा 

तोर बिना जिनगानी अबिरथा , कइसे ये जिनगी पहाही 

नइ आबे तैह  मोर जिनगी मा, जान घलो चले जाही

---मोर डोंगा नहकादे आजा , आके दरश तै मोला देखाजा 

मेह जपत रथों तोर नाव प्रभु -----


केवट शबरी जटायु ला तारे , 

रविवार, 24 नवंबर 2024

दीया आतम ज्ञान के





मछरी ताके कोकड़ा, राहय गोड़ जमाय।
जइसे आवय तीर मा, बीनय टपले खाय।।

आज चढ़ावँव फूल मँय, गुरू चरन के तीर।
जेकर महिमा हे बड़े, पग-पग गढ़थे वीर।।

दीया आतम ज्ञान के, करथे बड़ा अँजोर।
होथे खुश ये साधु रे, बगरे जग मा शोर।।

लीप पोत के राखिले, दीदी तहुँ दुवार।
लछमी दाई आत हे, सुग्घर हवय तिहार।।

लीप पोत के राखिले, दीदी तहूँ दुवार।
लछमी दाई आत हे, सुग्घर हवय तिहार।।

धनतेरस दीया जले, धनवंतरि के नाँव।
जिनगी सबके सुख रहय, सुग्घर जगमग गाँव।।

रघुपति राजाराम जी, अवधपुरी हरषाय।
पूरा भारत वर्ष मा, जगमग दीप जलाय।

भगा जथे अँधियार हा, संझा बिहना होत।
चंदा सूरुज जस दिखे, दीया के जगमग जोत।

उदाहरण दे के कहय, हमर गुरू महराज।
चौकल मिझरा अउ त्रिकल, सुग्घर दोहा साज।

टिकली लछमी बम धरे, लइका दउड़े खोर।
छुरछुर-छुरछुर छुरछुरी, अनारदाना थोर।।

मछरी ताके कोकड़ा, राहय गोड़ जमाय।
जइसे आवय तीर मा, बीनय टपले खाय।।

आज चढ़ावँव फूल मँय, गुरू चरन के तीर।
जेकर महिमा हे बड़े, पग-पग गढ़थे वीर।।

दीया आतम ज्ञान के, करथे बड़ा अँजोर।
होथे खुश ये साधु रे, बगरे जग मा शोर।।

लीप पोत के राखिले, दीदी तहुँ दुवार।
लछमी दाई आत हे, सुग्घर हवय तिहार।।

लीप पोत के राखिले, दीदी तहूँ दुवार।
लछमी दाई आत हे, सुग्घर हवय तिहार।।

धनतेरस दीया जले, धनवंतरि के नाँव।
जिनगी सबके सुख रहय, सुग्घर जगमग गाँव।।

रघुपति राजाराम जी, अवधपुरी हरषाय।
पूरा भारत वर्ष मा, जगमग दीप जलाय।

भगा जथे अँधियार हा, संझा बिहना होत।
चंदा सूरुज जस दिखे, दीया के जगमग जोत।
 
उदाहरण दे के कहय, हमर गुरू महराज।
चौकल मिझरा अउ त्रिकल, सुग्घर दोहा साज।


टिकली लछमी बम धरे, लइका दउड़े खोर।
छुरछुर-छुरछुर छुरछुरी, अनारदाना थोर।।

भेजत हावँव नेवता, मातर हवय तिहार।
लइका सियान अउ सगा, आहू सब परिवार।।

पड़ही दिन इतवार के, तारीख हवय तीन।
रस्ता देखत गा रही, तोषण दिनकर दीन।।

गइया बछरू साज के, धरे सिघोटी सात।
गोवर्धन के हे परब, खाही खिचरी भात।।

बबा कहे लउठी धरे, सुन ले नाती मोर।
काम बुता मा ध्यान दे, झन घूम गली खोर।।


चलव लुये बर धान गा, मिलही बढ़िया दाम।
काम बुता के दिन कका, करहू का आराम।।

नहा खोर तइयार हो, जल्दी से जा स्कूल।
पढ़ लिख बन हुँशियार तँय, मोर डिही के फूल।।

हावँव आरुग लेड़गा, अछरा छँइहा राख।
तोर दुलरवा लाडला, बनहूँ तोरे शाख।।

मात पिता गुरु के चरन, रचे बसे हे धाम।
करले सेवा रात दिन, भगति भाव निष्काम।।

धुकुर धुुकुर जिवरा करय, कलपे छाती मोर।
आथे सुरता जब कभू, झूमे पवन चकोर।।

कुकरा बासत जाग के, करले कसरत थोर।
तन मन सब फुरती रही, बात मान ले मोर।।
 
पालक भाजी चँवलई, गुरतुर लागय साग।
हवय बिटामिन ले भरे, तन के जागे भाग।।


बेध डरे हिरदे बही, नयना तोर कटार।
होगय मन ये बावरा, सौ डिगरी के झार।।

------दाई -----

दुरगा काली रणचंडी, कतको हावय रूप।
करँव आरती मात मँय, रके चंदन धूप।।

रंग रूप सब तोर हे, दाई तोर परान।
दया मया बरसे सदा, जग मा तहीं महान।।

ये जिनगी के साँस तँय, मोर तहीं भगवान।
मानँव मँय दाई ददा, हावस मोर परान।।

-----पूस -----

पावन महिना पूस के, करलव सूरुज ध्यान।
किरपा करथे जानलव, रक्षक दया निधान।।

पड़थे सरदी पूस मा, कथरी चद्दर ओढ़।
पी ले पानी तँय गरम, ठंडा जीनिस छोड़।।

जाड़ घलक बड़ लागथे, आथे महिना पूस।
सिमचा आगी गोरसी, गुड़हा चाहा चूस।।

-----जिज्ञासा----

मन जिज्ञासा मार के, बोधी बनगे धीर।
बन संतोषी बाँकुरे, हरलिस जग के पीर।।

हरलिस जग के पीर हे, नीलकंठ भगवान।
जिज्ञासा सब छोड़ के, करलिस हरि के ध्यान।।

करलिस हरि के ध्यान सब, जिज्ञासा हरिधाम।
करम करे निष्काम ले, का चिंता परिणाम।।

जिज्ञासा के रेल मा, झन तँय पछलिग भाग।
माया के मन बन फिरे, सुन भइया अब जाग।।

सुन भइया अब जाग तँय, लालच गगरी फोड़।
जिज्ञासा कभु नइ थके, कतको आवय मोड़।।

----बिहान----

होही नवा बिहान कब, देखत हवय किसान।
दाम सही कब झोकबों, चिन्ता करय सियान।।

होगे हवय बिहान अब, छागे खुशी अपार।
दाम सही अब देत हे, एसो के सरकार।।

चटनी बासी जोर के, लुए चलव सब धान।
सूरुज चढ़य बिहान के, काहत हवय किसान।।

----पताल ----

चटनी पीस पताल के, धनिया मिरचा डाल।
अंगाकर रोटी बने, खा दे दे के ताल।।

चिरपोटी के गुन बड़े, देशी हवय पताल।
पीसले चटनी सील मा, रहिथे स्वाद कमाल।।

मँहगा हवय पताल हा, कइसे चुरही साग।
कइसन दिन आगे कका, फूटय हमरो भाग।।

----मिठास----

भरे कपट मन भीतरी,  बहिरी रखय मिठास।
भल मानुष तँय हस सखा,  झन तँय रखबे पास।।

मिट्ठा बोले कोयली,  जग ला आवय रास।
अइसन घोल मिठास के,  रखलव सब झन पास।।


सचिव बैद गुरु तीर सब , राखव बोल मिठास।
राज धरम तन के कभू,  नइ होवय जग नास।।


तोषण चुरेन्द्र 'दिनकर'

सुराज



सुराज


पढ़े लिखे सबझन रहय , पूरा गाँव समाज।

गाँधी जी के कल्पना , सुग्घर ग्राम सुराज।।१।।


जात पात के भेद ला , मेटिस भाभा राव।

दीया नवा सुराज के , जुरमिल सबो जलाव।।२।।


संविधान लिख भीम जी , गढ़ दिस नवा सुराज।

समानता अधिकार हे , देखय देश समाज।।३।।


जन-जन के कल्याण बर , लाबो ग्राम सुराज।

होही देश विकास गा , ठानव मन मा आज।।४।।


हक सुराज के देश बर , होगे सुत बलिदान।

अजर अमर इतिहास में , बढ़गे जेकर शान।।५।।


गढ़बो नवा सुराज हम , भारत के हम लाल।

मरबो खातिर देश के , लेके हाथ कमान।।६।।


तोषण चुरेन्द्र 'दिनकर '

महान



 महान


लाल बाल अउ पाल जस, जग मा बनव महान।

सुरता करही एक दिन,सिरतो सकल जहान।।


सुमता के रस्ता गढ़व, करलव करम महान।

पीढ़ी हमरो सीख ले, अतका करव सुजान।।


बिना करम के हे सखा, बनथे कोन महान।

पढ़ले तै इतिहास ला, पढ़ले पोथ पुरान।।


भारत मोर महान हे, रंग रंग के वेश।

बोली भाखा हे अलग, बड़ सुग्घर ये देश।।


अंग दान जग बर करिस , धीर दधीचि महान।

बिन स्वारथ के काज बर, तजे अपन जे प्रान।।


शिक्षक बनके ज्ञान के, भरिस अमिट भंडार।

महिमा हवय महान जी,वंदन लाखों बार।।


गजानंद गुरुदेव के, जनम दिवस हे आज।

गुरुजी हमर महान हे, करे सृजन बर काज।।


गुरु हे गुड़ के पोटली, ज्ञान अमृत के खान।

जेकर पुण्य प्रताप ले, चेला बनय महान।।


चेला गुरु चाणक्य के, वीर अशोक महान।

घनानंद ला मात दिस, जानय सकल जहान।।


नौ महिना ले कोख मा,दाई रखे सुजान।

लवकुश जइसे पालथे,महिमा हवय महान।।


तोषण चुरेन्द्र 'दिनकर'

किसान

 



किसान


माटी-माटी खेत हे , माटी हवय बँधान।
माटी के सेवा करे , माटी पुत्र किसान।।१।।


नाँगर जोतँय खेत मा , हलधर मोर किसान।
सुख समृद्धि  देश के , सोन रंग हे धान।।२।।


भंडारा अन धन भरे , मोर नगरिहा लाल।
महिनत करे किसान बन , करथे देश निहाल।।३।।


हीरा मोती खेत मा ,उपजावत  हे आज।
वंदन करव किसान के , दीप आरती साज।।४।।


दर्रा हानय खेत हा , चिन्ता करे किसान।
अब पानी बादर बिना ,कइसे पाकय धान।।५।।

तोषण चुरेन्द्र 'दिनकर'

शुक्रवार, 22 नवंबर 2024

सियान


एक छोटे प्रयास 

सियान

बइठे सिमचा के बिड़ी, कहिथे गोठ सियान।
बिन स्वारथ के बाँटथे, साधु बरन जी ज्ञान।।

पेड़ बरोबर हे रथे, पीपर कस दे छाँव।
अइसन हवय सियान जी, गली खोर हर गाँव।।

बदरा छाँट निमार के, बात करय बड़ पोठ।
बुढ़हा बबा सियान के, सुनव गुनव सब गोठ।।

मानौ गोठ सियान के, चलव न मनके चाल।
मुड़भसरा तैं गिर जबे, बिगड़ जही सब हाल।।

अटकन बटकन खेल ले, मिलथे हम ला ज्ञान।
जनम मरन के सार हे, कहिथे गोठ सियान।।

गदहा बने सियान जब, करथे शेर बिचार।
वोट कभू झन होय जी, कइसे मीत सियार।।

लललड़ रही सियान जब, लललड़ दिखही चाँच।
झूठ लबारी झन कहव, सच मा काके आँच।।

थूक थूक मा नइ चुरे, कइथे बरा सियान।
हाथ लमाबे तब मिले,ओ बाजू के कान।।

हबले झन तैं गोठिया, कहिथे हमर सियान।
मीठा बोली चासनी, गदगद होथे कान।।

तोषण चुरेन्द्र 'दिनकर'

रविवार, 10 नवंबर 2024

राखिले चरन मा

राखिले चरन म तोरे राम जी मोर राम जी
तोर छोड़ नइहे मोर ठिकाना
कहां जाहूं मोला तिही बताना ,,,, बताना

तृष्णा के मिरगा आघू पीछू दउड़े,माया के रास रचाथे
लोभ के डबरा हावे बड़ा गहरा,कठपुतरी कस नचाथे
दुनिया ले हावँव मैं बेगाना
तोर तीर लगे आना जाना,,,आना जाना
राखिले.....

चरदिनिया हे काया ये संगी,संग कोनों नइ जावय 
भाई भतीजा जीयत भरके,मरे कोनों नइ भावय
हावय जग रीत ये पुराना
उड़ा जाही जस डारा पाना,,,डारा पाना
राखिले....

कृति
तोषण चुरेन्द्र 'दिनकर' 
धनगाँव डौंडी लोहारा बालोद छ ग 
9575070689 // 6267538036

शुक्रवार, 1 नवंबर 2024

तोर नाक के नथनी

*तोर नाक के नथनी...*

तोर नाक नथनी मा, गोरी मोर दिल अटके 
तोर कान के झुमका मा,रानी मोर दिल अरझे
गोरी ओ मोर दिल अटके,रानी ओ मोर दिल अरझे
तोर नाक के.....तोर कान के...

1
मोहनी सुरत तोर दिल ल लुभावय
कारी कारी अंखिया छुरी ल चलावय
हिरणी कस रेंगना चाल मतवाली
बिजली गिराये तोर होंठ लाली लाली
तोरेच कोती दिल भटके,हाय रे रे तोर चाल हटके
तोर नाक के.....तोर कान के...

2
छम छम पायलिया नींद ल उड़ावय
सारी सारी रतिहा सुरता सतावय
तोर बिना रानी मोला आवय नहीं चैना
खोये खोये दिन बीते जागंव सारी रैना
मया के बिना दिल तड़पे,रानी ओ मोर दिल कलपे
तोर नाक के.....तोर कान के...

3
सपना मा आथस जिनगी मा आजा
मैंह तोर कान्हा अउ तै मोर राधा
मया के बिरहा अब नइ सकावय
तोर बिना जिनगी कइसे ममहावय
कते तीर रबे सपटे,मया के घटा बरसे
तोर नाक के.....तोर कान के...

गीतकार
तोषण चुरेन्द्र दिनकर 
धनगाँव डौंडी लोहारा 
बालोद छ ग 
9575070689 6267538036

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय