आबे ओ दाई मोर
जँवारा बोये हावँव गांव मा
देखत रहिहँव लीम छांव मा
देखत रहिहँव लीम छांव मा
आबे ओ दाई मोर....
चइत के महिना दाई करसा सजाएँव ओ
नवदिन रतिहा दाई तोला मनाएँव ओ
सरधा के दीया बाती मैंहा जलाएँव ओ
आ जाबे दुर्गा मइय्या नैना बिछाएँव ओ
हे अम्बे ओ जगदम्बे ओ
जँवारा बोये हावँव गाँव मा
देखत रहिहँव लीम छाँव मा
फूल मोंगरा के मइय्या गजरा बनाहूँ ओ
टिकली फूँदरी लाली चुरी तोला चढ़ाहूँ ओ
लाली सवाँगा दुरगा तोर बर लाहूँ ओ
पाँव पैजनिया माता माहूर लगाहूँ ओ
काली ओ शीतला ओ
जँवारा बोये हावँव गाँव मा
देखत रहिहँव लीम छाँव मा
चंदा सूरूज मइय्या खड़े अगोरा मा
बइठे भगत माता तोरे निहोरा मा
जग ला खेलाबे दाई मया के कोरा मा
बइठे हँव जोरा करके दाई चँगोरा मा
मइय्या हो अम्बे हो
जँवारा बोये हावँव गाँव मा
देखत रहिहँव लीम छाँव मा
तोषण चुरेन्द्र दिनकर
धनगांव डौंडीलोहारा बालोद छत्तीसगढ़
कोई टिप्पणी नहीं:
एक टिप्पणी भेजें