तत्कालिक सृजन समीक्षा अउ आशीर्वाद मिले
जाड़ बतास के बरसा
देवइ लेवइ सब तोर हाथ म
सुने रेहेन भगवान जी।
रही रही के पानी बरसाथस
सिरतोन गउकी ईमान जी।
परे हे करना माढ़े हे खरही
सुन्ना कोठार मचान जी।
जाड़ बतास झोरे बरसा,
हम किसनहा होगेंन हलकान जी।
जब पाय तब तोर मनमानी हे
मचे हावय उतपात हा।
धान के संसो म दिन ठूठर गे
कटकट करत हे रात हा।
महिनत करेंन जाँगर टोरेन
हजम नइ होइस हमर बात हा,
बरसा के घानी म जिनगी पेरागे
कब पूरही बता तोर पाँत हा।
मरन देथस न मोटान देस
तोर बात समझ नइ आवय।
बिन मउसम बरसात के तै
पाँव पुट पानी गिरावय।
करम फाटगे जुग बुड़गे गा
किसान सबो गोहरावय।
धरेक पुछी न सुने बर कान
कोन काकर सोरियावय।
गोरसी म बंग-बंग आगी सुलगे
बइठे हन खटिया कोरा मा।
तन के हाँड़ा गोड़ा जुड़ागे
जुड़-जुड़हा पवन झकोरा मा।
रिस ते झन कर करिया बादर
मोर धनहा के कटोरा मा।
मान जा कहना बिनती सबो के
रोवत नैना अगोरा मा, रोवत नैना अगोरा मा।
तोषण चुरेेन्द्र दिनकर
धनगांव डौंडीलोहारा बालोद छत्तीसगढ़
६/१२/२०२३/९:२६पूर्वान्ह
कोई टिप्पणी नहीं:
एक टिप्पणी भेजें