*ददरिया*
पीपर के रूख ले गिरेला पीकरी
तोर चेहरा ल लुकाये हावंव गा करेजा भीतरी गा मोर मयारू मोहना , मोर मयारू मोहना गा
मोर कारी करौंदा मोर मन के मिलौना जोहत रहिहौं तोला ना रे दोस।
सावन के साँवा भादो के कांशी ओ
मोर मन ल लुभावै रानी तोर मुच मुच हांसी ओ , मोर मयारू मोहनी , मोर मयारू मोहनी गा
मोर कारी करौंदा मोर मन के मिलौना जोहत रहिहौं तोला ना रे दोस।
आमा के रूख म बोल थे मैना गा
चार दिन के अवइय्या जँवारा लगाये महिना गा मोर मयारू मोहना , मोर मयारू मोहना गा
मोर कारी करौंदा मोर मन के मिलौना जोहत रहिहौं तोला ना रे दोस।
संझा के बेरिया ओईले ला बरदी
जादा चिंता झन करबे मयारू रंगाबो हरदी ओ , मोर मयारू मोहनी , मोर मयारू मोहनी ओ
मोर कारी करौंदा मोर मन के मिलौना जोहत रहिहौं तोला ना रे दोस।
नवा रे लुगरा किनारी गंथना
जुग जुग झन टूटे रे संगी मया के बंधना गा ,
मोर मयारू मोहना , मोर मयारू मोहना गा
मोर कारी करौंदा मोर मन के मिलौना जोहत रहिहौं तोला ना रे दोस।
मया के अंगना मया के कुरिया
छूट जाये ये जमाना ओ बही झन होबे दुरिहा ओ , मोर मयारू मोहनी , मोर मयारू मोहनी गा
मोर कारी करौंदा मोर मन के मिलौना जोहत रहिहौं तोला ना रे दोस।
रचनाकार
तोषण चुरेन्द्र "दिनकर"
धनगाँव डौंडी लोहारा
बालोद छत्तीसगढ़
कोई टिप्पणी नहीं:
एक टिप्पणी भेजें