शुक्रवार, 9 अक्टूबर 2026

लहराये भुवन जोत जंवारा


लहराये भुवन म तोर ओ दाई
(छत्तीसगढ़ी जसगीत)

लहराये भुवन म तोर ओ दाई, हरियर सुघर जँवारा
रिगबिग सिगबिग तोर फूलवरिया,
दमकत हे आरा पारा ओ, दमकत हे आरा पारा
लहराये भुवन म तोर ओ दाई, हरियर सुघर जँवारा 

चैत कुंवार के पावन महिना, मेला भरावय भारी
दरसन बर दुनों नैना तरसे, हे शक्ति के अवतारी
नवरूप हे तोर हे जगजननी, सिंग्ह के करे सवारी
दया मया बगराबे ओ दाई, ममता के तही चिन्हारी
सरग बरोबर तोर दुवरिया,
बाजथे डोल नँगारा ओ, बाजथे डोल नँगारा
लहराये भुवन म तोर ओ दाई, हरियर सुघर जँवारा

होत बिहनिया भक्ति भाव ले, तोर दरबार मा आये।
सरधा के दीया बाती धरके, तोरेच जस ला गाये
लाल चुनरिया ओढ़े दाई, माथे म मुकुट सुहाये
चरण कमल म माथ नवाके, मनखे मनौती ल पाये
तोर किरपा के अचरा म दाई,
झूमरत हे संसारा ओ, झूमरत हे संसारा
लहराये भुवन म तोर ओ दाई, हरियर सुघर जँवारा 

हरियर पाना जंवारा के दाई, अइसन मन ला भाये
तोर नांव के जोत ले मइया, दुख अंधियार मेटाये
घींव के जोती जगमग-जगमग, हूम धूप गुगुंड़ सुहाये
मांदर, झांझ अउ झुमका बाजे, जस पचरा ह सुनाये
सगरो भगत मन तोर जस गावय,
नाचत हे आंगन सारा ओ, नाचत हे आंगन सारा
लहराये भुवन म तोर ओ दाई, हरियर सुघर जँवारा 

भूले-भटके मनखे ल दाई, तैंही बाट बतइया ओ
गिरत जे आथें तोर दुवारी, तैंही धरके उठइया ओ
दीन-दुखी के आस तैहीं हस, तैंही भाग जगइया ओ
तोर चरन के धूर्रा ह दाई, सुफल जनम के बनइया ओ
अरजी 'तोसन' के सुन ले ओ दाई,
तोरेच हावंव दुलारा ओ, तोरेच हावंव दुलारा
लहराये भुवन म तोर ओ दाई, हरियर सुघर जँवारा 

तोषण चुरेन्द्र 'दिनकर' 
धनगांव डौंडीलोहारा बालोद छत्तीसगढ़ 
9575070689

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय