बोलबम के जयकारा
सरर सरर सावन पुरवइय्या, सोर संदेशा सुनात हे
काँवर म गंगा जल धरके, बोलबम जयकारा लगात हे
बम बम बम बम बोल बम, बम बम बम बम बोल बम
रिमझिम रिमझिम बादर बरसे, भुइँया महकगे चन्दन अस।
भगत मन के भीड़ जमे हे, श्रद्धा छलके अमृत जस।
पाँव म छाला परगे तौनों, थकासी घलो नइ आत हे,
काँवर म गंगा जल धरके, बोलबम जयकारा लगात हे।
बम बम बम बम बोल बम, बम बम बम बम बोल बम...
गेरुवा बाना तन म सोहे, काँध म सजे हे काँवरिया।
भोले बाबा के धुन म मगन, नाचत गावत सब संगरिया।
डमरू बाजे, डम-डम बाजे, मन म आनंद छात हे,
काँवर म गंगा जल धरके, बोलबम जयकारा लगात हे।
बम बम बम बम बोल बम, बम बम बम बम बोल बम...
संगी-संगवारी जम्मो चलिन, देवघर के डहर सुघर लागे।
भोलेनाथ के दर्शन पाके, सोये किस्मत घलो जागे।
अगास' म गूंजे हर हर महादेव, हर मन हाँसत जात हे,
काँवर म गंगा जल धरके, बोलबम जयकारा लगात हे।
बम बम बम बम बोल बम, बम बम बम बम बोल बम...
तोषण चुरेन्द्र 'दिनकर'
धनगांव डौंडीलोहारा बालोद छत्तीसगढ़ 9575070689
कोई टिप्पणी नहीं:
एक टिप्पणी भेजें