शनिवार, 18 अप्रैल 2026

गउ सम्मान देवाबो

गउ माता

कहाँ चलदेस तैहर भगवन, छोड़ कलजुगिहा जमाना मा।

देखना आज तोर गउ माता, पहुँचत हवै बुचड़खाना मा।

 

धरती दाई ल गउ रुप मा, जुग त्रेता मा उद्धार करे।

द्वापर म तै आके कन्हैया, गइय्यन के सत्कार करे।

खात रेहे तै कस के कान्हा, दुध दही मही ला खाना मा।

देखना आज तोर गऊ माता पहुँचत हवै बुचड़खाना मा।

 

गोरस जेकर अमरित असन, गौमूत्र हावय दवइ समान।

गोबर बने जिंहा खातु कचरा,हरिहर रखथे खेत खलिहान।

आज उर्वरा खोवत हावय, युरिया रसायनिक दाना मा।

देखना आज तोर गऊ माता, पहुँचत हवै बुचड़खाना मा।

 

घर में जेकर गउ माता हे, सब देवता के रहवास हे।

होय न पूजा जिहाँ गउमाता के, ऊँकर समूल बिनास हे।

बाँटे सबला दुध दही अउ, पेट भरे डारा पाना मा।

देखना आज तोर गउ माता पहुँचत हवै बुचड़खाना मा।


कतलखाना ल बंद करव, तोषण संग गोहरावत हँव।

गउ महतारी के सेवा करव, सबब तुहला बतावत हँव।

सतजुग द्वापर फेर ले आही,ए कलजुगिहा जमाना मा।

देखना आज तोर गऊ माता, पहुँचत हवै बुचड़खाना मा।

 

सुरहिन कपिलन नाँव दाई के,मान बढाव महतारी के।

जनम मरन तक साथ  निभाथे, हक नइहे का चिन्हारी के।

आज मिलके कसम ये खाबो, गउ सम्मान  देवाबो जमाना मा।

देखबे अब गऊ माता ला, पहुँचन नइ देन बुचड़खाना मा।

 

तोषण चुरेन्द्र 'दिनकर' 
 धनगांव, डौंडी लोहारा, बालोद,छत्तीसगढ़
9575070689/6267538036

टीप:-कृपया मूल रुप में साझा करें। इसकी कापी सुरक्षित हैं



 

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय