कहाँ लुकागे चंदा मोर, आमावस के रात मा
करके अंजोरी मोर जिनगी ल, हाँसी हाँसी गोठ बात मा, हाँसी हाँसी गोठ बात मा
कहाँ लुकागे चंदा मोर, आमावस के रात मा
अंतरा - 1
हिरणी के जइसे रेंगना तोर, दिल मा छुरी चलाना
मृगनयनी मोर चंदा चकोरी,कातिल अदा मुचमुचाना
सुरता सताथे तोर पीरीत हा, संगे गुजारे साथ मा,संगे गुजारे साथ मा
कहाँ लुकागे चंदा मोर, आमावस के रात मा
अंतरा - 2
बादर के ओदा म छुप के तैं हा, काबर मोहिनी डारे
रस्ता जोहत नैना मोर, रतिहा भर जाग के गुज़ारे
बिन तोरे ये जग अंधियारी, सूना लागे हाथ म, सूना लागे हाथ म
कहाँ लुकागे चंदा मोर, आमावस के रात मा।
अंतरा - 3
महुँआ के खुसबू कस तोर मया, रोम-रोम म समागे
तोर बिना मोर जिनगी हा, जैसे जरत दीया बुतागे
पिरीत के डोरी कस बंधे हन, कसके धरे हव हाथ म, कसके धरे हव हाथ म
कहाँ लुकागे चंदा मोर, आमावस के रात मा।
अंतरा - 4
बोली तोर जैसे कोयल के कूक, मन म मिश्री घोले
तरसत हव मैं देखन बर, कतका नीक तैं बोले
सपना म आके सपना सजा दे, सुध-बुध हरागे बात म, सुध-बुध हरागे बात म
कहाँ लुकागे चंदा मोर, आमावस के रात मा।
तोषण चुरेन्द्र 'दिनकर'
धनगांव डौंडी लोहारा बालोद छत्तीसगढ़
कोई टिप्पणी नहीं:
एक टिप्पणी भेजें