मंगलवार, 31 मार्च 2026

कुकुरदेव मंदिर: एक वफादार कुकुर के सुरता म बने मंदिर


 



*कुकुरदेव मंदिर: एक वफादार कुकुर के सुरता म बने मंदिर*

देवी-देवता मन के एक से बढ़कर एक मंदिर के बारे म त आप मन जरूर सुने होहू, फेर आप ला जान के अचरज होही कि हमर भारत के छत्तीसगढ़ मा  एक अइसन घलो मंदिर हे, जिहां कुकुर के पूजा करे जाथे। ए मंदिर ला कुकुरदेव मंदिर के नाम ले जाने जाथे। इहां के मानयता अउ ए मंदिर के बने के कहानी ला सुनके आप मन दंग रह जाहू।

*मंदिर के ठिकाना अऊ बनावट*

कुकुरदेव मंदिर छत्तीसगढ़ के बालोद जिला के डौंडीलोहारा ब्लाक ले लगभग १० किलोमीटर दूर मालीघोरी खपरी गांव म स्थित हे। सावन के महीना म इहां भक्त मन के भारी भीड़ उमड़थे। लोगन मन भगवान शिव के संग-संग कुकुर (कुकुरदेव) के घलो ओइसने पूजा करथें, जइसन शिव मंदिर म नंदी के पूजा होथे।

ए मंदिर २०० मीटर के घेरा म फइले हे। इतिहास के मुताबिक, एला १४वीं-१५वीं शताब्दी म फणी नागवंशी शासक मन ह बनवाए रिहिन। मंदिर के गरभ-गुड़ी (गर्भगृह) म कुकुर के मूरति बिराजे हे अउ ओकर बाजू म एक ठन शिवलिंग घलो हे। मंदिर के दुआरी म घलो दूनों कोती कुकुर के मूरति लगे हे। १९९३ ले ए मंदिर ला पुरातत्व विभाग ह अपन हाथ म ले ले हे।

*काबर होथे पूजा ?* 

कुकुरदेव के बारे म मानयता हे कि:

• जे मन इहां आके दर्शन करथें, ओमन ला कुकुरखांसी अउ कुकुर के काटे के डर नइ रहय।

• इहां नवरात अउ शिवरात म भारी मेला भरथे।

• एला आस्था अउ पर्यटन के बड़े केंद्र के रूप म विकसित करे जावत हे।

*मंदिर बने के कहानी*

कुकुरदेव मंदिर असल म एक स्मारक आय, जेला एक वफादार कुकुर के सुरता म बनाए गे रिहिस। कहानी अइसन हे:

जुगों पहिली एक बंजारा अपन परिवार अउ एक वफादार कुकुर के संग ए गांव म आए रिहिस। ओ बखत गांव म अकाल पर गे, त बंजारा ह गांव के साहुकार ले करजा लिस। जब ओ ह करजा नइ पटा पाइस, त अपन कुकुर ला साहुकार करा गिरवी रख दिस।

एक दिन साहुकार के घर म चोरी होगे। चोर मन सब धन-दउलत ला भुइँया म गाड़ दीन। कुकुर ह एला देख डरे रिहिस। ओ ह साहुकार ला ओ जगह म ले गीस अउ खनवा के सबो सामान ला वापस दिया दिस। साहुकार ह कुकुर के वफादारी ले खुस होगे अउ ओला आजाद कर दिस। ओ ह बंजारा के नाम एक चिट्ठी लिखिस अउ कुकुर के गला म बांध के ओला मालिक करा भेज दिस।

जब कुकुर ह बंजारा करा पहुंचिस, त बंजारा ला लागिस कि कुकुर ह साहुकार करा ले भाग के आ गे हे। ओ ह गुसा म आके कुकुर ला पीट-पीट के मार डारिस। मरे के बाद जब ओ ह कुकुर के गला म बंधे चिट्ठी ला पढ़िस, त ओकर गोड़ तरी ले जमीन खिसक गे। ओला अपन करे म भारी पछतावा होइस। ओ ह ओही जगह म कुकुर ला दफना के ओकर सुरता म एक स्मारक बनवा दिस, जेला आज सबो मनखे कुकुरदेव मंदिर के रूप म पूजथें।

इहां हर साल चइत-कुंवार अउ महाशिवरात्रि म मेला लगथे अउ भक्त मन अपन मनौती पूरा करथें।

- तोषण चुरेन्द्र दिनकर

(धनगांव, डौंडी लोहारा, बालोद, छत्तीसगढ़)

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय