ताटंक छंद अभ्यास
नवा तकनीक
नवा-नवा तकनीक धरव अब, खेती तब आगे भागे।
सही बिया ला बो लेहो जी, भाग हमर हे अब जागे।।
सिंचाई के सुविधा बाढ़गे, सब दुख-पीरा ला त्यागे।
उन्नति के रद्दा मा चल के, सब सुख के दिन ला पागे।।
देखव कइसे समय बदल गे, मिल सब्बो आगे भागे।
नवा रोशनी जब बगरे हे, अब भाग हमर हे जागे।।
पढ़ही-लिखही बेटी मन हा, दीया अंजोरी लागे।
मिल-जुल के सब रहिबो संगी, पीरीत मया के धागे।।
गोबर खातू डालव भइया, सब जहर डारना त्यागे।
माटी के अब सेहत सुधरय, सब भाग हमर हे जागे।।
सुग्घर सुवाद सेहत मिलही, जम्मों बीमारी भागे।
जैविक खेती के रद्दा मा, अब नवा जमाना आगे।।
-तोषण चुरेन्द्र 'दिनकर'
कोई टिप्पणी नहीं:
एक टिप्पणी भेजें