मथुरा गलीन आरा पारा होऽ दीदी बाजत हे नंगारा
नांचत हावै कृष्ण राधा होऽ दीदी बाजत हे नंगारा
---बाजत हे नंगारा दीदी बाजत हे नंगारा
ठूमकत हावै जग सारा होऽ दीदी बाजत हे नंगारा
धरती नांचत हे नांचत हे अंबर, नदिया पीरीत रंग घोरै हो ओ...नदिया पीरीत रंग घोरै
डोंगरी पहाड़ी झूमरै गावै, पूरवा पवन चिभोरै हो ओ पूरवा पवन चिभोरै
मया के परत हे फूहारा होऽ दीदी बाजत हे नंगारा
राधा के हाथ मा रंग कटोरा, कृष्ण के हाथ पिचकारी हो ओ कृष्ण के हाथ पिचकारी
सबला रंगे हे अपनेच रंग मा, मनमोहना गिरधारी हो ओ मनमोहना गिरधारी
माते हावै जग सारा होऽ दीदी बाजत हे नंगारा
बंशी के धुन मा रास रचाये,बिधुन होगे त्रिपुरारी हो ओ बिधुन होगे त्रिपुरारी
तीन लोक अउ चउदा भुवन मा, लीला करत हे भारी हो ओ लीला करत हे भारी
सुर नर करे जय जयकारा होऽ दीदी बाजत हे नंगारा
लीला गजब हे कृष्ण कन्हाई के,पार कोनों नइ पावै हो ओ पार कोनों नइ पावै
जोहर ललना अड़हा तोषण, होरी के धुन ला गावै हो ओ होरी के धुन ला गावै
होरी मा बांटे मीठा खारा होऽ दीदी बाजत हे नंगारा
रचनाकार ©®
तोषण चुरेन्द्र 'दिनकर'
धनगांव डौंडीलोहारा
बालोद छत्तीसगढ़
9575070689//6267538036
कोई टिप्पणी नहीं:
एक टिप्पणी भेजें