माघ महीना मेला ठेला
मेला ठेला खेल खेलौना रहचुलिया के पारी हे।
माघ महीना घूमव कहूँ न कोनों नइ चिन्हारी हे।
बधले बधना धरले संग ना बात थोरिक मान के,
बनजा हितवा मोर मितवा जिनगी दिन चारी हे।
सरसती दाई कहिथे भाई पंचमी पूजा कर ले।
धरले ध्यान तैं पाले ज्ञान मनवा कोठी भर ले।
दीया जलही ज्ञान बगरही दाई के आशीर्वाद ले,
सरगम लहरी बन पहरी बइठ डोंगा मा तरले।
गंगा स्नान बिधि बिधान मन के मइल ल धोले।
अंतर कुछ बाहर मन कुछ कपट जहर ल घोले।
सत्संग गंगा कर मन चंगा ज्ञान के दीया जलाके,
धरती के कंकर बनगे शंकर उमापति शिवभोले।
पिंवरा डारा होवै किनारा बसंत बहार ह आगे।
सरसो झूमरै आया मऊरै कोयली कुक सुनागे।
बोईर पाके गुरतुर हे मीठ मंदरस सही जनावै,
ताल नँगारा गूँजय पारा अब लगथे होरी आगे।
रचनाकार ©®
तोषण चुरेन्द्र 'दिनकर' धनगांव डौंडीलोहारा
बालोद छत्तीसगढ़ 9575070689
कोई टिप्पणी नहीं:
एक टिप्पणी भेजें