ताटंक छंद अभ्यास
सिरजन शब्द:- जादू-टोना
खैरा कुकरा माँगे बइगा, कहिके जादू हे टोना।
जंतर-मंतर बाँधय बँधना, लीमउ काँटत हे कोना।।
अंजन-बंदन कंठी माला, हाथा के मारे फेरा।
पाटा-पिड़हा तिरशुल भाला, माढ़े जेकर हे डेरा।।
सोधे मोधे बैरी खैरी, रकसा की बंकासूरे।
आगू आथे बइगा लउठी, येती तेती हे घूरे।।
झझका डारय बइगा सबला, समझे मा कोनों बोले।
जादू टोना फाँदा फटका, माथा हे मतहा डोले।।
गाँव डगर मा भारी भक्कम, हवय जबर ले ये काँटा।
जीव बली ला दे के माँगे, झपटे अपने हे बाँटा।।
नइ होवय ये दुनिया दारी, हवय भरम के ये खेला।
जादू टोना बाधा बिधना, झन रचव भरम के मेला।।
-तोषण चुरेन्द्र 'दिनकर'
कोई टिप्पणी नहीं:
एक टिप्पणी भेजें