जोहर जोहर मोर गौरा देव ल
जोहर गौरी ल मोर
जोहर जोहर मोर देव दुलरवा
जोहर लागँव मैं तोर....
देव सियार के मैं माटी मंगायेंव होऽ
गढ़ेहँव मूरतिया तुम्हार
नंदिया बइला के बाहन सजायेंव होऽ
केछुवा के करेहंव सिंगार
जोहर जोहर........
पाठ पिढ़ुलिया के मड़वा बनायेंव होऽ
बेलपतिया के हे डार
फूलपतिया हार चढ़ायेंव होऽ
आरतीन लइहौं तुम्हार
जोहर जोहर........
बाजा बाजे अउ बइगा नाचे होऽ
नाचे हो शहर कइ लोग
गौरी गौरा के रचे हे बिहाव होऽ
झूमत हावै तीनों लोक
जोहर जोहर........
तोषण चुरेन्द्र 'दिनकर'
धनगांव डौंडीलोहारा
==========================
झूलौ झूलौ झूलना मोर गौरी अउ गौरा
झूलवा बनायें हावौं चंदन के डार
करसा सिंगारौं दाई माता ओ गौरी के
गौरा करे नंदिया सवार हो ना
गौरी मोर गौरा पंइया हो लागत हँव
आरतीन लइहौं जोहार हो ना
लाली लाली लुगरा मा मौर सोंपत हे
लाली लाली करे हो सिंगार हो ना
गौरा करे संगती मोर भूतवा परेतवा
गौरी के हे सखी गिन चार हो ना.......
जय जय होवै मोर गौरी वो गौरा के
जय जय संत समाज हो ना
तोषण चुरेन्द्र "दिनकर"
धनगांव डौंडीलोहारा
कोई टिप्पणी नहीं:
एक टिप्पणी भेजें