छन्न पकैया छंद अभ्यास विषय -सरदी
छन्न पकैया छन्न पकैया,सरदी शोर जनाथे।
दीया देवारी गौरीसर,कातिक जोर मनाथे।।
छन्न पकैया छन्न पकैया,लछमी आही घर मा।
धान पान खरही गंजाही,टरही दुख छिन भर मा।।
छन्न पकैया छन्न पकैया,आगे सरदी बेरा।
शीत दिखत हे चारो कोती , शीलत भुँइया डेरा।।
छन्न पकैया छन्न पकैया,शाल सुवेटर भाथे।
आगी अंगेठा रतिहा के, बिहना घाम सुहाथे।।
छन्न पकैया छन्न पकैया,खेत बियारा छोलव।
हरियर धनहा पिंवरा होगे,महुआ मनवा डोलव।।
छन्न पकैया छन्न पकैया,अंगाकर के रोटी।
चिरपोटी चटनी सन झोरे,डबलू बबलू मोटी।।
तोषण चुरेन्द्र 'दिनकर'
धनगांव डौंडीलोहारा
कोई टिप्पणी नहीं:
एक टिप्पणी भेजें