सोमवार, 22 सितंबर 2025

दुर्गा बिदाई


जगमोहनी नवदुर्गा दाई झन तैं भुलाऽबे ओ
अब के जवइया हे महामाई जल्दी तैं आबे ओ


तोर देवाला तोर मंदिर मा,बाजत रिहिस झांझ ताल ओ
जावत ओ तोला देख के दाई, कइसे होगे हे अब हाल ओ 
एक्कीस बहिनिया रोवत हावय,भैरव लंगुरवा लाल ओ
ब्रम्हा रोवत हे बिसनु रोवत हे, रोवत संउहे महाकाल ओ
आरो ला सुन के अपन भगत के,हाथ लमाबे ओ
अब के जवइया हे महामाई जल्दी तैं आबे ओ


जोत जँवारा फूल फूलवरिया,सुन्ना होगे हे रखवार ओ
नवदिन रतिहा सेवा बजायेंन,अतरी काबर दिन बार ओ
ममता बढ़ाये ओली मा बिठाये,दिये हस मया दुलार ओ
अइसन काबर हम ला छोड़त हस, काबर दिये बिसार ओ
रोवत हँव दाई तोर सरन मा, अउ सोरियाबे ओ
अब के जवइया हे महामाई जल्दी तैं आबे ओ


ढर ढर ढर ढर आंखी ह बरसे, दाई जाए के बेरा मा
झन रितयाबे बघवा मा आबे, दाई इही मोर डेरा मा
झन पथरावय मोर आंखी हा, रस्ता देखे के फेरा मा
साज सिंगारी भोग कलेवा, राखे रहूँ फूला पठेरा मा
जोहर ललना तोसन कहत हे,भाग जगाबे ओ
अब के जवइया हे महामाई जल्दी तैं आबे ओ।


रचनाकार 
तोषण चुरेन्द्र "दिनकर" 
धनगाँव डौंडी लोहारा बालोद छत्तीसगढ़ 9575070689

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय