*बरदान - नान्हे कहिनी छत्तीसगढ़ी अनुवाद म*
एक झिन सियानदाई रहय। वोह अब्बड़ गरीबीन अउ आंखी के अंधरी घलक रहय। अपन गोसंइया,बेटा बहुरिया सन सुग्घर जिनगी पहावत रहय। सियानदाई ह सरलग गनेस भगवान के पूजापाठ करय।
एक दिन सियानदाई ह गनेस भगवान के पूजा करत रहय, त भगवान गनेस ह परगट होगे अउ सियानदाई ल बोलिस-'सियानदाई!मँय तोर पूजा पाठ ले अब्बड़ खुस हँव। का बरदान दँव ।मांग जेन मांगना हे तेला।'
सियानदाई ह गनेस भगवान ल देख के सबले पहिली तो अकबकागे। तहान फेर पाँव परके गनेस भगवान ल कहिस-'मोला तो बरदान मांगे बर नइ आय। काला माँगव अउ कइसे माँगव?
तब गनेस भगवान बोलिस-'अपन बेटा बहुरिया ल पुछके मांग ले।'
तहान सियानदाई ह घर म आके अपन बेटा ल कहिस -गनेस भगवान परगट होके मोला कहिस 'ते कहीं बरदान मांग ले।' ते बता काला माँगव?
बेटा कहिस-'दाई! तैं धन दौलत रुपिया पइसा मांग ले।'
बहु ल पूछिस त बहू कहिस-'तैं नाती मांग ले।'
सब ल सुन के सियानदाई मन मन म सोचथें कि येमन तो अपन अपन सुवारथ के बात करत हें।
पाछू सियानदाई ह अपन परोसीन मन ले पूछिस,त ओमन कहिन-सियानदाई!तैं जादा नइ जीयस,काबर तैं धन दौलत रुपिया पइसा मांगबे अउ काबर नाती पोता मांगबे?तैं तो अपन आंखी बर अंजोर मांगले,जेकर ले तोर जिनगी ह अराम लेवत कट जाही।'
ये सब गोठबात सुनके समझ के सियानदाई ह गनेस भगवान कर जाके बोलिस-' भगवान! तैं मोर उप्पर खुस हावस न त मोला नौ करोड़ के माया,निरोगी काया,अमर गोसंइया,आंखी के अंजोर,नाती नतरा,मोर परिवार ल सुख शांति अउ आखिर म मोला मुक्ति दे।'
अतिक सब ल सुन के भगवान गनेस ह बोलिस -'सियानदाई!तैं तो मोला ठग डारेस ओ। तभो ले तैं जौंन बरदान मांगे हस न वो सब मोर बचन के मान राखे बर तोला सब मिलही।'
सियानदाई के मांगे अउ भगवान गनेस के आशीर्वाद ले सबो बरदान सियानदाई ल मिलगे। पूरा परिवार हंसी खुसी ले जिनगी बिताय लगिन।
हे गनेस भगवान!जइसने तैंह वो सियानदाई ल सब कुछ देहस,वइसने सबझन देवत रहिबे,अपन किरपा सबो भगत मन बर बनाय रहिबे।
।।बोलो गनेस भगवान की जय।।
तोषण चुरेन्द्र "दिनकर"
धनगाँव डौंडी लोहारा बालोद छत्तीसगढ़
कोई टिप्पणी नहीं:
एक टिप्पणी भेजें