सारछंद अभ्यास
विषय नवराती
ये आगे नवराती रिगबिग,चमकत दीया बाती।
टिकली चंदा कस महतारी,दमकत आती जाती।।
तोर दुवारी नर अउ नारी,राजा रंक भिखारी।
सबो बरोबर लइका दाई,नइहे गउ चिनहारी।।
सातो बहिनी जोरे बँइहा,सुकवा कहय पहाती।
टिकली चंदा कस महतारी,दमकत आती जाती।।
फुल फुलवारी जोत जँवारा,लहर लहर लहरावय।
भैरव बाबा लाला लँगुरा,निशदिन चँवर झुलावय।।
कोनों बाँधे नरियर भेला,भेजय कोनों पाती।
टिकली चंदा कस महतारी,दमकत आती जाती।।
खेलत आबे कूदत आबे,दाई मोर दुवारी।
चटनी बासी खाबे भाजी,राँधे मोर सुवारी।।
तोसन लइका हँव महतारी,गावँव गीत सुहाती।
टिकली चंदा कस महतारी,दमकत आती जाती।।
तोषण चुरेन्द्र "दिनकर"
धनगाँव डौंडी लोहारा बालोद छत्तीसगढ़
कोई टिप्पणी नहीं:
एक टिप्पणी भेजें