हर हर बम बम जय शिव शंभू
जपले नम: शिवाय
चलो शिव ल मनाबोन हो कांवर ल सिरजाबोन
कांँवर धरके गंगाजल भरके होऽऽऽ
जयकारा लगाबोन हो काँवर ल सिरजाबोन
हर हर बम बम जय शिव शंभू
जपले नम: शिवाय
बंदन चंदन नरियर भेला, शिव भोला ल चढ़ाके
बेलपाना संग भंगिया धथुरा, मन भर भोग लगाके
पावन महिना सावन महिना, भक्त चले जुरियाके
चलऽथे कंवरिया बनके गुजरिया, शिव के ध्यान रमाके
अंग भभूति राख चुपरके होऽऽऽ
भक्ति मा रंगजाबोन हो कांवर ल सिरजाबोन
हर हर बम बम जय शिव शंभू
जपले नम: शिवाय
पार्वती के प्राण पति तैं, पहिरे बघवा के छाला
जग कल्याण करे के खातिर, पीये तैं विष के प्याला
दैहिक दैविक ताप मिटाये, डमरू तिरशूल धारी
गला बिराजे नाग के माला, बइला के करे सवारी
नंदी भृंगी नाचय गावय होऽऽऽ
हर हर भोला गाबोन हो कांवर ल सिरजाबोन
हर हर बम बम जय शिव शंभू
जपले नम: शिवाय
पूजा नी जानँन पाठ नी जानँन हावँन गजब अड़ानी
भावभक्ति हे अलवा जलवा, जानले अवघड़ दानी
भक्ति में हमरो भरदे शक्ति, हे शक्ति के स्वामी
का तोरले हे लुके छिपे हे, जय हो अंतर्यामी
तोर भगति म हम समजाबोन होऽऽऽ
भाग अपन सहराबोन हो कांवर ल सिरजाबोन
हर हर बम बम जय शिव शंभू
जपले नम: शिवाय
तोषण चुरेन्द्र 'दिनकर'
धनगाँव डौंडी लोहारा
बालोद छत्तीसगढ़
४९१७७१
६२६७५३८०३६//९५७५०७०६८९

कोई टिप्पणी नहीं:
एक टिप्पणी भेजें