देवार गीत धुन मा
=====================================
कइसन दुनिया आगे ओ दीदी
मोला समझ नइ आय
जियत बइला मा टोपा बांधे
घानी म तेल पेराय
मूसवा कूदावय सांप ल दीदी
बिलइ ह ताली बजाय
बादर गिरय पानी ह फीजे
कइसन हे दिन आय
=====================================
चोर ह भागे पाछू पाछू
रहे पुलिस अगवाय
तीन तिगाड़ा काम बिगाड़े
जग म नाम कमाय
साग ऊपर म डबके कनोजी
लकड़ी म चूल्हा बोजाय
दावा ढिलागे पानी भीतरी
मछरी ह ताली बजाय
=====================================
डोकरी के ऊपर खटिया सूते
ढेकना रहे घूँसियाय
गुरुजी पढ़े लइका पढ़ावय
पट्टी म झोला लुकाय
मछरी भीतरी तरिया तउरे
छेरी ल डारा ह खाय
फूल के डोंहड़ू म पेड़ फूले
जग देख अचम्भा खाय
=====================================
घाम के देखत पसीना सूखागे
जाड़ म आगी बूझाय
गाना सुनावय तोसन दिनकर
सुर मा सुर ल लमाय
मया ल लेवव मया ल देवव
इही जगत के सार
पोख्खा पोख्खा बीजा मया
बदरा ल देवव निमार
=====================================
तोषण चुरेन्द्र 'दिनकर'
धनगाँव डौंडी लोहारा
बालोद छत्तीसगढ़ ४९१७७१
६२६७५३८०३६//९५७५०७०६८९
कोई टिप्पणी नहीं:
एक टिप्पणी भेजें