बुधवार, 7 अगस्त 2024

बरजे नइ मानय

छत्तीसगढ़ महतारी साहित्य अकादमी 
दैनिक सृजन प्रतियोगिता 
*विषय - बरजे ला नइ मानय टुरा*
विधा-स्वतंत्र , दिनांक ०७/०८/२४

=======================================
जगा-जगा हे पाप के डबरा
जान बूच के कूदत हस
बरजे ला नइ मानय टुरा
छानी म होरा भूँजत हस
काबर नइ मानस रे थोरको नइ जानस रे
=======================================
सत के रद्दा ल छोड़के तँयहा
जाके असत म झपाये
पड़गेस काकर गोठ म भकला
जिनगी ल नरक बनाये
कोईला माँद म हाथ ल डारे
कइसन हीरा ढूंढ़त हस
बरजे ला नइ मानय टुरा
छानी म होरा भूँजत हस
काबर नइ मानस रे थोरको नइ जानस रे
=======================================
झन कर संगत पापी अधम के
साथ न देवय जमाना
पगला बरोबर किंजरत रहिबे
दर-दर ठोक्कर खाना
मोंगरा चंपा ल छोड़के भकला
फूल बेशरम ल सूँघत हस
बरजे ला नइ मानय टुरा
छानी म होरा भूँजत हस
काबर नइ मानस रे थोरको नइ जानस रे
=======================================
बन जा लव कुश ध्रुव बालक जस 
नाम अमर हो जाही
बरसे आशीष सात पुरखा के
जिनगी सफल हो पाही
करले सतसंग ज्ञान ल पाले
काबर पाछू छूटत हस
बरजे ला नइ मानय टुरा
छानी म होरा भूँजत हस
काबर नइ मानस रे थोरको नइ जानस रे
=======================================

रचनाकार 
तोषण चुरेन्द्र 'दिनकर' 
धनगाँव डौंडी लोहारा बालोद छत्तीसगढ़ ४९१७७१
६२६७५३८०३६//९५७५०७०६८९ =======================================

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय