मोर गनपति महाराज
जय हो गिरजा गौरी लाल,तोला सुमरत हंव मैं आज
---पूजा नइ जानंव,पाठ नइ जानंव
तोर मरम के, बात नइ जानंव,रख देबे मोर लाज
मोर गण पति महाराज,कर मंगल सब तै काज
दुनिया म होथे पूजा तोर पहिली,रिद्धि सिद्धि के स्वामी
पारबती के हावस दुलरवा,गजमुखी अंतरयामी
---लड्डू चढ़ावंव,भोग लगावंव
पान सुपाड़ी ,कलेवा चढ़ावंव,ढोल बजावंव बाज
मोर गण पति महाराज,कर मंगल सब तै काज
भादो के महिना चउथ के दिन ले,पारा गली म बिराजे
संझा बिहनिया करंव आरती,सोनहा थारी सजाके
---मूसवा सवारी ,पेट बड़ा भारी
माथ ल नवाये, सब नर नारी,ठूमकत संत समाज
मोर गण पति महाराज,कर मंगल सब तै काज
टार के तैह बाधा बिघन ल,बल बुद्धि के देवइया
अंधरा के आंखी कोढ़ी के काया,बांझ के बेटा सिरजइया
---माथ नवावंव,तोला मनावंव
सुमर सुमर के, तोर गुन गावंव,भक्ति के साजे साज
मोर गण पति महाराज,कर मंगल सब तै काज
तोषण चुरेन्द्र दिनकर धनगाँव डौंडी लोहारा बालोद छत्तीसगढ़
.jpg)
कोई टिप्पणी नहीं:
एक टिप्पणी भेजें