मोर दुर्गा दुलौरिन ओ..... दाई दुर्गा दुलौरिन ओ
करंव तोर बंदन धर फूल चंदन माथ नवावंव आज
दाई मोर लाज बजादे
आजा ओ दाई बघवा सवारी
जोहत हवों रसता तोर महतारी
पूरन कर सब काज...दाई पूरन कर सब काज
माथ म सोहे लाली टिकुलिया ,सोनहा मकुटिया बिराजे
चमचम चमके कान के झुमका,नाक म नथनी ह साजे
बड़ नीक लागे नौलख हार,मोहनी सुरतिया हा भावय
जगमग चमके चंदा सुरुज ह,दया मया बगरावय
हे जगजननी आदि भवानी
कालरातरि जग कल्याणी
पूरन कर सब काज.... दाई पूरन कर सब काज
लाली लाल तोर ककनी बनुरिया,लाली रंग करे सिंगारे
लाली फूल दसमत भावय तोला,लाली लगे ध्वजा दुवारे
पांव पैजनिया गोड़ म बिछिया,लाली माहुर के रंग हे
हनुमत लाला भैरव बाबा,अघवा पछवा तोर संग हे
जोहर ललना आरती सजाये
संझा बिहनिया तोर जस गाये
पूरन कर सब काज... दाई पूरन कर सब काज
तोषण चुरेन्द्र 'दिनकर' धनगाँव डौंडी लोहारा बालोद छत्तीसगढ़
.jpg)
कोई टिप्पणी नहीं:
एक टिप्पणी भेजें