गुरुवार, 25 जुलाई 2024

बाली उमरिया तिरछी नजरिया



छनन छनन पायल तोर बाजे रे गोरिया
खनन खनन चुड़ी हाथ के खनके रे कंगना
मोर दिल मा गिराये बिजुरिया रे सजनी 
चढ़ती तोर बाली उमरिया
तोर नैना हे कारी कटरिया रे सजनी 
मारत हे तिरछी नजरिया 

××××××××××××××××××××××××

करिया घटा कस तै/सावन मा बरसे/अंग-अंग म मया बढ़ाये
निशा गोली कस तोर/ गुरतुर हे बोली/मउहा मतौना पियाये
घनर घनर गरजे जुलुफ कारी रे बदरिया
सरर सरर अचरा तोर डोलावै  पुरवइया
मोर दिल मा गिराये बिजुरिया रे सजनी 
चढ़ती तोर बाली उमरिया
तोर नैना हे कारी कटरिया रे सजनी 
मारत हे तिरछी नजरिया 

××××××××××××××××××××××××

चंदा बरन हे तोर/सुंदर मुखड़ा/झन तैं दागी लगाबे
धधकत हे आगी/हिरदे के भीतरी/कब तैं मया बरसाबे
जुगुर जुगुर जोगनी कस करबे रे जोगनिया
तोर बिना सुन्ना मोर महल अउ अटरिया
मोर दिल मा गिराये बिजुरिया रे सजनी 
चढ़ती तोर बाली उमरिया
तोर नैना हे कारी कटरिया रे सजनी 
मारत हे तिरछी नजरिया 

××××××××××××××××××××××××

तोर इंतजार करत/ नैना पथरागे/झन तै अब तरसाना
दिल नइ माने/तोर जुदाई/नइ चले कउनों बहाना
लाहूं माहूर लाली लुगरा ककनी  रे बनुरिया
बनहूं तोर  दुल्हा मोर बनबे रे दुल्हनिया 
मोर दिल मा गिराये बिजुरिया रे सजनी 
चढ़ती तोर बाली उमरिया
तोर नैना हे कारी कटरिया रे सजनी 
मारत हे तिरछी नजरिया 

××××××××××××××××××××××××

तोषण चुरेन्द्र 'दिनकर' 
धनगाँव डौंडी लोहारा बालोद छत्तीसगढ़ ४९१७७१
६२६७५३८०३६//९५७५०७०६८९

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय