सोमवार, 29 जुलाई 2024

करमा नचादे माँदर बजादे

==========================================
रि रिलो रि रिलो रे रेला राय रेला
साय रेला साय रेला रि रिलो राय रेला

करमा नंचादे गुंइया रे होऽऽ
माँदर बजादे गुंइया रे
नदिया नरवा कछार, झुमरै अमुवा के डार, आयेंव करके सिंगार होऽऽ
करमा नंचादे गुंइया रे होऽऽ
माँदर बजादे गुंइया रे

रि रिलो रि रिलो रे रेला राय रेला
साय रेला साय रेला रि रिलो राय रेला
==========================================
बस्तर के बांस पान, लिबिर लाबर डोलय ओ,लिबिर लाबर डोलय
करमा के ताल मन, भेद मोर खोलय रे, भेद मोर खोलय
डोंगरी के तीर गोरी, पाके तेंदू चार ओ, पाके तेंदू चार
रस्ता ल जोहत रहूं, आबे खारे खार रे आबे खारे खार
कोयली मारे कुहुकी तान,मारे करेजा बान,मुसले तोर मुस्कान होऽऽ
करमा नंचादे गुंइया रे होऽऽ
माँदर बजादे गुंइया रे

रि रिलो रि रिलो रे रेला राय रेला
साय रेला साय रेला रि रिलो राय रेला
==========================================
सरर सरर पुरवइया, करमा गीत गाय रे करमा गीत गाय
चढ़ती तो जवानी गोरी,मन ला मोर मताय ओ, मन मोर मताय
नाचबो गाबो आजा राजा, करमा के ताल गा, करमा के ताल
तोर मया मोर खातिर,होगे जीव के काल ओ, होगे जीव के काल
कउड़ी खोपा गाँथके,मोहनी मया छाँदके, राखे मोला बाँधके होऽऽ
करमा नंचादे गुंइया रे होऽऽ
माँदर बजादे गुंइया रे

रि रिलो रि रिलो रे रेला राय रेला
साय रेला साय रेला रि रिलो राय रेला
==========================================
तोषण चुरेन्द्र 'दिनकर' 
धनगाँव डौंडी लोहारा बालोद छत्तीसगढ़ ४९१७७१
६२६७५३८०३६//९५७५०७०६८९
==========================================

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय