बुधवार, 24 जुलाई 2024

सियानी गँवारी


*सियानी गँवारीम भुलाय रथों।*

सियानी गँवारीम भुलाय रथों।
घानी कस बइला फँदाय रथों।
संझा ह बितथे लइका संग मा,
मछरी कस जाला छँदाय रथों।

लिखई मोर से होथे मनचटहा।
आखर शब्द घलक अटपटहा।
माड़ी भर भर झोर चुचुवावय,
आमा अमली कस चटपटहा।
मनभीतरी बात ल दबाय रथों।
मछरी कस जाला छँदाय रथों।

सरपंची करई जीव के जंजाल।
सताथे भारी काल ऊपर काल।
सुनव कोन ल अउ चुप कराँव,
पहिरे हे खड़री बघवा के छाल।
घरबुंदिया म संगी घेराय रथों।
मछरी कस जाला छँदाय रथों।

लिखइया  मनखे रहे नी जाय।
झूठ अउ लबारी कहे नी जाय।
गिल्ला चिबरी मैं करथों रचना,
मन के कलपना सहे नी जाय।
मया पाये चोरिया टेकाय रथों।
मछरी कस जाला छँदाय रथों।

तोषण चुरेन्द्र 'दिनकर' 
सरपंच ,गीतकार,उदघोषक,कवि,
अध्यक्ष व गायक-जय श्री राम मानस परिवार धनगाँव 
डौंडीलोहारा बालोद छत्तीसगढ़ 
(तात्कालिक रचना दिनांक २४/७/२४ रात ९:३० बजे)

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय