नव दिन ले करंव पहुंनाई मोर दुर्गा दाई
नव दिन ले करंव पहुंनाई
नैना ले आंसू झर झर झरथे,नदिया नरवा पलछिन भरथे
कइसे के करंव मैं बिदाई
मोर दुर्गा दाई के नव दिन ले करंव पहुंनाई
नवदिन पावन परब नवराति,करंव महतारी के जोरा
टिकली फूंदरी साज सिंगारी,पांव बर पइरी जोंडा़
नवकरसा नवजोत जलाएंव,सरधा के भाव जगाके
नवदुर्गा नवरूप ओ दाई,हिरदे के आसन लगाके
चरण पखारंव गंगाजल ले,संझा बिहनिया आरती करके
किरपा ल करव महामाई
मोर दुर्गा दाई के नव दिन ले करंव पहुंनाई
तोर सेवा म ब्रह्मा बिसनु,शंकर भोला आवय
बाजे नंगारा झांझ मंजीरा,हनुमत चुटकी बजावय
बिरही फिजोवय वरूण देव ह,जोत जंवारा फूलवारी
नाचय गावय देंवता धामी,पारत हे किलकारी
झन जाना तैं छोंड़ के हमला,शारद मइय्या सर्वमंगला
होवत हावय करलाई
मोर दुर्गा दाई के नव दिन ले करंव पहुंनाई
जाए बर तैं जावत हावस,दया मया सोरियाबे
इही दिन बादर में फेर दाई,अउ तैं लहुट के आबे
खुल्ला रही मोर घर अंगना,पांव ल अपन मढ़ाबे
बासी कोदो कुटकी ओ मइय्या,चटनी के भोग लगाबे
तोसन बरूवा माथ नवावय,सुमर सुमर तोर गुन ल गावय
घेरी बेरी करे गोहराई
मोर दुर्गा दाई के नव दिन ले करंव पहुंनाई
तोषण चुरेन्द्र दिनकर धनगांव डौंडी लोहारा बालोद छत्तीसगढ़
९५७५०७०६८९//६२६७५३८०३६
कोई टिप्पणी नहीं:
एक टिप्पणी भेजें