सोमवार, 18 सितंबर 2023

मोर पड़की चिरइय्या

मोर पड़की चिरइय्या तैंह उड़ के आजा
मोर कारी कोयलिया आके दिल मा समाजा
नैन मिलाले बोली बतराले...बदरा बन छा जा

पून्नी के राती म चंदा बरोबर,रूप गजब तोर दमके
चंदैनी लागे तोर आंख के पूतरी, हीरा मोती जस चमके
देख टिकुलिया ल सूरूज लजागे,लागे नजरिया कटारी
मनमोहनी ओ दिल के जोगनी,लुका जाये अंधियारी 
तैं बन पुरवइय्या मधुबन मा छा जा
मोर कारी कोयलिया आके दिल मा समाजा
नैन मिलाले बोली बतराले...बदरा बन छा जा

छुईमुई रानी लजवंती तै,देखके काबर लजाथस
जीवरा ले डारे तोर रेंगाई,मिरगीन कस इतराथस
मोंगरा फूल मोर गांजाकली ओ,मनभंवरा पाछू तोर आये
मन मोही डारे मोर मयारू,मया के बान चलाये
आजा मनमोहनी तैंह उड़ के आजा
मोर कारी कोयलिया आके दिल मा समाजा
नैन मिलाले बोली बतराले...बदरा बन छा जा

अमरइया छंइहा मा बनके कन्हाई,मया के बंसी बजावँव
आजा रे मोर रधिया रानी,पीरा ल दिल के देखावँव
तोर मया के मैं करन सुवा नारे,तैं मोर प्रेम दीवानी 
संगे जीबो संगे संगे  मरबो,अमर रही ये कहानी
मोर दिल के चैना मोर तीर मा आजा
मोर कारी कोयलिया आके दिल मा समाजा
नैन मिलाले बोली बतराले...बदरा बन छा जा

तोषण चुरेन्द्र दिनकर धनगांव 
डौंडी  लोहारा बालोद छत्तीसगढ़ 

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय