आजा हे गौरी के गजानन,
मुसवा सवारी मा आ जाना
शरन पड़े हँव आस करे हँव
लाज तँय मोर बचा जाना
सोन के पिड़हा मा आसन लगायेंव
नवगिरहा ल मढ़ाये हावँव
जगमग जगमग ठउर करत हे
सरधा के दीया जलाये हावँव
पान फूल संग नरिहर बंदन
आरती के थारी सजाये हावँव
भाव भजन ले तोर अरज हे
चरन मा माथ लगाये हावँव
लड्डू धरे हँव दूबी धरे हँव
आके भोग लगा जाना
आजा हे गौरी के गजानन,
मुसवा सवारी मा आ जाना
रिद्धि सिद्धि के तँयह देवइय्या
बल बुद्धि के दाता ना
बिगड़ी मोर बनादे गजानन
तही हर भाग्य बिधाता ना
धरम करम के तँय संगवारी
तोर हाथ बही खाता ना
सुख दुख कतको आही जगत मा
बनके रहिबे छाता ना
पंइय्या परत हँव धियान धरत हँव
काज मोरो सिरजा जाना
आजा हे गौरी के गजानन,
मुसवा सवारी मा आ जाना
गीत
तोषण चुरेन्द्र दिनकर
धनगांव डौंडी लोहारा
बालोद छत्तीसगढ़
कोई टिप्पणी नहीं:
एक टिप्पणी भेजें