राखी के बंधना
मोर सुन भईया तै बंधना राखी के हवय
झन चिटकाबे एला तोड़ केऽऽ
राखे रहिबे मया ल तै जोड़ के हांऽऽ
राखे रहिबे मया ल तै जोड़ के
साल म एक्के बेरा आथे गा तिहार हा
आथे गा तिहार हा
रिश्ता भाई बहिनी के जाने संसार गा
जाने संसार गा
मोर सूरज भईया तै,बंधना राखी के हवय
झन चिटकाबे एला तोड़ केऽऽ
राखे रहिबे मया ल तै जोड़ के हांऽऽ
राखे रहिबे मया ल तै जोड़ के
आरती उतारंव मैंहा थारी ल सजाके गा
थारी ल सजाके गा
लेवंव मैं बलईंया तोरे तिलक ल लगाके गा
तिलक ल लगाके गा
मोर चंदा भईया तै बंधना राखी के हवय
झन चिटकाबे एला तोड़ केऽऽ
राखे रहिबे मया ल तै जोड़ के हांऽऽ
नइ चाहंव रुपिया पइसा धन अउ डोगानी गा
धन अउ डोगानी गा
बंधे रहे बंधना हमर एक लोटा पानी गा
एक लोटा पानी गा
मोर ललना भईया तै,बंधना राखी के हवय
झन चिटकाबे एला तोड़ केऽऽ
राखे रहिबे मया ल तै जोड़ के हांऽऽ
राखे रहिबे मया ल तै जोड़ के
तोषण चुरेन्द्र दिनकर
धनगांव डौंडी लोहारा
बालोद छत्तीसगढ़
कोई टिप्पणी नहीं:
एक टिप्पणी भेजें