सोमवार, 4 सितंबर 2023

जन्माष्टमी

तोषण कहिथे आज मयारू,कान्हा के दिवस मनात हँन।
आवव दीदी आवव भैय्या, महिमा ल एखर सुनात हँन।
आठे के तिहार

तोषण कहिथे आज मयारू,
कान्हा के दिवस मनात हँन।
आवव दीदी आवव भैय्या, 
महिमा ल एखर सुनात हँन।

जब जब अत्याचारी बढ़थे,
धरम के होवय हानी।
कथा कन्हैया के अजर अमर हे,
नोहय किस्सा कहानी।

देवकी अउ बसदेव ल,
डाले कारा के गाल म।
अइसन भाई कभू न मिलय,
आगी लगे चंडाल म।

सातझन भाई बहिनी ल,
कंस ह मार देखाये।
आठव  जनम कन्हैया के,
जन जग हे हर्साये।

तिथि आठे के महिना भादो,
रात घोर अंधियार।
लहरा लेवय चरन छुये बर,
तब जमुना के धार।

गोकुल पहुंचे कृष्ण गोपाला,
लीला बाल देखाये।
दही लुटे खावय माखन,
मधुबन रास रचाये।

कंस चाणूर बलवानी योद्धा,
नंइ मांगिस हे पानी।
मुटका मुटका मारे छाती,
होगिस हे चानी-चानी।

बड़-बड़ दानव मारे कान्हा,
ऋषि मुनि मन ल उबारे।
दुखिया मन बर हितवा बनें तै,
अउ दिये अँगरी सहारे।

समरभूमि में गीता ज्ञान के,
रिमझिम पानी बरसय।
कलजुगिहा के सरग निसैनी,
सगरो जगत जीव हरसय।

धरम के खातिर जीयव मरव,
रद्दा नवा देखाईस हे।
दया मया संग सुमता संगत,
हम सबला सिखलाईस हे।

जादा नहीं ते थोरिक संगी,
गीता के कहना मानव।
एकता के बंधना बंधे रहे गा,
अतरी करनी जानव।

कृति:-
तोषण चुरेन्द्र दिनकर 
धनगांव डौंडी लोहारा 
बालोद छत्तीसगढ़ 
९५७५०७०६८९

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय