गुरुवार, 25 मई 2023

गदर मताये हे


जब ले टुरी के जवानी आये हे
गांव भर गदर मताये हे
रेंगय गोरी लटक झटक के
दिल मा छुरी चलाये हे दिल मा बिजली गिराये हे

पाछू परे हे टुरा दिवाना 
गावत हे देखके फिल्मी गाना
आनी बानी के फैशन करत हे
बइहा होगे सारा जमाना
नैना नशीली चाल अलबेली
गोरी मंदरस मा नहाये हे दिल मा बिजरी गिराये हे
जब ले टुरी के जवानी आये हे
गांव भर गदर मताये हे

जींस टाप पहिरे चश्मा लगाके
मारत हे टुरी बड़ स्टाईल
लेवत हे सेल्फी उलट पुलट के
धरे हाथ मा चाईना मोबाइल 
गोलवा गोलवा गोरी गाल ह चमके
जीव ले डारे हे ओकर ईस्माइल 
बुढ़वा घलो हा भाव देवत हे
मेछा मा ताव देखाये हे दिल मा बिजरी गिराये हे 
जब ले टुरी के जवानी आये हे
गांव भर गदर मताये हे

ओठ दिखत हे लाली पंखुडी 
मिरगीन सही एखर चाल हे
देखके टुरी के चढ़ती जवानी 
सबो के जीव बाराहाल हे
एला फंसाये के चक्कर मा
कतको होगे कंगाल हे
देख सुघरइ मा झोलटू होगेन
लोटा थारी अउ बटकी बेचाये हे दिल मा बिजरी गिराये हे 
जब ले टुरी के जवानी आये हे
गांव भर गदर मताये हे

तोषण चुरेन्द्र 'दिनकर' 
धनगांव डौंडीलोहारा 
बालोद छत्तीसगढ़

कोई टिप्पणी नहीं:

आगामी

सतनाम

सतनाम सतनाम तै भजले सुजान भागमानी काया मिले सुंदर तै जान भागमानी काया मिले सुंदर तै जान पंचरतन के काया, छिन मा सिराही गा पानी पर...

लोकप्रिय